ថៃ កំពុងជួបបញ្ហាតម្លៃសម្ភារសំណង់កើនឡើង ចុះតម្លៃសម្ភារសំណង់នៅកម្ពុជាវិញយ៉ាងម៉េចដែរ?

លោក ឃូ សុខឡៃ អ្នកគ្រប់គ្រងទូទៅរបស់ក្រុមហ៊ុនពិស្ណុការ ដែលជាក្រុមហ៊ុនម៉ៅការសំណង់ដ៏ធំមួយនៅកម្ពុជា បានកត់សម្គាល់ឃើញថា តម្លៃសម្ភារសំណង់មួយចំនួននៅកម្ពុជា ហាក់មានការកើនឡើងតិចតួចផងដែរនៅមួយសប្តាហ៍ចុងក្រោយនេះ ជាក់ស្តែងដូចជាលើប្រភេទបេតុង និងស៊ីម៉ងត៍ជាដើម ដោយបច្ចុប្បន្នបេតុង១គូប បានកើនឡើងតម្លៃប្រមាណ១ដុល្លារ ខណៈស៊ីម៉ងត៍១តោន បានកើនឡើងតម្លៃចន្លោះពី៣ ទៅ៦ដុល្លារ។ ដោយឡែកសម្រាប់តម្លៃដែកវិញ អ្នកជំនាញរូបនេះវាយតម្លៃថា គឺមិនមានការប្រែប្រួលនោះទេ។ លោក ឃូ សុខឡៃ បានវាយតម្លៃថា ការកើនឡើងសម្ភារសំណង់មួយចំនួននាពេលនេះ អាចបណ្តាលមកពីឥទ្ធិពលនៃការឡើងថ្លៃសម្ភារសំណង់នៅប្រទេសថៃ។

ជាមួយគ្នានេះ លោក សេង សុភ័ក្រ អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងលោក ប៉ូ អ៊ាវគង់ អគ្គនាយកក្រុមហ៊ុនអ៊ែតវ៉ានស៍ រៀលអ៊ីស្ទេត បានវាយតម្លៃថា តាមរយៈការកើនឡើងនូវតម្លៃសម្ភារសំណង់នៅទីផ្សារប្រទេសក្បែរខាងកម្ពុជា នេះ ចង់ ឬមិនចង់វានឹងជំរុញឱ្យតម្លៃសម្ភារសំណង់នៅកម្ពុជា មានការកើនឡើងដូចគ្នាដែរ ដ្បិតថា កម្ពុជា បាននាំចូលសម្ភារសំណង់មួយចំនួនពីប្រទេសថៃ ផងដែរ។ ក្រុមអ្នកជំនាញបានវាយតម្លៃថា កាលណាតម្លៃសម្ភារសំណង់នៅកម្ពុជា កើនឡើងនោះ វាអាចនឹងជះទាំងផលវិជ្ជមាន និងអវិជ្ជមានសម្រាប់វិស័យសំណង់នៅកម្ពុជា ពោលគឺកាលណាតម្លៃកើនឡើង តម្រូវការនឹងកើនឡើងដែលជំរុញឱ្យវិស័យនេះមានសម្ទុះកម្រើកឡើងវិញ ក៏ប៉ុន្តែវាអាចប៉ះពាល់ទៅដល់ការចំណាយថ្លៃដើមមួយចំនួននៅក្នុងវិស័យសំណង់ផងដែរ។

គួរជម្រាបថា នៅពេញមួយឆ្នាំ២០២៤ កន្លងទៅ ការនាំចូលដែក និងដែកថែប ដើម្បីបម្រើដល់ការសាងសង់របស់កម្ពុជា មានទំហំទឹកប្រាក់ប្រមាណជាង៨៤២លានដុល្លារ កើនឡើងប្រមាណជាង៦៨% បើធៀបនឹងឆ្នាំ២០២៣ ខណៈការនាំចូលស៊ីម៉ង់ត៍មានទំហំទឹកប្រាក់ប្រមាណជាង១៦លានដុល្លារ ថយចុះប្រមាណជាង១៦%។ នេះបើយោងតាមរបាយការណ៍របស់ក្រសួងពាណិជ្ជកម្មកម្ពុជា៕

​ អត្ថបទ សោម ស្រីពេជ្រ​