ការធានានេះនឹងធ្វើឱ្យ IMF ទុកចិត្តព្រមផ្តល់កម្ចីប្រមាណ ២,៩ពានលានដុល្លារបន្ថែមទៀតដល់ស្រីលង្កា ក៏ប៉ុន្តែទឹកប្រាក់នេះត្រូវបន្តរង់ចាំការអនុម័តយល់ព្រមពីក្រុមប្រឹក្សាប្រតិបត្តិរបស់ IMF ជាមុនសិន។
នៅក្នុងសេចក្តីប្រកាសព័ត៌មានដាច់ដោយឡែកមួយនៅថ្ងៃអង្គារទី ៧ ខែកុម្ភៈ សមាជិកនៃក្រុមប្រទេសផ្តល់ប្រាក់កម្ចី ក្លឹបបារីស បាននិយាយថា សមាជិករបស់ខ្លួនទាំងអស់ រួមជាមួយនឹងប្រទេសហុងគ្រី អារ៉ាប់ប៊ី សាអូឌីត និងឥណ្ឌាកំពុងស្វែងការកិច្ចសហការជាមួយគ្នា និងជាមួយអ្នកផ្តល់កម្ចីឯទៀត ដើម្បីរៀបចំហេដ្ឋារចនាសម្ព័ន្ធបំណុលឡើងវិញ សម្រាប់ស្រីលង្កា ឱ្យបានឆាប់តាមដែលអាចទៅរួច។
បន្ថែមពីលើនេះ សេចក្តីថ្លែងការណ៍របស់ក្លឹបបារីសបានរៀបរាប់ទៀតថា សមាជិករបស់ខ្លួនរួមជាមួយនឹងប្រទេសហុងគ្រី បានសម្តែងការប្តេជ្ញាចិត្តពេញលេញរបស់ពួកគេហើយ ក្នុងការចរចាជាមួយប្រទេសស្រីលង្កា នូវលក្ខខណ្ឌក្នុងការរៀបចំរចនាសម្ព័ន្ធបំណុលឡើងវិញ ខណៈដែលអារ៉ាប៊ីសាអូឌីតបានគាំទ្រដំណើរការនេះ ហើយបានទទួលស្គាល់សារៈសំខាន់ក្នុងការផ្តល់ការធានាផ្នែកហិរញ្ញវត្ថុនាពេលខាងមុខ។
អត្ថបទគួរអាន
គួរជម្រាបថា ប្រទេសដែនកោះនៅអាស៊ីខាងត្បូងដែលមានប្រជាជនចំនួន២២លាននាក់នេះ បានសម្រេចការធានាកិច្ចព្រមព្រៀងបឋមជាមួយ IMF ក្នុងខែកញ្ញាសម្រាប់កម្ចីមកដោះស្រាយវិបត្តិ ទោះបីជាមិនទាន់មានមូលនិធិណាមួយ ត្រូវបានបញ្ចេញមកក៏ដោយគិតទល់ពេលនេះ ដោយសារតែថវិកាសង្គ្រោះត្រូវតែមានអ្នកធានា ទើបអាចអនុម័តដោយក្រុមប្រឹក្សាភិបាលរបស់មូលនិធិ IMFបាន។ បន្ទាប់មកទៀត រដ្ឋាភិបាលក្រុងកូឡុំបូក៏ត្រូវមានការធានានូវហិរញ្ញប្បទានពីអ្នកផ្តល់ប្រាក់កម្ចីទ្វេភាគីសំខាន់ៗរបស់ខ្លួនដូចជា ជប៉ុន ឥណ្ឌា និងចិនផងដែរ។
ខណៈពេលដែលប្រទេសឥណ្ឌាបានប្តេជ្ញាចិត្ត ជួយសម្រាលបន្ទុកបំណុលរបស់ប្រទេសជិតខាងរបស់ខ្លួនមួយនេះ ខណៈដែលធនាគារ EximBank របស់ប្រទេសចិនបានត្រឹមតែផ្តល់ការពន្យាពេលសងបំណុលទាំងដើមទាំងការក្នុងរយៈពេលពីរឆ្នាំប៉ុណ្ណោះ។ ទោះយ៉ាងណា នេះជាចំណាត់ការដែលបង្ហាញពីឆន្ទៈក្នុងការគាំទ្រដល់ស្រីលង្កា ប៉ុន្តែវាមិនគ្រប់គ្រាន់ទេ។
គួរជម្រាបថា ចិន និងឥណ្ឌា មិនមែនជាសមាជិកអចិន្ត្រៃយ៍របស់ក្លឹបប៉ារីសនោះទេ។ ដោយឡែកអ្នកនាំពាក្យ IMF មិនបានឆ្លើយតបភ្លាមៗចំពោះសំណើសុំការអត្ថាធិប្បាយជុំវិញបញ្ហានេះ ពីអ្នកសារព័ត៌មានឡើយ។
សូមបញ្ជាក់ថា ក្លឹបបារីស ជាក្រុមប្រទេសម្ចាស់បំណុលឯកជន ដែលមានយ៉ាងហោចណាស់សមាជិក៣០ប្រទេស តំណាងឱ្យប្រហែល ៦០% នៃម្ចាស់បណ្ណបំណុលអន្តរជាតិសរុប។ ក្រុមហ៊ុនវិនិយោគសកល Amundi Asset Management, BlackRock, HBK Capital Management, Morgan Stanley Investment Management និង T. Rowe Price Associates Inc. ស្ថិតក្នុងចំណោមសមាជិកក្រុមនេះផងដែរ៕
