បើយោងតាម សារព័ត៌មាន Bangkok Post ចេញផ្សាយនៅក្នុងថ្ងៃនេះថា តាមការគូសបញ្ជាក់របស់ក្រសួងពាណិជ្ជកម្មថៃ ការផលិតម៉ាស់នៅទូទាំងប្រទេសថៃ សម្រេចបានជាង ៤លាន ២សែនម៉ាស់ ក្នុងមួយថ្ងៃ ហើយក្នុងនោះ គឺមានជាង ១លាន ២សែនម៉ាស់ លើសពីតម្រូវការ។
បច្ចុប្បន្ននេះ រោងចក្រចំនួន ១៦ មានលក្ខណៈសម្បត្តិគ្រប់គ្រាន់ ក្នុងការផ្គត់ផ្គង់ម៉ាស់ដល់ រាជរដ្ឋាភិបាលថៃ ៣លានម៉ាស់ក្នុងមួយថ្ងៃ ដោយបែងចែក ១លាន ៨សែនម៉ាស់ ទៅកាន់ក្រសួងសុខាភិបាល និង ១លាន ២សែនម៉ាស់ទៀត ទៅកាន់ក្រសួងមហាផ្ទៃ។
ទោះយ៉ាងក៏ដោយ ថៃ មិនបានបញ្ចេញលក់ម៉ាស់ដែលលើស ទៅកាន់ទីផ្សារក្រៅប្រទេសនោះទេ ហើយថៃ នៅតែរឹតបន្តឹងលើការនាំចេញម៉ាស់ ដោយពន្យារពេលនៃការហាមឃាត់ការនាំចេញម៉ាស់ រហូតដល់ខែកុម្ភៈ ឆ្នាំ ២០២១ខាងមុខ។
អត្ថបទទាក់ទង!
ដោយឡែក ចំពោះប្រទេសចិន ដែលជាអ្នកផ្គត់ផ្គង់ម៉ាស់ធំជាងគេបំផុតនៅលើសកលលោក បានចាប់ផ្តើមនាំចេញម៉ាស់ទៅក្រៅប្រទេសវិញ បន្ទាប់ពីការហាមឃាត់ក្នុងមួយរយៈពេលខ្លី ដើម្បីធានាឲ្យបាននូវ ការផ្គត់ផ្គង់ម៉ាស់ក្នុងស្រុក។
បើតាមរបាយការណ៍ពី ក្រសួងពាណិជ្ជកម្មថៃ បានបង្ហាញថា តម្រូវការប្រើប្រាស់ម៉ាស់ក្នុងស្រុកថៃ បានកើនឡើងដល់ ៥០លានម៉ាស់ក្នុងមួយខែ បន្ទាប់ពីមានការផ្ទុះឡើងនៃមេរោគកូវីដ-១៩ ខណៈពីមុន ការប្រើប្រាស់ម៉ាស់ជាធម្មតា គឺមានជាង ៣០លានម៉ាស់ក្នុងមួយខែ។
គួរជម្រាបដែរថា កាលពីឆ្នាំ ២០១៩កន្លងទៅ ថៃ នាំចេញម៉ាស់សរុបជាង ២២៦លានម៉ាស់ ដែលកើនឡើង ២១៨% ធៀបនឹងឆ្នាំ ២០១៨៕
None
