ភ្ញៀវបរទេសម្នាក់ៗដែលចូលមកដើរកម្សាន្តនៅប្រទេសថៃតាមផ្លូវអាកាសនឹងត្រូវគិតប្រាក់៣០០បាតបន្ថែម ឬស្មើនឹងជិត៩ដុល្លារ ចំណែកអ្នកដែលមកតាមផ្លូវគោក និងផ្លូវទឹកនឹងត្រូវបង់ប្រាក់បន្ថែម ១៥០បាត ឬស្មើនឹងជាង៤ដុល្លារ។ ប៉ុន្តែការបង់ថ្លៃសេវាបន្ថែមនេះត្រូវបានលើកលែងចំពោះអ្នកដំណើរដែលគ្រាន់តែឆ្លងកាត់ ឬចុះចតក្នុងប្រទេសថៃ មុននឹងត្រូវផ្តូរជើងយន្តហោះទៅគោលដៅបន្ត។ ដោយឡែក ទារកដែលមានអាយុក្រោម២ឆ្នាំ ក៏មិនតម្រូវឱ្យបង់ប្រាក់សេវាបន្ថែមដែរ។
ទោះយ៉ាងណា ការគិតប្រាក់បន្ថែមសម្រាប់ទេសចរបរទេសនេះ នឹងមិនប៉ះពាល់ដល់ជនបរទេសដែលកាន់កាប់បណ្ណការងារក្នុងប្រទេសថៃ ឬអ្នកធ្វើដំណើរដែលមានលិខិតឆ្លងដែនការទូត និងលិខិតឆ្លងដែនផ្លូវការនោះទេ។
លោក ភីផាត រ៉ាឆាគីតប្រាកាន់(Phiphat Ratchakitprakarn) រដ្ឋមន្ត្រីក្រសួងទេសចរណ៍ និងកីឡារបស់ថៃ បានប្រកាសថា គណៈរដ្ឋមន្ត្រីបានចុះហត្ថលេខាអនុម័តការយកប្រាក់សេវាបន្ថែម នេះកាលពីថ្ងៃអង្គារទី១៤ខែកុម្ភៈ។ គេប៉ាន់ប្រមាណថា ការប្រមូលប្រាក់ពីថ្លៃសេវានេះ នឹងមានចំនួនជាង ១០០លានដុល្លារនៅឆ្នាំ២០២៣នេះ។
យ៉ាងណាមិញ កញ្ចប់ថវិកាដែលប្រមូលបាននេះ នឹងត្រូវយកទៅប្រើប្រាស់ជាការធានារ៉ាប់រងគ្រោះថ្នាក់សម្រាប់ភ្ញៀវទេសចរ នៅមន្ទីរពេទ្យរដ្ឋ។ បើតាមមន្ត្រីជាន់ខ្ពស់រូបនេះ រដ្ឋាភិបាលក្រុងបាងកកបានចំណាយប្រាក់អស់ចន្លោះពី៩លានទៅជិត១២លានដុល្លារគិតពីឆ្នាំ ២០១៧ ដល់ឆ្នាំ២០១៩ សម្រាប់ផ្គត់ផ្គង់ដល់មន្ទីរពេទ្យរដ្ឋ លើគ្រោះថ្នាក់របស់ភ្ញៀវ ដែលមកលេងប្រទេសខ្លួន។ ថ្លៃសេវានេះក៏នឹងត្រូវបានប្រើប្រាស់ ជួយដល់ការបញ្ជូនអ្នកដំណើរបរទេសទៅប្រទេសរបស់គេវិញ ក្នុងករណីដែលគេបានស្លាប់នៅក្នុងប្រទេសថៃផងដែរ។
អត្ថបទគួរអាន
សូមជម្រាបថា កាលពីឆ្នាំ២០២២ ប្រទេសថៃបានទម្លាក់ចោលលក្ខខណ្ឌតម្រូវការធានារ៉ាប់រងផ្នែកវេជ្ជសាស្រ្ដ ដែលមានតម្លៃធានាយ៉ាងហោចណាស់ស្មើនឹង១ម៉ឺនដុល្លារ ដោយសារតែស្ថានការណ៍កូវីដ១៩បានប្រសើឡើងវិញ។ រដ្ឋាភិបាលទីក្រុងបាងកក មានគោលបំណងស្វាគមន៍ភ្ញៀវទេសចរចំនួន ២៥ លាននាក់នៅឆ្នាំ២០២៣នេះ ដែលចំនួននេះមានត្រឹមតែជាងពាក់កណ្តាលនៃចំនួនសរុបនៃភ្ញៀវដែលធ្លាប់ចូលមកកាលពីឆ្នាំ២០១៩ ប៉ុន្តែច្រើនជាងពីរដងនៃចំនួនភ្ញៀវទេសចរកាលពីឆ្នាំ២០២២ ដែលមានតែត្រឹម ១១លាននាក់ប៉ុណ្ណោះ។
គួរបញ្ជាក់ថា ការយកថ្លៃបន្ថែមពីអ្នកដំណើរនេះ គឺដាច់ដោយឡែកពីពន្ធដែលត្រូវបានរួមបញ្ចូលស្រាប់ក្នុងតម្លៃសំបុត្រយន្តហោះ ដែលគេធ្លាប់ធ្វើអស់ជាច្រើនទសវត្សរ៍មកហើយ។
សូមជម្រាបថា ផែនការថ្មីនេះទទួលបានការឆ្លើយតបចម្រុះពីសំណាក់អ្នកនៅក្នុងវិស័យឧស្សាហកម្មទេសចរណ៍របស់ប្រទេសថៃ។ ជាក់ស្ដែង មតិមួយចំនួនបារម្ភថា ការចំណាយបន្ថែមនេះ នឹងបង្វែរចំណាប់អារម្មណ៍ភ្ញៀវទេសចរចេញពីប្រទេសថៃ។ ដោយឡែក មតិផ្សេងទៀតមើលឃើញថាវាជាឱកាសល្អមួយ ដើម្បីផ្តល់មូលនិធិដល់កំណើនសេដ្ឋកិច្ចប្រកបដោយនិរន្តរភាពនៅក្នុងវិស័យទេសចរណ៍។ ចាប់តាំងពីមានជំងឺរាតត្បាតមក អាជ្ញាធរទេសចរណ៍នៃប្រទេសថៃបានផ្លាស់ប្តូរពីការដែលគ្រាន់តែបង្កើនចំនួនភ្ញៀវទេសចរ ទៅជាការទាក់ទាញភ្ញៀវទេសចរណា ដែលស្នាក់នៅរយៈពេលយូរ និងមានចំណាយខ្ពស់វិញ៕
