បើតាមក្រសួងសេដ្ឋកិច្ច និងហិរញ្ញវត្ថុ ប្រជាពលរដ្ឋនឹងបន្ដទទួលបានការលើកលែងពន្ធ(អាករលើតម្លៃបន្ថែម) រយៈពេល២ឆ្នាំទៀត ចាប់ពីឆ្នាំ២០២២-២០២៣ នៅពេលពួកគេទិញទំនិញ ដែលទទួលបានការលើកលែងពន្ធពីទីផ្សារ ឬផ្សារទំនើបយកមកទទួលទានប្រចាំថ្ងៃ។ អាហារ ដែលទទួលបានការលើកលែងអាករលើតម្លៃបន្ថែមរួមមានទឹកត្រី ស្ករ អំបិល ទឹកស៊ីអ៊ីវ ត្រី-សាច់ និងស៊ុតជាដើម។
បើតាមការលើកឡើងរបស់ឯកឧត្តម នុប សុធនវិចិត្រ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ យ៉ាងហោចណាស់រដ្ឋអាចប្រឈមនឹងបាត់បង់ចំណូលប្រមាណ ៨០លានដុល្លារអាមេរិក ពីការលើកលែងអាការលើតម្លៃបន្ថែមចំពោះមុខទំនិញទាំងអស់នេះ។ ឯកឧត្តមបានគូសបញ្ជាក់ថា ជាបទពិសោធន៍កាលពីឆ្នាំ២០១៨ ការប្រមូលចំណូលលើវិស័យពាក់ព័ន្ធនានារបស់រដ្ឋមានការថយចុះប្រមាណ ៤០លានដុល្លារអាមេរិក ក្រោយក្រសួងដាក់ចេញយន្តការលើកទឹកចិត្តនេះជាលើកដំបូង។
អត្ថបទគួរអាន
ទោះយ៉ាងណា ការដាក់ចេញយន្តការនេះ វាបានបង្ហាញពីការគិតគូ និងរួមចំណែករបស់រាជរដ្ឋាភិបាលក្នុងការជួយសម្រួលជីវភាពរបស់ប្រជាពលរដ្ឋ ក៏ដូចជាស្តារ និងជំរុញកំណើនសេដ្ឋកិច្ចគ្រួសារ និងសង្គមជាតិទាំងមូល។ ឯកឧត្តម នុប សុធនវិចិត្រ បន្ថែមថា រាជរដ្ឋាភិបាលកម្ពុជា ដែលមានក្រសួងសេដ្ឋកិច្ចនិងហិរញ្ញវត្ថុជាសេនាធិការបានរៀបចំឲ្យមានការលើកទឹកចិត្តផែ្នកពន្ធ និងលើកលែងពន្ធ-អាករជាហូរហែរួចមកហើយ ទាំងក្នុងគោលដៅជួយសម្រួលជីវភាពរស់នៅរបស់ប្រជាពលរដ្ឋ និងសម្រួលដល់សហគ្រាស និងអាជីវកម្ម ដែលរងផលប៉ះពាល់នានា ឬវិស័យដែលទាមទារឲ្យមានការយកចិត្តទុកដាក់ខ្ពស់។
អ្នកជំនាញក្នុងវិស័យសេដ្ឋកិច្ច បានចាត់ទុកការទទួលបន្ទុកអាករលើតម្លៃបន្ថែមពីរដ្ឋ ជារួមចំណែកជួយលើកស្ទួយ និងសម្រួលជីវភាពរបស់ប្រជាពលរដ្ឋ ក៏ដូចជារក្សាអតិផរណាតម្លៃទំនិញលើទីផ្សារមិនឲ្យមានការប្រែប្រួលជាដើម។ ប៉ុន្តែអ្នកជំនាញហាក់បារម្ភចំពោះតម្លាភាពក្នុងការទទួលបានអត្ថប្រយោជន៍របស់ប្រជាពលរដ្ឋពីម្ចាស់ក្រុមហ៊ុន សហគ្រាស និងអាជីវកម្មដែលទទួលបានការលើកលែងពីវិធានការនេះ។ ជាមួយគ្នានេះ អ្នកជំនាញ ស្នើឲ្យរដ្ឋាភិបាលត្រួតពិនិត្យ និងតាមដានការអនុវត្តយន្តការលើកទឹកចិត្តនេះឲ្យបានដិតដល់ ដើម្បីធានាពីភាពត្រឹមត្រូវក្នុងការទទួលបានអត្ថប្រយោជន៍របស់ប្រជាពលរដ្ឋ៕
None
