លោក ឌ្រួង វណ្ណ ខាំ អនុប្រធានសមាគមវាយនភ័ណ្ឌ និងសម្លៀកបំពាក់វៀតណាម បានគូសបញ្ជាក់ថា សហគ្រាសធុនតូច និងមធ្យមជាច្រើន អាចនឹងចាប់ផ្តើមបិទទ្វារ នៅខែមីនា ខាងមុខ ដោយសារតែពួកគេ បានប្រើប្រាស់វត្ថុធាតុដើមអស់ទៅហើយ ក្នុងខែកុម្ភៈនេះ។
សហគ្រាសទាំងអស់នេះ មានចំណែករហូតដល់ទៅ ៩០% នៅក្នុងវិស័យវាយនភ័ណ្ឌនេះ ហើយពួកគេបានកាត់បន្ថយម៉ោងការងារ បើទោះបីជា ការផ្គត់ផ្គង់ ទៅកាន់អតិថិជន មិនទាន់រួចរាល់ក៏ដោយ។ វត្ថុធាតុដើមវាយនភ័ណ្ឌ សឹងតែ ៦០% ទៅហើយ គឺនាំចូលមកពីប្រទេសចិន ហើយវាកំពុងតែកកស្ទះដោយសារតែ វិធានការទប់ស្កាត់ការរីករាលដាលនៃមេរោគ Covid 19។
ការនាំចេញផលិតផលវាយនភ័ណ្ឌរបស់វៀតណាម ក្នុងខែមករា ដើមឆ្នាំ ២០២០នេះ បានធ្លាក់ចុះប្រមាណ ២៣% ធៀបនឹងឆ្នាំមុន ហើយការនាំចូលមកវិញ ក៏ធ្លាក់ចុះប្រមាណ ២៨% ផងដែរ។
អត្ថបទគួរអាន
យ៉ាងណាក៏ដោយ ក្រុមហ៊ុនមួយចំនួន បានងាកទៅរកទីផ្សារសក្តានុពលផ្សេងៗដូចជា ឥណ្ឌូនេស៊ី ឥណ្ឌា បង់ក្លាដេស និងប្រេស៊ីល ដោយសារតែ អាជីវកម្មនៅក្នុងទីផ្សារចិន មិនបើកដំណើរការរហូតដល់ទៅ ពាក់កណ្តាលខែមីនា ខាងមុខ។
គួរជម្រាបដែរថា វិស័យវាយនភ័ណ្ឌវៀតណាម ជាប្រភពចំណូលដ៏សំខាន់របស់វៀតណាម ដែលសម្រេចបានប្រមាណ ៣២ពាន់លានដុល្លារអាមេរិក កាលពីឆ្នាំ ២០១៩ ហើយទីផ្សារធំជាងគេបង្អស់គឺ សហរដ្ឋអាមេរិក បន្ទាប់មកគឺ សហភាពអឺរ៉ុប និងជប៉ុន៕
None
