ការអំពាវនាវនេះធ្វើឡើងក្រោយអគ្គនាយកដ្ឋានពន្ធដារសង្កេតឃើញមានការចុះបញ្ជីរបស់សហគ្រាសមួយចំនួន ដែលមិនមានពិតប្រាកដ និងក្លែងបន្លំ ដើម្បីធ្វើអាជីវកម្មដោយមិនបង់ពន្ធ។ ទន្ទឹមនេះ អគ្គនាយកដ្ឋានពន្ធដារ ក៏ស្នើដល់ភាគីពាក់ព័ន្ធទាំងអស់ត្រូវចូលរួមពង្រឹងនូវអភិបាលកិច្ចល្អឱ្យបានត្រឹមត្រូវផងដែរ ខណៈកាលពីពេលថ្មីៗនេះ អគ្គនាយកដ្ឋានពន្ធដារ សង្កេតឃើញមានការប្រកាសបង់ពន្ធរបស់ក្រុមហ៊ុនសហគ្រាសមួយចំនួនមានការខ្វះចន្លោះច្រើន។
ថ្លែងក្នុងសិក្ខាសាលាផ្សព្វផ្សាយស្តីពី«កាតព្វកិច្ចពន្ធលើប្រាក់ចំណូលប្រចាំឆ្នាំ និងកម្មវិធីរដ្ឋបាលអេឡិចត្រូនិកពន្ធដារ» នាព្រឹកថ្ងៃទី២០ ខែមីនា ឆ្នាំ២០២៤ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយក នៃអគ្គនាយកដ្ឋានពន្ធដារ បានគូសបញ្ជាក់ថា អគ្គនាយកដ្ឋានពន្ធដារ តែងតែចង់ឃើញមានសហគ្រាសថ្មីមកចុះបញ្ជីឱ្យបានច្រើន ដ្បិតថា វាឆ្លុះបញ្ចាំងពីការរីកចម្រើននៃកំណើនសេដ្ឋកិច្ចជាតិ។
អត្ថបទគួរអាន
ការលើកឡើងបែបនេះរបស់មេពន្ធដារ ធ្វើឡើងក្រោយកន្លងមកមានការលើកឡើងថា អគ្គនាយកដ្ឋានពន្ធដារមិនឯកភាពលើការចុះបញ្ជីឱ្យសហគ្រាសថ្មីៗ។ តែយ៉ាងណាថ្នាក់ដឹកនាំរូបនេះអះអាងថា ការចុះបញ្ជីរបស់សហគ្រាសមួយចំនួនហាក់មានភាពមិនប្រក្រតី ពោលគឺចុះបញ្ជីក្លែងបន្លំ ដើម្បីយកឈ្មោះធ្វើអាជីវកម្មគេចវេសពីការបង់ពន្ធ។ យ៉ាងណាក៏ដោយ ឯកឧត្តម គង់ វិបុល ជំរុញលុបបំបាត់រាល់សកម្មភាពចុះបញ្ជីក្លែងក្លាយរបស់ក្រុមហ៊ុនខ្មោចទាំងនោះ។
សម្រាប់ឯកឧត្តម គង់ វិបុល ការពង្រឹងអភិបាលកិច្ចល្អ គឺជាមូលដ្ឋានគ្រឹះដ៏សំខាន់សម្រាប់ពង្រឹងការគ្រប់គ្រងការប្រមូលចំណូលពន្ធ តែវាទាមទារឱ្យមានការចូលរួមទាំងស្ថានប័នរដ្ឋ និងសាជីវកម្មផ្ទាល់។
ជាក់ស្តែងពេលថ្មីៗនេះ អគ្គនាយកដ្ឋានពន្ធដារបានរកឃើញនូវភាពខ្វះចន្លោះជាច្រើនលើការដាក់ប្រកាសបង់ពន្ធលើប្រាក់ចំណូលប្រចាំឆ្នាំមួយចំនួន ដូច្នេះហើយ ឯកឧត្តម លើកទឹកចិត្តឱ្យម្ចាស់សហគ្រាស អាជីវកម្មទាំងអស់ ត្រូវដាក់លិខិតប្រកាសពន្ធឱ្យបានត្រឹមត្រូវ ដើម្បីចៀសវាងការធ្វើសាវនកម្ម និងត្រួតពិនិត្យណាមួយ ដែលអាចឈានឱ្យមានការផាកពិន័យផ្សេងៗ។
យ៉ាងណាមិញ ថ្នាក់ដឹកនាំរូបនេះ ក៏បានណែនាំដល់ភ្នាក់ងារ និងមន្ត្រីពន្ធដារទាំងអស់ត្រូវពង្រឹងភាពស្មោះត្រង់ និងក្រមសីលធម៌របស់ខ្លួនឱ្យបានត្រឹមត្រូវផងដែរ។
សូមជម្រាបថា នៅពីរខែដំបូងដើមឆ្នាំ២០២៤ នេះ អគ្គនាយកដ្ឋានពន្ធដារប្រមូលចំណូលបានជិត ៥៥០លានដុល្លារ ស្មើនឹងជាង១៣% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០២៤ ដែលតម្រូវឱ្យប្រមូលឱ្យបានប្រមាណ៤ពាន់១៦៤លានដុល្លារ ដែលចំនួននេះមានកំណើនជិត ២០% បើធៀបនឹងផែនការកាលពីឆ្នាំ២០២៣៕
None
