ទោះបីជាបែបនេះក្តី អត្រាអ្នកមិនទៅបោះឆ្នោត មានដល់ទៅប្រមាណ ២៨%ឯណោះ នៃចំនួនពលរដ្ឋបារាំង ដែលមានក្នុងបញ្ជីឈ្មោះបោះឆ្នោត សរុបប្រមាណ៤៩លាននាក់។ ចំនួននេះស្មើនឹង ប្រជាជនបារាំងប្រមាណ១៤លាននាក់ ដែលបានបដិសេធជ្រើសរើសរវាងទាំងលោកម៉ាក្រុង និងលោកស្រី ឡឺផេន។ នេះបើផ្អែកទៅតាមការចុះផ្សាយដោយសារព័ត៌មានអន្តរជាតិធំៗជាច្រើន។
ស្ថិតនៅទីលានខាងក្រោម ប៉មទួអេហ្វែល ដ៏ល្បីល្បាញចំកណ្តាលទីក្រុងប៉ារីស លោកប្រធានាធិបតី អេម៉ានូអែល ម៉ាក្រុង បានរៀបចំពិធីជួបជុំជាមួយអ្នកគាំទ្រទាំងអស់ ដើម្បីអបអរជ័យជំនះរបស់លោក ក្នុងការជាប់ឆ្នោតជាប្រធានាធិបតីសម្រាប់អាណត្តិរយៈពេល៥ឆ្នាំទៀត។ ទោះបីជាលោកម៉ាក្រុងយកឈ្នះលោកស្រីឡឺផេនក្នុងសម្លេងជាង៥៨%ទល់នឹងជាង៤១%ក្តី ខណៈពលរដ្ឋ១៤លាននាក់ទៀតមិនទៅបោះឆ្នោតក៏ដោយ តែប្រធានាធិបតីរូបនេះ បានថ្លែងសុន្ទរកថា ថាលោកនឹងបម្រើប្រជាពលរដ្ឋបារាំងទាំងអស់ ដោយមិនបោះទុកនរណាម្នាក់ចោលឡើយ។
អត្ថបទគួរអាន
យ៉ាងណាក៏ដោយ អ្នកវិភាគនយោបាយមួយចំនួន លើកឡើងថា ជ័យជំនះរបស់លោកម៉ាក្រុង នឹងឈានទៅពុះហែកសង្គមបារាំង ដែលបានបែកបាក់ស្រាប់ហើយនោះ ឲ្យកាន់តែប្រេះឆាថែមមួយកម្រិតទៀត។ គួរជម្រាបថា បរិបទនយោបាយបារាំង ប្រកបដោយភាពតានតឹង និងការបែងចែក បែកបាក់គ្នាក្នុងសង្គម ដែលតម្រូវឲ្យលោកម៉ាក្រុង ត្រូវតែរកយុទ្ធសាស្ត្រដឹកនាំប្រទេស កសាងឯកភាពសាមគ្គីជាតិឡើងវិញ។ នេះបើតាមការចុះផ្សាយដោយសារព័ត៌មានBBC។
ជាក់ស្តែង នៅចំពោះមុខអ្នកគាំទ្រជាច្រើន លោកប្រធានាធិបតីម៉ាក្រុង បានសន្យាថា ក្នុងអាណត្តិថ្មីរបស់លោក នឹងគឺជាយុគសម័យថ្មី ដែលលោកនឹងផ្លាស់ប្តូររបៀបដឹកនាំប្រទេស បង្រួបបង្រួមសង្គមបារាំងឡើងវិញ ធ្វើឲ្យបារាំង និងសហភាពអឺរ៉ុបខ្លាំងក្លាជាងមុន។
ដោយឡែក ជ័យជំនះរបស់លោកត្រូវបានស្វាគមន៍ដោយមេដឹកនាំអឺរ៉ុបភ្លាមៗ ដែលពួកគេហាក់បង្ហាញភាពធូរស្រាលក្នុងចិត្ត ដែលលោកម៉ាក្រុងនៅបន្តដឹកនាំប្រទេសបារាំង ជាជាងលោកស្រីឡឺផេន ដែលជាបេក្ខជនស្តាំនិយម មានទំនោរទៅរករុស្ស៊ី ហើយថែមទាំងមានគោលនយោបាយប្រឆាំងសហភាពអឺរ៉ុបថែមទៀត។
ប្រធានគណៈកម្មការអឺរ៉ុប អ៊ូស៊ូឡា វុនឌឺលីយេន(Ursula von der Leyen) បានសរសេរនៅលើគណី Twitter របស់លោកស្រីថា «យើងនឹងរួមគ្នា យើងនឹងជំរុញប្រទេសបារាំង និងអឺរ៉ុបឆ្ពោះទៅមុខ។»
ចំណែកប្រធានាធិបតីអ៊ុយក្រែនលោកហ្សេលេនស្គី បានសរសេរនៅលើ Twitter អបអរសាទរ ដោយហៅលោកម៉ាក្រុងថា ជាមិត្តពិតប្រាកដរបស់លោក ហើយបានបន្តថា លោកទន្ទឹងរង់ចាំការរួបរួមដ៏រឹងមាំរបស់អឺរ៉ុប។ រីឯនាយករដ្ឋមន្ត្រីអង់គ្លេសវិញ ទោះបីជាបានចាកចេញពីសហភាពអឺរ៉ុបហើយក្តី លោក ប៉ូរីស ចនសុន(Boris Johnson) ក៏បានស្វាគមន៍ជ័យជម្នះរបស់លោកម៉ាក្រុងផងដែរ។
សូមជម្រាបថា ភ្លាមៗក្រោយចេញលទ្ធផលបោះឆ្នោត លោកស្រី ម៉ារីន ឡឺផេន ក៏បានទទួលស្គាល់បរាជ័យរបស់ខ្លួនផងដែរ ប៉ុន្តែលោកស្រី អះអាងថា នឹងនៅតែបន្តខំប្រឹងស្វែងរកជ័យជំនះ នៅក្នុងការបោះឆ្នោតសភាបារាំង ក្នុងខែមិថុនាខាងមុខនេះឲ្យបាន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
