នៅក្នុងអំឡុងដំណើរទស្សនកិច្ចនៅក្នុងប្រទេសអារ៉ាបរួម លោក ម៉ូន ចេអ៊ីន ប្រធានាធិបតីកូរ៉េខាងត្បូង បានបានគូសបញ្ជាក់ជាថ្មីម្តងទៀត ពីការតាំងចិត្តរបស់ទីក្រុងសេអ៊ូល ក្នុងការសម្រេចឲ្យបាននូវគោលនយោបាយអព្យាក្រិតកាបូន និងឧស្ម័នមេតានត្រឹមឆ្នាំ ២០៥០ ព្រមទាំងការជំរុញការបង្កើត និងប្រើប្រាស់ថាមពលកកើតឡើងវិញផងដែរ។ ត្រូវបានគេស្គាល់ថា ជាប្រទេសបញ្ចេញឧស្ម័នផ្ទះកញ្ចក់ដ៏ធំបំផុតមួយប្រចាំតំបន់អាស៊ី កូរ៉េខាងត្បូង កំពុងស្ថិតក្រោមសម្ពាធកាន់តែច្រើនឡើង ដែលជំរុញឲ្យប្រទេសមួយនេះ ដោះស្រាយការប្រែប្រួលអាកាសធាតុឲ្យបានឆាប់រហ័ស។
ថ្លែងប្រាប់ថ្នាក់ដឹកនាំក្នុងជំនួបជាមួយនឹងអារ៉ាប់រួម នៅទីក្រុងឌូបៃ លោកម៉ូន ចេអ៊ីននិយាយថា៖ បញ្ហាបម្រែបម្រួលអាកាសធាតុកំពុងក្លាយជាការពិត ជាក់ច្បាស់ នៅចំពោះមុខរបស់យើងគ្រប់គ្នាក្នុងពេលបច្ចុប្បន្ន។ កូរ៉េខាងត្បូងសង្ឃឹមយ៉ាងមុតមាំថា កិច្ចសហការជាមួយ អារ៉ាប់រួម នឹងនាំទៅរក គោលនយោបាយអព្យាក្រិតកាបូន និងអនាគតប្រកបដោយនិរន្តរភាព។
អត្ថបទគួរអាន
គួរជម្រាបថា កូរ៉េខាងត្បូងក្នុងមួយឆ្នាំៗ បាននាំថាមពលចូលឥន្ធនៈហ្វូស៊ីលច្រើនណាស់ ពីប្រទេសតំបន់ឈូងសមុទ្រពែក្ស ដើម្បីផ្គត់ផ្គង់ថាមពល សម្រាប់គាំទ្រដល់ដំណើរការសេដ្ឋកិច្ចរបស់ខ្លួន ដែលពឹងផ្អែកខ្លាំងលើការផលិតក្នុងវិស័យឧស្សាហកម្ម។ ប៉ុន្តែនៅក្នុងការថ្លែងសុន្ទរកថាជាសាធារណៈក្នុងអំឡុងពេលដំណើរទស្សនកិច្ចរបស់លោកទៅកាន់ទីក្រុងឌូបៃក្នុងសប្តាហ៍នេះហាក់មានភាពចម្លែកបន្តិច។
ចម្លែកនៅត្រង់ថា ប្រធានាធិបតីកូរ៉េខាងត្បូងដែលជិតផុតអាណត្តិរូបនេះ មិនបានគូសបញ្ជាក់ អំពីកិច្ចសហប្រតិបត្តិការស៊ីជម្រៅរបស់សេអ៊ូល នៅក្នុងឧស្សាហកម្មប្រេង និងឧស្ម័នឡើយ។ ផ្ទុយទៅវិញ លោកបានសង្កត់ធ្ងន់លើភាពជឿនលឿននៃបច្ចេកវិទ្យាថាមពលផលិតចេញពីឧស្ម័នអ៊ីដ្រូសែន និងថាមពលកកើតឡើងវិញ ដែលនេះពិតជាសញ្ញាល្អមួយសម្រាប់បញ្ហាអាកាសធាតុ។ ជាក់ស្តែងភាគីទាំងពីរបានប្រកាសថា នឹងរួមគ្នាសាងសង់គម្រោងផលិតថាមពលអីដ្រូសែនដ៏ធំមួយផងដែរ៕
None
