តាមការព្យាកររបស់ក្រុមប្រឹក្សាភាពយន្ដកូរ៉េ បានឲ្យដឹងថា ប្រាក់ចំណូលរួមបញ្ចូលគ្នានៃរោងបញ្ចាំងភាពយន្ដនៅកូរ៉េខាងត្បូង ត្រូវបានរំពឹងថា នឹងធ្លាក់ចុះដល់ទៅ ៦៣,៦% មកនៅត្រឹម៨២៣ លានដុល្លារអាមេរិកប៉ុណ្ណោះ នៅឆ្នាំ២០២០នេះ ដែលវាគឺជាចំណូលមួយទាបបំផុតគិតតាំងពីឆ្នាំ២០០៤មក។ ការធ្លាក់ចុះប្រាក់ចំណូលដ៏គំហុកនេះ គឺត្រូវបានគេដឹងថា បណ្ដាលមកពីបញ្ហាមេរោគរាតត្បាតកូវីដ-១៩។
ការចូលទស្សនាភាពយន្ដវិញ ត្រូវបានគេរំពឹងដែរថា នឹងធ្លាក់ចុះមកនៅត្រឹម ៦០លាននាក់ប៉ុណ្ណោះ នៅឆ្នាំ២០២០នេះ ដោយវាគឺជាការធ្លាក់ចុះចំនួនអ្នកទស្សនាមកនៅទាបបំផុតក្នុងរយៈពេល ២០ឆ្នាំកន្លងមកនេះ។
អត្ថបទទាក់ទង!
ដោយមានចំនួនភ្ញៀវ និងការលក់សំបុត្រចូលទស្សនាភាពយន្ដធ្លាក់ចុះយ៉ាងខ្លាំងយ៉ាងដូច្នេះ មានរោងភាពយន្ដធំៗជាច្រើននៅកូរ៉េខាងត្បូង បានសម្រេចបិទទ្វារសាខារបស់ខ្លួនមួយចំនួន ជាបណ្ដោះអាសន្ន។ ជាក់ស្ដែង ដូចជា រោងភាពយន្ដ CGV ដែលជារោងភាពយន្ដធំជាងគេបង្អស់ និងមានសាខាច្រើននៅកូរ៉េ ក៏បានសម្រេចបិទសាខារបស់ខ្លួនប្រមាណ ៣០%ផងដែរ។ ក្រៅពីការបញ្ឈប់ប្រតិបត្តិការ ក៏មានរោងភាពយន្ដខ្លះទៀត បានកាត់បន្ថយការងារបុគ្គលិករបស់ខ្លួនដែរ។
កង្វះខ្សែភាពយន្ដថ្មីៗ ដើម្បីទាក់ទាញអ្នកចូលចិត្តទស្សនាភាពយន្ដ ក៏បានក្លាយជាបញ្ហាមួយទៀត ដែលធ្វើឲ្យឧស្សាហកម្មរោងភាពយន្ដនៅកូរ៉េកំពុងប្រឈម។ នៅក្នុងខែធ្នូនេះ ជាឧទាហរណ៍ គឺជាខែដែលត្រូវសម្បូរភាពយន្ដទស្សនា ប៉ុន្ដែ មានតែខ្សែភាពយន្ដចំនួន ៣ រឿងប៉ុណ្ណោះ បានចេញដាក់បញ្ចាំងនៅកូរ៉េ ដោយសារតែក្រុមហ៊ុនផលិតរឿងកុនជាច្រើនទៀត បានពន្យារពេលចេញរឿងរបស់ខ្លួន ដោយបារម្ភពីការប៉ះពាល់ដោយសារតែកូវីដ-១៩៕
None
