ក្នុងរយៈពេល ៦ខែ ដើមឆ្នាំ ២០២០នេះ ប្រទេសថៃ បានធ្វើការនាំចេញសាច់មាន់ជាង ៤៧ម៉ឺនតោន កើនឡើង ២% ធៀបនឹងពេលដូចគ្នាកាលពីឆ្នាំមុន ហើយការនាំចេញនេះ សរុបជាទឹកប្រាក់បានប្រមាណ ១,៧ ពាន់លានដុល្លារអាមេរិក។
ប្រធានសមាគមអ្នកកែច្នៃ និងនាំចេញសត្វមាន់ថៃ បានបញ្ជាក់ថា ដោយសារតែវិបត្តិកូវីដ-១៩ បានធ្វើឲ្យ ទីផ្សារសាច់មាន់សំខាន់ៗរបស់ថៃ បានកាត់បន្ថយការនាំចូល ជាពិសេសទីផ្សារអឺរ៉ុប និងជប៉ុន។
អំឡុងពេល ៦ខែនេះ ការនាំចេញមាន់ទៅកាន់អឺរ៉ុបធ្លាក់ចុះ១០% ខណៈក្តីរំពឹងនាំចេញមាន់ ៣៣ម៉ឺនតោន ទៅកាន់ទីផ្សារអឺរ៉ុបក្នុងឆ្នាំនេះត្រូវកាត់បន្ថយមកនៅត្រឹម ២៨ម៉ឺនតោនប៉ុណ្ណោះ។
អត្ថបទទាក់ទង!
លើសពីនេះ ការនាំចេញទៅកាន់ទីផ្សារជប៉ុន កើនឡើងតែ២% ទាបជាងការព្យាករ ដោយសារតែ បញ្ហាមេរោគ បានវាយប្រហារដល់វិស័យទេសចរណ៍នៅក្នុងប្រទេសជប៉ុន និងបណ្តាលឲ្យមានការពន្យារពេល ប្រកួតកីឡាអូឡាំពិក នៅក្នុងទីក្រុងតូក្យូ ដូច្នេះហើយតម្រូវការមាន់មានការថមថយចុះដូចគ្នា។
ទោះបីជាថៃនៅមានទីផ្សារចិន និងសិង្ហបុរី ដែលមានកំណើននាំចេញក្នុងរយៈពេល ៦ខែនេះ ក៏ប៉ុន្តែ ចិន ត្រូវការតែស្លាបមាន់ និងជើងមាន់ប៉ុណ្ណោះ ហើយមិនអាចនាំចេញ ទ្រូងមាន់ទៅកាន់ទីផ្សារអឺរ៉ុបថែមទៀត ជាហេតុបណ្តាលឲ្យតម្លៃសាច់មាន់ធ្លាក់ចុះទាប។
ជាចុងក្រោយ តាមការប៉ាន់ស្មានរបស់ប្រធានសមាគម ស្ថានការណ៍មេរោគកូវីដ-១៩ នៅក្នុងឆមាសទី ២នេះ ទំនងជាមិនធូរស្បើយនោះទេ ជាពិសេសនៅតំបន់អឺរ៉ុប ដូច្នេះហើយ សមាគម ព្យាយាមស្វែងរកទីផ្សារប្រទេសជិតខាង ដែលអាចនឹងមានតម្រូវការសាច់មាន់ពីព្រោះតម្លៃសាច់ជ្រូក កំពុងតែកើនឡើងថ្លៃ។
គួររម្លឹកបន្តិចថា តាមការព្យាកររបស់សាកលវិទ្យាល័យសភាពាណិជ្ជកម្មថៃ បានគូសបញ្ជាក់ថា ការនាំចេញទំនិញរបស់ប្រទេសថៃទំនងជាអាចធ្លាក់ចុះដល់ ១៣,៥% នៅក្នុងឆ្នាំ ២០២០ ដែលជាកត្តាអាក្រក់បំផុតនៅក្នុងរយៈពេល ១០ឆ្នាំចុងក្រោយនេះ បើសិនជាមិនមានវ៉ាក់សាំងសម្រាប់មេរោគកូវីដ-១៩ ត្រូវបានរកឃើញនៅក្នុងឆ្នាំនេះទេ៕
None
