ក្រុមហ៊ុន Sino Biopharmaceutical ដែលបានចុះបញ្ជីផ្សារភាគហ៊ុននៅទីក្រុងហុងកុង បានវិនិយោគ ៥១៥ លានដុល្លារ ទៅក្នុងក្រុមហ៊ុន Sinovac ដើម្បីទទួលបានចំណែកកាន់កាប់ភាគហ៊ុន១៥% នៃក្រុមហ៊ុននេះ នៅក្នុងនៃការការផលិតវ៉ាក់សាំង CoronaVac។
ការវិនិយោគនេះ នឹងជួយឲ្យក្រុមហ៊ុនផលិតវ៉ាក់សាំងរបស់ចិនមួយនេះ អាចនឹងបង្កើនផលិតកម្ម ដែលសង្ឃឹមថា នឹងកើនឡើងទ្វេដងដល់ទៅ ៦០០ លានដូស ក្នុងមួយឆ្នាំ ដែលអាចចាក់ជូនមនុស្សចំនួន ៣០០លាននាក់ នៅពេលដែល រោងចក្រផលិតកម្មទី២របស់ខ្លួនត្រូវបានបញ្ចប់នៅចុងឆ្នាំ២០២០នេះ។
បន្ថែមពីលើការផ្ដល់នូវមូលនិធិជាដើមទុនសម្រាប់ការផលិតវ៉ាក់សាំង CoronaVacនេះ លោក Weidong Yin នាយកប្រតិបត្តិក្រុមហ៊ុនSinovac Biotech បាននិយាយថា ភាពជាដៃគូនេះ នឹងជួយឲ្យក្រុមហ៊ុន Sinovac បង្កើនសមត្ថភាពលក់វ៉ាក់សាំង, ពង្រីកទីផ្សារនៅអាស៊ី, អភិវឌ្ឍ និងទទួលបានបច្ចេកវិទ្យាថ្មីៗ ហើយអ្វីដែលសំខាន់នោះ គឺពន្លឿនកិច្ចខិតខំប្រឹងប្រែង ដើម្បីជួយប្រយុទ្ធប្រឆាំងនឹងមេរោគរាតត្បាតជាសកលនេះ។
អត្ថបទទាក់ទង!
វ៉ាក់សាំង CoronaVac គឺជាវ៉ាក់សាំងកូវីដ-១៩ មួយក្នុងចំណោមវ៉ាក់សាំងដែលនាំមុខដោយក្ដីសង្ឃឹមសម្រាប់សុវត្ថិភាព និងប្រសិទ្ធភាពសម្រាប់ការប្រើប្រាស់ក្នុងស្រុកនៃប្រទេសចិន។ វ៉ាក់សាំងនេះ គឺស័ក្ដិសមសម្រាប់ប្រទេសមិនសូវមានសេដ្ឋកិច្ចលូតលាស់ខ្លាំង អាចទិញយកទៅប្រើប្រាស់ ដោយវាមិនសូវចាំបាច់ត្រូវការការស្តុកទុកក្នុងទូរត្រជាក់ខ្លាំង ដូចដែលវ៉ាក់សាំងរបស់ក្រុមហ៊ុន Pfizer និង Moderna នោះទេ។ ដូច្នេះ វាងាយស្រួលសម្រាប់ប្រទេសស្ថិតក្នុងតំបន់ក្រីក្រយកទៅប្រើប្រាស់។
វ៉ាក់សាំង CoronaVac តាមទិន្នន័យដែលបានតេស្ដប្រសិទ្ធភាពនៅគ្រាដំបូង គឺទទួលបានជោគជ័យរួចហើយ បើទោះបីជាការតេស្ដប្រសិទ្ធភាពនៅដំណាកកាលទីបី ដែលជាដំណាក់កាលធំនោះ មិនទាន់ត្រូវបានធ្វើឡើងក៏ដោយចុះ តែវាក៏បានផ្ដល់ជូនដល់ប្រទេសមួយចំនួនរួចហើយ ហើយប្រទេសទាំងនោះ ក៏ចាំមើលលទ្ធផលតេស្ដសាកល្បងដំណាក់ទី៣ ដើម្បីអាចចាក់ជូនជាផ្លូវការដល់ប្រជាជនរបស់ខ្លួន ដូចជា ប្រទេសប្រស៊ីល ឥណ្ឌូនេស៊ី តូគី និងឈីលី ជាដើម។
ក្រោយពី បានធ្វើតេស្ដលើកទី២ ក្រុមហ៊ុន Sinavac ធ្លាប់បានបញ្ជាក់ថា តាមទិន្នន័យជាបណ្ដោះអាសន្នបង្ហាញថា វ៉ាក់សាំងនេះ មានប្រសិទ្ធភាពការពារកូវីដ-១៩ ដល់ទៅ ៩៧%។
