នៅថ្ងៃទី១៧ ខែតុលា ឆ្នាំ២០២២ ឯកឧត្តម ឌិត ទីណា ត្រូវបានចូលកាន់តំណែងជារដ្ឋមន្រ្តីនៃក្រសួងកសិកម្ម រុក្ខាប្រមាញ់និងនេសាទ ជាផ្លូវការ ជំនួសឯកឧត្តម វេង សាខុន ដែលមានការអញ្ជើញចូលរួមជាអធិបតីរបស់ឯកឧត្តមអគ្គបណ្ឌិសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្រ្តី រដ្ឋមន្រ្តីនៃក្រសួងសេដ្ឋកិច្ច និងហិរញ្ញវត្ថុ។
ឯកឧត្តម អូន ព័ន្ធមុន្នីរ័ត្ន បានចាត់ទុកបញ្ហាជំនន់ទឹកភ្លៀង គឺជាការងារដំបូងសម្រាប់រដ្ឋមន្រ្តីកសិកម្មថ្មី ក្នុងការដោះស្រាយជូនប្រជាពលរដ្ឋ ខណៈក្នុងវិស័យកសិកម្មកម្ពុជា នៅមានបញ្ហាជាច្រើនផ្សេងទៀត ដែលរដ្ឋមន្ត្រីកសិកម្មថ្មីត្រូវដោះស្រាយ។
ថ្លែងនាពិធីផ្ទេរតំណែងរដ្ឋមន្រ្តីកសិកម្ម រុក្ខាប្រមាញ់និងសាទ នៅថ្ងៃទី១៧ ខែតុលា ឆ្នាំ២០២២ ឯកឧត្តមអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្រ្តី រដ្ឋមន្រ្តីនៃក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ថា រាជរដ្ឋាភិបាលកម្ពុជា នៅតែចាត់ទុកវិស័យកសិកម្ម ជាវិស័យអាទិភាព ទាំងនៅលើទិដ្ឋភាពសន្តិសុខស្បៀង,ការរក្សាលំនឹងជីវភាពនៅរស់របស់ប្រជាពលរដ្ឋក្នុងពេលមានវិបត្តិ,ការបង្កើតការងារ និងចូលរួមក្នុងការជំរុញកំណើនសេដ្ឋកិច្ចជាតិ។ យ៉ាងណាមិញ ទន្ទឹមនឹងការរីកចម្រើនគួរឲ្យកត់សម្គាល់ វិស័យកសិកម្មកម្ពុជា នៅមានបញ្ហាប្រឈមជាច្រើន ដូចជា កំណើនផលិតភាពកសិកម្មនៅមានកម្រិត,កង្វះហេដ្ឋារចនាសម្ព័ន្ធគាំទ្រក្រោយពេលប្រមូលផល,កង្វះការកៃច្នៃផលិតផលកសិកម្ម,ការនាំចេញផលិតផលកសិកម្មភាគច្រើនទៅកាន់ទីផ្សារមានលក្ខណៈក្រៅផ្លូវការ និងកង្វះការសម្របសម្រួលស្ថាប័ន។ ឯកឧត្តម អូន ព័ន្ធមុន្នីរ័ត្ន បានចាត់ទុកបញ្ហាជំនន់ទឹកភ្លៀង គឺជាបេសកកម្មដំបូងសម្រាប់រដ្ឋមន្រ្តីកសិកម្មថ្មី ក្រៅពីបញ្ហាជាច្រើនដែលបាននិងកំពុងកើតមានក្នុងវិស័យកសិកម្ម ដោយរដ្ឋមន្រ្តីក្រសួងសេដ្ឋកិច្ចបានគូសបញ្ជាក់ថា អំឡុងនៃការផ្ទេរតំណែងរដ្ឋមន្រ្តីកសិកម្មនេះដែរ វិស័យកសិកម្ម បានរងផលប៉ះពាល់យ៉ាងខ្លាំងដោយសារជំនន់ទឹកភ្លៀងស្ទើតែទូទាំងប្រទេស។
អត្ថបទគួរអាន
