ការនាំចូលដែកកើនឡើង ប៉ុន្ដែបញ្ហាដែកឡើងថ្លៃកំពុងបង្កក្តីបារម្ភដល់ក្រុមហ៊ុនម៉ៅការសាងសង់

បើតាមការគូសបញ្ជាក់របស់ក្រុមហ៊ុនម៉ៅការសាងសង់ បច្ចុប្បន្នដែកមួយតោនទិញចូលក្នុងតម្លៃជាង៩០០ដុល្លារអាមេរិក ខណៈពីមុនមានតម្លៃពីជាង៦០០ទៅ៧០០ដុល្លារប៉ុណ្ណោះ។

ក្រោយពិភពលោករួមទាំងកម្ពុជាទទួលរងនូវការឆ្លងរាតត្បាតនៃជំងឺកូវីដ-១៩ យើងសង្កេតឃើញថា តម្លៃដែកនៅកម្ពុជារួមទាំងប្រទេសក្នុងតំបន់បានហក់ឡើងជាបន្តបន្ទាប់ ក្រោយក្រុមហ៊ុនជួបការលំបាកក្នុងការនាំចូលដែក និងវត្ថុធាតុដើម ដោយសារការរឹតបន្តឹងវិធានការកូវីដ-១៩ របស់បណ្តាប្រទេសមួយចំនួន។ បញ្ហាដែលឡើងថ្លៃនេះបាននិងកំពុងបង្កក្តីដល់ក្រុមហ៊ុនម៉ៅការសាងសង់គេហដ្ឋាន និងសំណង់អគារផ្សេងៗ និងបានទាញទម្លាក់ការលក់របស់ដេប៉ូលក់គ្រឿងសំណង់មួយចំនួនផងដែរ។

លោក សុខ ឡៃ អ្នកគ្រប់គ្រងទូទៅរបស់ក្រុមហ៊ុនពិស្ណុការ ដែលជាក្រុមហ៊ុនម៉ៅការសំណង់ដ៏ធំមួយនៅកម្ពុជាបានគូសបញ្ជាក់ថា គិតមកទល់នឹងពេលនេះ ទីផ្សារដែកនៅកម្ពុជាមិនទាន់បង្ហាញពីសញ្ញាថយចុះនៅឡើយទេ។ លោកអះអាងថា ដែកបច្ចុប្បន្នក្រុមហ៊ុនទិញចូល១តោនមានតម្លៃជាង៩០០ដុល្លារ មានការកើនឡើងពី២០%ទៅ៣០% បើធៀបនឹងតម្លៃដែកកាលពីមុន ដែលមានត្រឹមតែជាង៧០០ដុល្លារក្នុង១តោន។ អ្នកគ្រប់គ្រងទូទៅរបស់ក្រុមហ៊ុនពិស្ណុការរូបនេះ កត់សម្គាល់ឃើញថា កត្តាដែលជំរុញឲ្យតម្លៃដែកមានការកើនឡើង គឺដោយសារការកើនឡើងតម្លៃប្រេងឥន្ធនៈ ដែលបណ្តាលមកពីវិបត្តិសង្គ្រាមនៅអ៊ុយក្រែន គួបផ្សំវិបត្តិជំងឺកូវីដ-១៩។

ពាក់ព័ន្ធបញ្ហាតម្លៃដែកនេះម្ចាស់ដេប៉ូលក់ដែកនិងគ្រឿងសំណង់មួយចំនួនបានលើកឡើងស្រដៀងគ្នាថា តម្លៃដែកបច្ចុប្បន្នមិនមានការប្រែប្រួលនោះទេ។ ទោះយ៉ាងណា ក្រុមម្ចាស់ដេប៉ូលក់ដែក អះអាងថា ការលក់ដែកនិងគ្រឿងសំណង់របស់ពួកគេនៅតែមានការធ្លាក់ចុះចន្លោះពី២០%ទៅ៣០% ដដែល។

គួរបញ្ជាក់ថា នៅ៥ខែឆ្នាំ២០២២ កម្ពុជាបាននាំចូលដែក និងដែលថែបពីក្រៅប្រទេសមានទំហំទឹកប្រាក់ជិត១៥០លានដុល្លារកើនឡើងជិត២០%បើធៀបនឹងរយៈពេលដូចគ្នាកាលពីឆ្នាំ២០២១ ដែលមានត្រឹមតែជាង ១២៥លានដុល្លារ។ នៅក្នុងខែឧសភា កន្លងទៅ ការនាំចូលដែក និងដែកថែបរបស់កម្ពុជាមានតម្លៃជាង៣០លានដុល្លារ កើនឡើងជាង២៣% បើធៀបនឹងខែឧសភា កាលពីឆ្នាំ ដែលមានត្រឹមតែជាង២៤លានុដុល្លារ។ នេះបើតាមតួលេខពីអគ្គនាយកដ្ឋានគយ និងរដ្ឋាករកម្ពុជា។

ឯកឧត្តម ស៊ាង ថៃ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានចាត់ទុកកំណើននាំចូលដែកនេះថា វាបានបង្ហាញពីការរីកចម្រើននៃវិស័យសេដ្ឋកិច្ច និងសំណង់របស់កម្ពុជា។ ឯកឧត្តមអះអាងថា ទោះបីមានការរំខានពីការឆ្លងរាតត្បាតនៃជំងឺកូវីដ-១៩ តែការអភិវឌ្ឍសំណង់អគារខ្ពស់ៗ ខុនដូ ផ្ទះល្វែងនិងផ្ទះវីឡានៅដំណើរការជាប្រក្រតី។ ជាពិសេសក្រោយពេលដែលរាជរដ្ឋាភិបាលបានប្រកាសបើកសកម្មភាពសង្គម និងសេដ្ឋកិច្ចលើគ្រប់វិស័យឡើងវិញ បន្ទាប់ពីចាត់វិធានការទប់ស្កាត់ជំងឺកូវីដ-១៩ បានល្អ តាមរយៈការស្រោចវ៉ាក់សាំងលើប្រជាពលរដ្ឋ ដែលមកទល់បច្ចុប្បន្នសម្រេចបានជាង៩០%ហើយ៕