បើតាមអង្គការសុខភាពពិភពលោក បានឲ្យដឹងថា មកទល់បច្ចុប្បន្ននេះ ស្ថាប័នក៏ដូចជាក្រុមហ៊ុនដែលចូលរួមធ្វើតេស្ដប្រសិទ្ធភាពវ៉ាក់សាំងកូវីដ-១៩ មានដល់ទៅជាង ៥០ ក្រុមហ៊ុន និងស្ថាប័នហើយ។
ក្នុងនោះដែរ គេមើលឃើញថា វ៉ាក់សាំងដែលលេចធ្លោ និងទទួលបានជោគជ័យខ្លាំងជាងគេមានដូចជា វ៉ាក់សាំងរបស់ក្រុមហ៊ុនអាមេរិក និងដៃគូអាល្លឺម៉ង់ Pfizer BioNTech ដែលទិន្នន័យបណ្ដោះអាសន្នបង្ហាញថា មានប្រសិទ្ធភាពការពារកូវីដ-១៩ ដល់ទៅ ៩៥% តែវ៉ាក់សាំងនេះ ត្រូវការរក្សាទុកក្នុងទូរបង្កកត្រជាក់ដល់ទៅ -៧០អង្សារសេ។បច្ចុប្បន្ន វ៉ាក់សាំងនេះ ត្រូវបានចក្រភពអង់គ្លេសទិញយកទៅចាក់ជូនប្រជាជនរបស់ខ្លួនជាផ្លូវការរួចហើយ។ បន្ទាប់មក គឺវ៉ាក់សាំងរបស់ក្រុមហ៊ុន Moderna ដែលក្នុងដំណាក់កាលបណ្ដោះអាសន្ននេះ បង្ហាញថា មានប្រសិទ្ធភាពដល់ទៅ ៩៥% ត្រូវរក្សាទុកក្នុងសីតណ្ហភាព -២០ អង្សារសេ និងរក្សាទុកបានរយៈពេល ៦ខែ។ ដោយឡែក វ៉ាក់សាំងរបស់ក្រុមហ៊ុនរុស្ស៊ី Gamaleya (Sputnik V) មានប្រសិទ្ធភាព ៩២% ក្នុងដំណាក់កាលបណ្ដោះអាសន្ននេះ អាចរក្សាទុកបានក្នុងសីតណ្ហភាពត្រជាក់ ក្នុងទូទឹកកកធម្មតាបាន។ រីឯ វ៉ាក់សាំងរបស់ក្រុមហ៊ុនអូស្ត្រាលីមួយទៀត គឺ Oxford Uni-Astra Zeneca ដែលក្នុងការរាយការណ៍បឋមនេះ គឺមានប្រសិទ្ធភាពចន្លោះពី ៦២% ដល់ ៩០% និងអាចរក្សាទុកបាននៅក្នុងសីតណ្ហភាពត្រជាក់ក្នុងទូទឹកកកធម្មតា។
សូមបញ្ជាក់ថា មានប្រទេសជាច្រើនបាននិងកំពុងប្រញាប់ប្រញាល់ក្នុងការស្វែងរកទិញវ៉ាក់សាំងដើម្បីចាក់ជូនប្រជាជនរបស់ខ្លួន ខណៈដែលមេរោគរាតត្បាតកូវីដ-១៩ បាននិងកំពុងបន្ដវាយប្រហារឥតឈប់ឈរ។ ក្នុងនោះ កម្ពុជាក៏បានត្រៀមខ្លួន និងកំពុងរៃអង្គាសថវិកាពីសប្បុរសជន ដើម្បីទិញវ៉ាក់សាំងនេះផងដែរ ដោយក្នុងដំណាក់កាលដំបូងនេះ កម្ពុជានឹងទិញវ៉ាក់សាំងចំនួន ១លានដូស ដើម្បីចាក់ជូនប្រជាជន ៥០ម៉ឺននាក់ និងមានគោលដៅ បន្ដទិញចាក់ជូនប្រជាជនដល់ទៅ ១០លាននាក់។ យ៉ាងណាក៏ដោយចុះ ប្រមុខរាជរដ្ឋាភិបាលកម្ពុជា មិនទាន់បានបញ្ជាក់ថា នឹងទិញវ៉ាក់សាំងការពារកូវីដ-១៩ នោះ ពីប្រទេសណាមួយនៅឡើយទេ។ គិតត្រឹមថ្ងៃទី ៨ ខែធ្នូ ឆ្នាំ២០២០ រាជរដ្ឋាភិបាលកម្ពុជា បានទទួលថវិកាពីសប្បុរសជនសម្រាប់ទិញវ៉ាក់សាំងកូវីដ-១៩ នេះ ចំនួន ជាង៣០លានដុល្លារអាមេរិករួចហើយ៕
None
