ថៃ ចាប់ផ្ដើមយុទ្ធនាការថ្មី ដើម្បីទាក់ទាញបណ្ដាក្រុមហ៊ុនអាកាសចរណ៍ឱ្យហោះហើរចូលទៅកាន់បណ្ដាក្រុងតូចៗ

ក្រុមហ៊ុនអាកាសចរណ៍រហូតដល់ទៅ៣០ បានចុះឈ្មោះចូលរួមក្នុងយុទ្ធនាការថ្មីមានឈ្មោះថា “អាកាសចរណ៍ដ៏អស្ចារ្យរបស់ថៃ” ឬ Air-mazing Thailand រយៈពេល៤ថ្ងៃរបស់អាជ្ញាធរទេសចរណ៍ថៃ (TAT) ដើម្បីស្វែងយល់ពីសក្តានុពលនៃបណ្ដាអាកាសយានដ្ឋានដែលត្រូវបានជ្រើសរើស និងទីផ្សារដែលមិនទាន់បានប្រើប្រាស់នៅក្នុងប្រទេសនេះ។

លោកស្រី ស៊ូដាវ៉ាន់ វ៉ាងស៊ូផាគិចកុសល (Sudawan Wangsuphakijkosol) រដ្ឋមន្ត្រីក្រសួងទេសចរណ៍ និងកីឡាថៃ បានថ្លែងថា យុទ្ធនាការដែលនឹងប្រព្រឹត្តទៅចាប់ពីថ្ងៃទី២ ដល់ថ្ងៃទី៥ ខែមេសា នេះនឹងបំពេញបន្ថែមពីលើគោលនយោបាយរបស់រដ្ឋាភិបាលក្នុងការលើកកម្ពស់ទេសចរណ៍ក្នុងបណ្ដាខេត្តលំដាប់ទី២ និងប្រែក្លាយប្រទេសថៃ ទៅជាមជ្ឈមណ្ឌលទេសចរណ៍ពិភពលោក។

លោកស្រីសង្ឃឹមថា បណ្ដាក្រុមហ៊ុនអាកាសចរណ៍អន្តរជាតិនឹងមើលឃើញសក្តានុពលពិតប្រាកដនៃបណ្ដាអាកាសយានដ្ឋានរបស់ប្រទេសថៃ ក្នុងយុគសម័យក្រោយវិបត្តិកូវីដ-១៩ និងពិចារណាការបើកផ្លូវហោះហើរបន្ថែមទៀតទៅកាន់ប្រទេសថៃ ដោយគ្របដណ្តប់ទាំងខេត្តលំដាប់ទី១ និងខេត្តលំដាប់ទី២។

លោកស្រីបន្ថែមថា អាកាសយានដ្ឋានធំៗទាំង៣ គឺអាកាសយានដ្ឋានសុវណ្ណភូមិ អាកាសយានដ្ឋាន ដនមឿង និងអាកាសយានដ្ឋានភូកេត ពេញដោយអ្នកដំណើរ និងជើងហោះហើរ ដូច្នេះក្រសួងមានបំណងបែងចែកភ្ញៀវទេសចរអន្តរជាតិ ​​ពីអាកាសយានដ្ឋានទាំងនេះ ដែលនឹងនាំប្រាក់ចំណូលពីវិស័យទេសចរណ៍ទៅកាន់ខេត្តផ្សេងៗទៀត ក៏ដូចជាកាត់បន្ថយការកកស្ទះនៅតាមអាកាសយានដ្ឋានក្នុងទីក្រុងធំៗ។

ក្រោមយុទ្ធនាការនេះ អាជ្ញាធរទេសចរណ៍ថៃ (TAT) នឹងនាំតំណាងក្រុមហ៊ុនអាកាសចរណ៍ធ្វើដំណើរទស្សនកិច្ច២លើកផ្សេងគ្នា ដើម្បីទៅពិនិត្យមើលស្ថានភាពអាកាសយានដ្ឋានអន្តរជាតិឈាងម៉ៃ និងអាកាសយានដ្ឋានអន្តរជាតិយូ-ថាប៉ាវ (U-Tapao) ខណៈដំណើរទស្សនកិច្ចលើកទី២ នឹងផ្ដោតលើខេត្តក្រាប៊ី (Krabi) ខេត្តស៊ូរ៉ាត ថានី (Surat Thani) និងកោះសាមួយ (Samui)។ បច្ចុប្បន្នប្រទេសថៃ មានអាកាសយានដ្ឋានចំនួន៣៩ ដោយក្នុងនោះមានអាកាសយានដ្ឋានអន្តរជាតិ​​ ចំនួន១០៕

ដោយ: តែម សុខុម