ការប្រមូលចំណូលដោយពន្ធដារសម្រេចបាន ១,៧ពាន់លានដុល្លារ នៅ ៥ខែ ឆ្នាំ២០២២

សរុបរយៈពេល ៥ខែ ឆ្នាំ២០២២ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានជាក់ស្តែងតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ មានចំនួនប្រមាណជាង ១ ៧២៦លានដុល្លារ ស្មើនឹង ៦១,២៥% នៃផែនការច្បាប់ហិរញ្ញវត្ថុប្រចាំឆ្នាំ ធៀបនឹងចំណូលពន្ធ-អាករក្នុងរយៈពេលដូចគ្នា ឆ្នាំ២០២១ ឃើញថា កើនឡើងចំនួនប្រមាណជាង ៣៧៦ លានដុល្លារ ស្មើនឹង ២៧,៩៥%។ឮ

សម្រាប់រយៈពេល ៥ខែ ឆ្នាំ២០២២ ចំណូលពីប្រភេទពន្ធសំខាន់ៗ បានរក្សាកំណើនក្នុងរង្វង់ ២៥%ទៅ ៤៥% ធៀបនឹងរយៈពេលដូចគ្នាក្នុងឆ្នាំ២០២១ ក្នុងនោះពន្ធលើប្រាក់ចំណូល ២៥,៩៨% អាករលើតម្លៃបន្ថែម ២៦,៤២% ពន្ធលើប្រាក់បៀវត្ស ២៦,៣៨% អាករពិសេស ៣៣,៤១% និងពន្ធប្រថាប់ត្រាលើការផ្ទេរកម្មសិទ្ធិអចលនទ្រព្យ ៤៤,៣៨%។

ចំពោះលទ្ធផលនៃការគ្រប់គ្រងប្រមូលចំណូលពន្ធ ឯកឧត្តមគង់ វិបុល បានបញ្ជាក់ថា ក្នុងខែឧសភា ឆ្នាំ២០២២ ចំណូលពន្ធ-អាករ គ្រប់ប្រភេទដែលអគ្គនាយកដ្ឋានពន្ធដារប្រមូលបានជាក់ស្ដែងតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ ប្រមាណជា ២២៥,០០លានដុល្លារ ស្មើនឹង ៧,៩៨% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២២។ ប្រៀបធៀបនឹងចំណូលពន្ធ-អាករប្រចាំខែឧសភា ឆ្នាំ២០២១ ឃើញថាកើនឡើងចំនួនប្រមាណជា ៣៦,៣៧ លានដុល្លារ ស្មើនឹង ១៩,២៨%។

ទន្ទឹមនេះ ក្នុងខែឧសភា ឆ្នាំ២០២២ ចំណូលពីប្រភេទពន្ធសំខាន់ៗ បានបន្តរក្សាកំណើនឡើងគួរឱ្យកត់សម្គាល់ធៀបនឹងខែឧសភា ក្នុងឆ្នាំ២០២១ រួមមានពន្ធលើប្រាក់ចំណូល ១៥,៤០% អាករលើតម្លៃបន្ថែម ២២,៣២% ពន្ធលើប្រាក់បៀវត្ស ៤,៤៣% អាករពិសេស៤៦,៤៧% និងពន្ធប្រថាប់ត្រាលើការផ្ទេរកម្មសិទ្ធិអចលនទ្រព្យ៥៣,០៦%៕