Advertisement
ការនាំចេញគ្រឿងអលង្ការ​ថៃ

ថៃ នាំចេញត្បូង និងគ្រឿងអលង្ការជាង ៧ពាន់លានដុល្លារ ក្នុងឆមាសទី ១ ដើមឆ្នាំ២០១៩


នៅក្នុងឆមាសទី ១ ដើមឆ្នាំ២០១៩នេះ ប្រទេសថៃ បានធ្វើការនាំចេញ ត្បូង និងគ្រឿងអលង្ការ សរុបជាទឹកប្រាក់ជាង ៧,២ ពាន់លានដុល្លារអាមេរិក មានកំណើន ១៥ភាគរយ ធៀបនឹងរយៈពេលដូចគ្នា កាលពីឆ្នាំមុន។ នេះបើយោងតាមការចេញផ្សាយរបស់ សារព័ត៌មានក្នុងស្រុកថៃ។
ថៃ នាំចេញត្បូង និងគ្រឿងអលង្ការជាង ៧ពាន់លានដុល្លារ ក្នុងឆមាសទី ១ ដើមឆ្នាំ២០១៩ (រូបភាព៖ Bangkok Post)
ដោយ
Advertisement

វិទ្យាស្ថានត្បូង និងគ្រឿង​អលង្ការថៃ បានធ្វើការ​បង្ហាញ​ឲ្យដឹងថា ការកើនឡើង​នៃការនាំចេញ មាស ជាង ៤០ភាគរយ ក្នុងអំឡុងពេល ៦ខែនេះ គឺជា​កត្តារុញច្រាន​ដ៏សំខាន់​នៃកំណើន​លូតលាស់​នៃ ឧស្សាហកម្ម​ត្បូង និងគ្រឿង​អលង្ការ ដោយសារតែ អ្នកនាំចេញ​មាស ឆ្លៀតឱកាស​បញ្ចេញ​លក់ក្នុង​តម្លៃថ្លៃ នៅពេលតម្លៃមាស​ទូទាំង​សកលលោក ឡើងថ្លៃ ហើយប្រជាជន ព្រួយបារម្ភ​ពីបញ្ហា​សុវត្ថិភាព។

វិទ្យាស្ថាន បានព្យាករណ៍​ទៀតថា នៅក្នុងឆមាសទី ២ ការនាំចេញ​ត្បូង និងគ្រឿង​អលង្ការ នឹងរក្សា​បាននូវកំណើន​ល្អដដែល ដោយសារតែ សង្គ្រាម​ពាណិជ្ជកម្ម អាមេរិក​ និងចិន នៅតែបន្ត ដែលធ្វើឲ្យ ផលិតផលថៃ មានឱកាស​ជំនួស​តំណែងរបស់ ផលិតផលចិនបាន។

យ៉ាងណាមិញ ការនាំចេញត្បូង និងគ្រឿង​អលង្ការ របស់ថៃ ទៅកាន់ឥណ្ឌា មានកំណើន​ខ្ពស់ជាងគេ​បំផុត​រហូតដល់ទៅ ៩៥ភាគរយ ខណៈដែល ការនាំចេញ​ទៅកាន់ វៀតណាម កើនឡើង ៥៦ភាគរយ និងនាំមក​កម្ពុជា កើនឡើង ៤៤ភាគរយ។

ទោះបីជា ការនាំចេញត្បូង និងគ្រឿងអលង្ការ ជាវិស័យ​មួយដែល​មានការកើនឡើង​ក៏ដោយ ការនាំចេញ​ជារួម របស់ប្រទេស​ថៃ អាចនឹងធ្លាក់​ចុះចន្លោះ ១.៦ភាគរយ រហូតដល់ ៣.១ភាគរយ ដោយសារតែ​ភាពតាន​តឹងនៃសង្គ្រាម​ពាណិជ្ជកម្ម អាមេរិក-ចិន នៅតែបន្ត​អូសបន្លាយ​ទៀត។

ពិតណាស់ ក្រសួងពាណិជ្ជកម្មថៃ បានបង្ហាញ​ពីតួលេខធ្លាក់ចុះ ជាប់ៗគ្នា រយៈពេល ៤ខែរួច​ទៅហើយ មកទល់ពេលនេះ ហើយក្នុងខែមិថុនា កន្លងទៅថ្មីៗនេះ ការនាំចេញ​របស់ថៃ ក៏ធ្លាក់ចុះ​ប្រមាណ ២ភាគរយ មកនៅត្រឹម​ប្រមាណ ២១ពាន់លាន​ដុល្លារ​អាមេរិក​ប៉ុណ្ណោះ។

ក្នុងខែមិថុនា ការនាំចេញ​របស់ថៃ​ទៅកាន់ទីផ្សារ​សំខាន់ៗ បន្តធ្លាក់ចុះ ដូចជា ទីផ្សារចិន ធ្លាក់ចុះ​ប្រមាណ ១៥ភាគរយ និងទីផ្សារ​អាមេរិក ធ្លាក់ចុះ ២ភាគរយ។

លោកស្រី ភីមឆាណុក វុន ករ ផុន មន្រ្តីជាន់ខ្ពស់​នៃក្រសួង​ពាណិជ្ជកម្ម​ថៃ បានឲ្យដឹងថា ការធ្លាក់ចុះ​នៃការនាំចេញនេះ គឺដោយសារតែ​សង្គ្រាមពាណិជ្ជកម្ម​សកល យ៉ាងពិតប្រាកដ ហើយវានៅជះឥទ្ធិពល​ដល់ ការនាំចេញក្នុង​ត្រីមាសទី ៣ ទៀត។

លោកស្រី បន្តថា បើសិនជា ថៃ អាចរក្សា​តួលេខនាំចេញ ក្នុងចន្លោះ ២០ ទៅ ២១ពាន់​លានដុល្លារ ក្នុងមួយខែ សម្រាប់រយៈពេល ៦ខែ ដែលនៅសល់​ក្នុងឆ្នាំនេះ នោះ ការនាំចេញ​សរុបរបស់ អាចនឹង​មានកំណើន ១ភាគរយវិញ។

ជាក់ស្តែង សង្គ្រាមពាណិជ្ជកម្ម​នាពេលនេះ កាន់តែឡើងកម្តៅ ហើយថៃ កំពុងទទួល​រងផលប៉ះពាល់​ទៅលើ ការនាំចេញ ដោយសារតែ​ប្រទេសទាំងពីរ សុទ្ធតែជា ទីផ្សារនាំ​ចេញ​ដ៏ធំបំផុត​របស់​ប្រទេសថៃ ដែលធ្វើឲ្យ ការនាំចេញ​ក្នុងរយៈពេល ៦ខែដើមឆ្នាំនេះ ធ្លាក់ចុះ ២.៩ភាគរយ មកនៅត្រឹម ១២៣ពាន់លាន​ដុល្លារប៉ុណ្ណោះ។

គួររម្លឹកបន្តិចថា រាជរដ្ឋាភិបាលថៃ បានទម្លាក់​ការព្យាករពី កំណើននៃការនាំចេញពី ៨ភាគរយ មកត្រឹម ៣ភាគរយ ក្នុងឆ្នាំ ២០១៩នេះ ដោយបន្ទោស​ទៅលើ ការថមថយចុះ​នៃសេដ្ឋកិច្ចសកល ភាពមិនច្បាស់​លាស់នៃ បញ្ហានយោបាយ​នៅក្នុង​ប៉ែកអឺរ៉ុប និងជាពិសេសគឺ សង្គ្រាម​ពាណិជ្ជកម្ម​រវាងអាមេរិក-ចិន ដែលកំពុង​តែអូសបន្លាយ​កាន់តែយូរ៕

Advertisement
© 2019 រក្សាសិទ្ធិ​គ្រប់​បែប​យ៉ាង​ដោយ ខេមបូណូមីស។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល sothea[at]cambonomist.com ឬទូរស័ព្ទលេខ​ 089 777 076។



អត្ថបទបន្ទាប់


ការវិនិយោគក្នុងវិស័យកាត់ដេរ និង ស្បែកជើង កាបូប កើនបញ្ច្រាសទិសនឹងការព្រួយបារម្ភរឿងដក EBA

ព័ត៌មាន
ការវិនិយោគនៅក្នុងវិស័យកាត់ដេរសម្លៀកបំពាក់ និង ស្បែកជើង កាបូប ដែលមានគោលដៅនាំចេញសំខាន់ទៅ សហភាពអឺរ៉ុប មិនបានបង្ហាញពីសញ្ញាថមថយចុះនោ...

កម្ពុជាសម្រេចបានទឹកប្រាក់វិនិយោគជាង ៥ពាន់លានដុល្លារ ៦ខែ ឆ្នាំ២០១៩

ព័ត៌មាន
គិតត្រឹមរយៈពេល ៦ខែ ដើមឆ្នាំ ២០១៩នេះ គម្រោងវិនិយោគដែលត្រូវបានអនុម័ត ដោយក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC គឺមានចំនួន ១៥៣គម្រោ...
ច្រើនទៀត

អត្ថបទស្រដៀង


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