បើតាមឯកឧត្តម អូន ព័ន្ធមុន្នីរ័ត្ន ទឹកជំនន់ឆ្នាំ២០២២នេះ មានរយៈពេលអូសបន្លាយយូរជាងឆ្នាំកន្លង ដែលជាហេតុធ្វើឲ្យមានផលប៉ះពាល់ច្រើនដល់កសិផលរបស់ប្រជាពលរដ្ឋ ដោយឯកឧត្តមបន្តថា ផ្អែកតាមការវាយតម្លៃបឋម គិតត្រឹមថ្ងៃទី១២ ខែតុលា ឆ្នាំ២០២២ ដាំណាំស្រូវប្រជាពលរដ្ឋដែលរងផលប៉ះពាល់សរុបប្រមាណជាង ២០ម៉ឺន៦ពាន់ហិកតា ខណៈផ្ទៃដីដំណាំស្រូវដែលរងការខូចខាតមានជាង ៨ម៉ឺន៥ពាន់ហិកតា។ ឆ្លៀតក្នុងឱកាសនោះ ឯកឧត្តម អូន ព័ន្ធមុន្នីរ័ត្ន ឧបនាយករដ្ឋមន្រ្តី រដ្ឋមន្រ្តីនៃក្រសួងសេដ្ឋកិច្ច និងហិរញ្ញវត្ថុ ក៏បានស្នើទៅឯកឧត្តម ឌិត ទីណា និងមន្រ្តីគ្រប់លំដាប់ថ្នាក់នៃក្រសួងកសិកម្ម រុក្ខាប្រមាញ់និងនេសាទ ចាត់ទុកការងារដោះស្រយផលប៉ះពាល់ពីទឹកជំនន់នេះ ជាការងារអាទិភាពទីមួយ។
ជាការឆ្លើយតប នាពិធីផ្ទេរតំណែងរដ្ឋមន្រ្តីកសិកម្ម រុក្ខាប្រមាញ់និងសាទ នៅថ្ងៃទី១៧ ខែតុលា ឯកឧត្តម ឌិត ទីណា គូសបញ្ជាក់ថា ដ្បិតលោកមិនមានបទពិសោធន៍ការងារក្នុងវិស័យកសិកម្ម តែលោកមានការប្ដេជ្ញាថា នឹងស្វែងយល់ពីបញ្ហារបស់ប្រជាកសិករ និងធុរជន ដែលកើតមាន ក៏ដូចជា ពង្រីកទីផ្សារ បង្កើនការផ្ដល់បច្ចេកទេស បង្កើនកិច្ចសហការជាមួយដៃគូ ពិសេសលោកនឹងពិនិត្យមើលផលប៉ះពាល់របស់កសិករ ដោយសារជំនន់ទឹកភ្លៀង ដែលបាននិងកំពុងកើតមាន នៅតាមបណ្ដាខេត្តនានា ដែលធ្វើឲ្យដំណាំស្រូវរបស់បងប្អូនប្រជាកសិកររងការខូចខាតជាច្រើនហិកតា។
ជុំវិញបញ្ហានេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានចាត់ទុកការជួយពលរដ្ឋពិសេសកសិករដែលរងគ្រោះដោយសារទឹកជំនន់ ជាការងារអាទិភាពមួយដែលរាជរដ្ឋាភិបាល ត្រូវដោះស្រាយជាបន្ទាន់ ដោយសម្ដេចបានបញ្ជាក់បន្ថែមនៅថ្ងៃទី១៨ ខែតុលាថា បន្ទាប់ពីសម្ដេចទទួលប្រធានាធិបតីទីម៉ឡេស នៅថ្ងៃទី២០ ខែតុលា សម្ដេចនឹងធ្វើដំណើរទៅកាន់ខេត្តចំនួន៤ ដូចជា ខេត្តសៀមរាប ខេត្តបន្ទាយមានជ័យ ខេត្តបាត់ដំបង និងខេត្តពោធិ៍សាត់ ដោយប្រើពេល៥ថ្ងៃ៤យប់ ដើម្បីជួបនិងដោះស្រាយបញ្ហាជូនប្រជាជនដែលរងគ្រោះដោយជំនន់ទឹកភ្លៀង។ សម្ដេចក៏បានចាត់ទុកប្រជាពលរដ្ឋដែលរងគ្រោះដោយសារទឹកជំនន់ ជាក្រុមស្ថិតក្នុងហានិភ័យនៃអតិផរណា និងបានអំពាវនាវដល់គ្រឹះស្ថានហិរញ្ញវត្ថុទាំងអស់ មេត្ដាយោគយល់ និងអនុគ្រោះដល់ពួកគេ តាមរយៈការពន្យារពេល ឬបន្ធូរបន្ថយការប្រាក់ ដើម្បីសម្រួលបន្ទុកបំណុលដល់ប្រជាពលរដ្ឋដែលបានរងគ្រោះដោយសារទឹកជំនន់ ផងដែរ៕
