លោកស្រី ភីមឆាណុក វុន ករ ផុន អគ្គនាយករងការិយាល័យគោលនយោបាយ និងយុទ្ធសាស្រ្តពាណិជ្ជកម្មថៃបានបញ្ជាក់ថា ទាំងរាជរដ្ឋាភិបាលថៃ ក៏ដូចជាវិស័យឯកជន កំពុងឃ្លាំមើលពី បញ្ហានៃជម្លោះពាណិជ្ជកម្មរវាង មហាអំណាចសេដ្ឋកិច្ចទាំង២នេះ ហើយក៏សហការគ្នា ធ្វើការព្រាងគម្រោងជំរុញការនាំចេញ ដើម្បីដោះស្រាយបញ្ហាប្រឈមនេះ។
លោកស្រីបន្តថា ថៃ ត្រូវតែចាំមើលពីស្ថានការណ៍លំបាកនេះ ជាពិសេស មុនពេលបោះឆ្នោតជ្រើសរើសប្រធានាធិបតីអាមេរិកថ្មី ព្រោះគ្មាននរណាអាចប៉ាន់ស្មានពី ការបោះជំហានរបស់ប្រធានាធិបតីអាមេរិក លោកដូណាល់ ត្រាំបាននោះទេ ហើយអាមេរិក អាចនឹងចាត់វិធានការពិសេស យ៉ាងតិចណាស់៣វិធានការ ទៅលើប្រទេសចិន និងបណ្តាប្រទេសដទៃទៀត ដូចជា ការដំឡើងពន្ធលើការនាំចូលទំនិញជាដើម។
អត្ថបទទាក់ទង!
អនុប្រធានសភាពាណិជ្ជកម្មថៃ បានបង្ហាញក្តីរំពឹងថា ថៃអាចនឹងកែប្រែបញ្ហានេះឲ្យទៅជាឱកាស ដែលអាចកេងចំណេញបាន ជាពិសេសគឺ ឱកាសបង្ហាញខ្លួនថាជាប្រទេស ដែលអាចដើរតួជា ខ្សែច្រវាក់ផ្គត់ផ្គង់ដ៏សម្បូរបែប សម្រាប់វិស័យឧស្សាហកម្មផ្សេងៗ ដោយសារតែក្រុមហ៊ុនចិន ចាប់ផ្តើមផ្លាស់ប្តូរខ្សែច្រវាក់ផលិតកម្មរបស់ខ្លួន មកកាន់ប្រទេសថៃ និងបណ្តាប្រទេសក្នុងតំបន់ហើយ។
តួយ៉ាង បន្ទាប់ពីអាមេរិកចោទប្រកាន់ថា ចិនជាអ្នកបង្កឲ្យមាន ការផ្ទុះរីករាលដាលនៃមេរោគកូវីដ-១៩នោះ ប្រទេសចិន ត្រូវបង្ខំចិត្តស្វែងរកដៃគូពាណិជ្ជកម្ម នៅក្នុងប្រទេសក្បែរខាង ដើម្បីទិញយកផលិតផលកសិកម្ម ក្នុងនោះ ថៃក៏បាននាំចេញទុរេនទៅកាន់ចិនផងដែរ។
គួរជម្រាបដែរថា ជុំវិញបញ្ហាជម្លោះពាណិជ្ជកម្មសកល លោក ដូណាល់ ត្រាំ បានគំរាមដំឡើងពន្ធថ្មី បន្ថែមទៀតទៅលើ ទំនិញចិន ដោយចាត់ទុកជា ការសងសឹកចំពោះការរីករាលដាលនៃ មេរោគកូវីដ-១៩ ដែលអាមេរិកចោទថា ផ្ទុះសាយភាយចេញមកពីមន្ទីរពិសោធន៍របស់ប្រទេសចិន តែ ចិន បដិសេធចំពោះការចោទប្រកាន់នេះ យ៉ាងណាក៏ដោយ កាលពីពេលថ្មីៗនេះ ប្រទេសចិន ក៏បានដាក់ចេញនូវ ការលើកលែងពន្ធថ្មីមួយ សម្រាប់ទំនិញនាំចូលមកពី អាមេរិក ចំនួន ៧៩មុខ សម្រាប់រយៈពេល ១ឆ្នាំពេញផងដែរ៕
None
