លើសពីនេះអ្នកជំនាញជឿជាក់ថា ការបើកនេះនឹងជួយឲ្យសិស្ស ជាពិសេសសិស្សនៅជនបទទទួលបានការសិក្សាល្អប្រសើរជាងពេលដែលពួកគេរៀនតាមប្រព័ន្ធអនឡាញ។
សម្តេចតេជោនាយករដ្ឋមន្ត្រី ហ៊ុន សែន ស្នើឲ្យក្រសួងអប់រំ យុវជន និងកីឡាពិភាក្សាជាមួយអភិបាលរាជធានី-ខេត្ត ដើម្បីកំណត់ទីតាំងក្នុងការឈានទៅបើកសាលារៀនឡើងវិញទៅតាមតំបន់ ពិសេសនៅជនបទ ដែលគ្មានករណីឆ្លងជំងឺកូវីដ-១៩ ។ ការសម្រេចបែបនេះ បន្ទាប់ពី សម្តេច សង្កេតឃើញថា ការឆ្លងជំងឺកូវីដ-១៩ នៅកម្ពុជាភាគច្រើនប្រមូលផ្តុំនៅទីក្រុង ឬទីប្រជុំជន ខណៈនៅតាមជនបទ ឬខេត្តមួយចំនួនពុំសូវមានការឆ្លងនោះទេ។
កំណើននៃចំនួនអ្នកចាក់វ៉ាក់សាំងកូវីដ-១៩ ក្នុងចន្លោះអាយុចាប់ពី១២ឆ្នាំដល់ក្រោម១៨ឆ្នាំ ដែលមកទល់ពេលនេះសម្រេចបានជាង១លាន៥សែននាក់ ក៏ហេតុផលមួយដែលជំរុញឲ្យប្រមុខដឹកនាំរាជរដ្ឋាភិបាលកម្ពុជាសម្រេចឲ្យសាលាបើកឡើងវិញនៅតាមតំបន់មួយចំនួនផងដែរ។
ជាមួយគ្នានេះ អ្នកឧកញ៉ា គួច ម៉េងលី ប្រធានក្រុមប្រឹក្សាភិបាលនៃក្រុមហ៊ុន Mengly J. Quach Education បានចាត់ទុកការសម្រេចឲ្យបើកសាលារៀននៅតំបន់ដែលគ្មានការឆ្លងជំងឺកូវីដ-១៩នេះថា វាដំណឹងមួយដ៏ល្អ និងជាចំណុចចាប់ផ្តើមក្នុងការបង្កើតឲ្យមានទំនាក់ទំនងរវាងសិស្ស និងសាលាឡើងវិញ។ លើសពីនេះ វានឹងជួយឲ្យសិស្ស ជាពិសេសសិស្សនៅតាមជនបទ ដែលគ្មានលទ្ធភាព និងអ៊ិនធឺណិតគ្រប់គ្រាន់ក្នុងការរៀនតាមប្រព័ន្ធអនឡាញ ទទួលបានការសិក្សាល្អប្រសើរឡើងវិញ។ បន្ថែមលើនេះ វាក៏នឹងជួយឲ្យសិស្សលែងភ្លេចសាសា ភ្លេចអក្សរ និងលែងមានគំនិតចង់បោះបង់ការសិក្សាផងដែរ។
ម្យ៉ាងវិញទៀតអ្នកឧកញ៉ា គួច ម៉េងលី ចាត់ទុកការសម្រេចបើកសាលារៀនតាមតំបន់នេះ ជាការស្ទាប់ស្ទង់មួយផងដែរក្នុងការឈានទៅបើកសាលារៀងទូទាំងប្រទេសឡើងវិញនាពេលខាងមុខ។ អ្នកជំនាញរូបនេះរំពឹងថា បន្ទាប់ពីបើកឲ្យដំណើរការសាលានៅជនបទ រាជរដ្ឋាភិបាលនឹងអាចឈានទៅបើកសាលារៀននៅទីប្រជុំជន ឬទីក្រុងជាបន្តបន្ទាប់ទៀត។
អត្ថបទទាក់ទង
ស្រដៀងគ្នានេះដែរ ឧកញ៉ា ប៉ិច ប៉ូឡែន អគ្គនាយកក្រុមហ៊ុនវេសឡាញ អេឌ្យូខេសិន គ្រុបបានបង្ហាញភាពរីករាយ និងគាំទ្រយ៉ាងពេញទំហឹងចំពោះការសម្រេចរបស់រាជរដ្ឋាភិបាល ដែលអនុញ្ញាតឲ្យសាលារៀននៅតំបន់គ្មានការឆ្លងជំងឺកូវីដ-១៩ អាចបើកដំណើរការឡើងវិញ។ អ្នកជំនាញផ្នែកវិស័យអប់រំរូបនេះ បានចាត់ទុកការសម្រេចរបស់រាជរដ្ឋាភិបាលនេះ នឹងជួយឲ្យកុមារនិងយុវជនទទួលបានការសិក្សាល្អប្រសើរឡើងវិញ ខណៈដែលសង្កេតឃើញថា ការសិក្សាតាមអនឡាញជិតពីរឆ្នាំកន្លងមក វាមិនសូវផ្តល់ប្រសិទ្ធភាពដូចការរៀនផ្ទាល់នោះទេ ពិសេសសម្រាប់សិស្សនៅជនបទដែលគ្មានអ៊ិនធឺណិតគ្រប់គ្រាន់។
ដោយឡែកឯកឧត្តម ហេង វ៉ាន់ដា នាយកវិទ្យាស្ថានវ៉ាន់ដាគណនេយ្យ និងប្រធានក្រុមប្រឹក្សាសមាគមគ្រឹះស្ថានឧត្តមសិក្សាកម្ពុជាយល់ឃើញថា ទោះបីការសម្រេចបើកសាលារៀនតាមតំបន់ឡើងវិញជាការស្ទាបស្ទង់ និងក្រោមការត្រួតពិនិត្យយ៉ាងតឹងរ៉ឹងក៏ដោយ តែវាជាចំណុចចាប់ផ្តើមដ៏ល្អមួយសម្រាប់វិស័យអប់រំនៅកម្ពុជា។
សូមបញ្ជាក់ថា សម្តេចតេជោ ហ៊ុន សែន បានបញ្ជាក់នៅក្នុងសារពិសេសនៅព្រឹកថ្ងៃទី៣១ សីហា ដោយបង្ហាញការព្រួយបារម្ភថា សិស្សនៅតាមជនបទនឹងភ្លេចការសិក្សា ឬបោះបង់ការសិក្សាប្រសិនបើសាលារៀននៅតែបន្តបិទទ្វារ។ សម្តេចអះអាងថា ទោះបីកម្ពុជាអនុវត្តការបង្រៀនតាមប្រព័ន្ធអនឡាញក៏ពិតមែន ប៉ុន្តែកុមារ ឬយុវជននៅតាមទីជនបទពុំមានលទ្ធភាពគ្រប់គ្រាន់ក្នុងការសិក្សានោះទេ ដោយសារខ្វះប្រព័ន្ធអ៊ិនធឺណិត៕
None
