លោក Ramaphosa បាននិយាយនៅក្នុងសុន្ទរកថាប្រចាំឆ្នាំមួយថា បច្ចុប្បន្ននេះប្រទេសអាហ្រ្វិកខាងត្បូង កំពុងស្ថិតនៅក្នុងវិបត្តិកង្វះខាតថាមពលអគ្គិសនីដ៏ធ្ងន់ធ្ងរបំផុតក្នុងប្រវត្តិសាស្ត្ររបស់ខ្លួន ហើយស្ថានការណ៍នេះកំពុងវិវត្តកាន់តែអាក្រក់ទៅៗនៅក្នុងប៉ុន្មានខែថ្មីៗនេះ។ លោកសម្រេចប្រកាសពីស្ថានភាពអាសន្នមួយនេះ ដោយចាត់ទុកថា ជាគ្រោះមហន្តរាយ ដោយសារលោកជឿថា គេនឹងអាចស្វែងរកបានមូលនិធិ និងធនធានបន្ថែម ដើម្បីពន្លឿនការដោះស្រាយវិបត្តិមួយនេះ។
គួរជម្រាបថា បញ្ហាទាំងអស់នេះ គឺបណ្ដាលមកពីបណ្តាញអគ្គិសនីដែលដំណើរការដោយក្រុមហ៊ុនថាមពលរដ្ឋរបស់អាហ្រ្វិកខាងត្បូង ឈ្មោះថា Eskom បានបរាជ័យក្នុងការផ្គត់ផ្គង់តម្រូវការរបស់ប្រជាពលរដ្ឋ ខណៈដែលក្រុមហ៊ុនជួបការលំបាកក្នុងការរក្សាថាមពលដើរដោយធ្យូងថ្ម។ ចំពោះដំណោះស្រាយដែលគេអាចធ្វើបាននៅពេលនេះ គឺគេបានដាក់កាលវិភាគក្នុងការផ្ដាច់ ផ្អាកផ្គត់ផ្គង់ភ្លើង ដើម្បីជួយឱ្យប្រព័ន្ធថាមពលដែលផលិតដោយធ្យូងថ្មអាចដំណើរការផលិតបានទាន់ពេលវេលា ចំពោះមុខតម្រូវការដ៏ច្រើនលើសលប់បែបនេះ។
នៅក្នុងកិច្ចប្រជុំសភាមួយ ដែលត្រូវបានពន្យារពេលដោយសារមានការជំទាស់ពីសមាជិកសភាបក្សប្រឆាំងចំពោះវិធានប្រកាសអាសន្ននេះ លោក Ramaphosa បានថ្លែងថា កាលៈទេសៈដ៏លំបាកនេះគឺទាមទារឱ្យមានវិធានការពិសេសបែបនេះទើបអាចដោះស្រាយទៅបាន។ ជាមួយគ្នានេះ លោកបានប្រកាសថា លោកនឹងតែងតាំងរដ្ឋមន្ត្រីពិសេសថ្មីមួយរូប មកទទួលបន្ទុកផ្នែកអគ្គិសនីនេះតែម្តង។
អត្ថបទគួរអាន
គួរជម្រាបថា ខណៈពេលនេះប្រជាជនអាហ្រ្វិកខាងត្បូងកំពុងអស់សង្ឃឹមចំពោះស្ថានភាពនៅប្រទេសរបស់ខ្លួន ដែលកំពុងមានសេដ្ឋកិច្ចដើរអូសជើងផង ហើយបទឧក្រិដ្ឋក៏កើនឡើង អត្រាអ្នកគ្មានការងារធ្វើក៏មានខ្ពស់ ស្របពេលដែលកម្រិតអតិផរណាកាន់តែអាក្រក់ទៅៗ និងកង្វះទឹកប្រើប្រាស់ថែមទៀត។
ជាក់ស្ដែង ប្រជាជនអាហ្រ្វិកខាងត្បូងប្រមាណ ៦០លាននាក់ ត្រូវបង្ខំឲ្យស៊ូទ្រាំនឹងការដាច់ភ្លើងរហូតដល់ទៅ១២ម៉ោងក្នុងមួយថ្ងៃ ហើយកង្វះខាតចរន្តអគ្គិសនីនេះ កំពុងប៉ះពាល់យ៉ាងធ្ងន់ធ្ងរដល់សេដ្ឋកិច្ច ដែលគេធ្លាប់តែរំពឹងថា នឹងអាចមានកំណើនក្នុងរង្វង់ ០,៣% នៅឆ្នាំ២០២៣នេះ ខណៈឆ្នាំ២០២២ មានកំណើនប្រមាណ ២,៥%។
បើតាមរដ្ឋមន្ត្រីអាហ្រ្វិកខាងត្បូងម្នាក់បានប៉ាន់ប្រមាណកាលពីដើមសប្តាហ៍នេះថា ការដាច់ចរន្តអគ្គិសនីកំពុងធ្វើឱ្យសេដ្ឋកិច្ចខាតបង់ប្រាក់ប្រមាណ៥៧លានដុល្លារក្នុងមួយថ្ងៃ។ គេយល់ថា វិបត្តិនេះកំពុងបំផ្លាញឱកាសរបស់ លោក Ramaphosa ក្នុងការបន្តអាណត្តិទីពីររបស់លោកជាអ្នកដឹកនាំប្រទេស៕
