តើមានកត្តាអ្វីជំរុញឱ្យអារ៉ាប៊ីសាអូឌីតដំណើរការសាងសង់អគារខ្ពស់បំផុតលើពិភពលោកឡើងវិញ ក្រោយផ្អាកអស់ជាច្រើនឆ្នាំ?

តាមសេចក្តីរាយការណ៍របស់សារព័ត៌មានបរទេសបានឲ្យដឹងថា អគារនេះពីដើមឡើយ មានឈ្មោះថា Kingdom Tower ដែលមានកម្ពស់ដល់ទៅ១គីឡូម៉ែត្រពីដី ពោលគឺខ្ពស់ជាង អគារ ប៊ឺច កាលីហ្វា (Burj Khalifa) ដែលមានទីតាំងនៅទីក្រុងឌូបៃ ប្រទេសអេមីរ៉ាតអារ៉ាប់រួម រហូតដល់ទៅ១៨០ម៉ែត្រ។ អគារខ្ពស់កប់ពពកថ្មីនេះបានចាប់ផ្តើមសាងសង់នៅក្នុងឆ្នាំ២០១៣ ជាមួយទុនវិនិយោគប្រមាណ១ពាន់២រយលានដុល្លារ។ អគារនេះ គឺជាផ្នែកមួយនៃគម្រោងដ៏មហិមារបស់ប្រទេសអារ៉ាប៊ីសាអូឌីត ដែលមានទឹកប្រាក់រហូតដល់ទៅ២០ពាន់លានដុល្លារ នៅជិតសមុទ្រក្រហម។

ក្រុមហ៊ុនស្ថាបត្យកម្ម Adrian Smith Gordon Gill Architecture ដែលមានមូលដ្ឋាននៅទីក្រុងឈីកាហ្គោ សហរដ្ឋអាមេរិក បានបង្ហើបប្រាប់សារព័ត៌មានថា ការសាងសង់កំពុងរៀបចំដំណើរការឡើងវិញហើយក្រោយផ្អាកកាលពីឆ្នាំ២០១៨។ Jeddah Tower យកឈ្មោះរបស់វាចេញពីទីតាំងរបស់ខ្លួននៅ Jeddah ដែលជាទីក្រុងកំពង់ផែដ៏សំខាន់មួយនៅតាមបណ្តោយសមុទ្រក្រហម និងជាទីក្រុងដែលមានប្រជាជនច្រើនជាងគេទីពីររបស់ប្រទេសអារ៉ាប៊ីសាអូឌីត។

គម្រោងនេះបានផ្អាកបន្ទាប់ពីការចាប់ខ្លួនលោក បាក ប៊ិន ឡាដេន (Bakr bin Laden) ប្រធានក្រុមហ៊ុនម៉ៅការសាងសង់ Binladin Group ដែលគេដឹងថា ជាប្អូនប្រុសរបស់មេភេវរករ ប៊ិន ឡាដេន នៅក្រោមយុទ្ធនាការ បោសសម្អាតប្រឆាំងអំពើពុករលួយដែលផ្តួចផ្តើមដោយព្រះអង្គម្ចាស់រជ្ជទាយាន មូហាមេដ ប៊ីន សាល់ម៉ាន (Mohammed bin Salman)។

តាមការគ្រោងទុក ក្រុមហ៊ុនម៉ៅការសាងសង់ថ្មីនឹងប្រកាសនៅពេលខាងមុខ ហើយគេគ្រោងនឹងប្រើរយៈពេលពី៤ទៅ៥ឆ្នាំដើម្បីបញ្ចប់។ គម្រោងនេះគឺជាផ្នែកមួយនៃគំនិតផ្តួចផ្តើមទស្សនៈវិស័យរបស់អារ៉ាប៊ីសាអូឌីតឆ្នាំ២០៣០ ដែលមានគោលបំណងធ្វើពិពិធកម្មសេដ្ឋកិច្ចរបស់ប្រទេសអារ៉ាប៊ីសាអូឌីតឲ្យលើសពីប្រេង និងលើកកម្ពស់វិស័យនានាដូចជាសុខភាព ការអប់រំ និងទេសចរណ៍។

ផែនការដ៏មហិច្ឆិតានេះ ក៏ដើម្បីបញ្ជាក់ពីការប្តេជ្ញាចិត្តរបស់រាជាណាចក្រនៅមជ្ឈឹមបូព៌ានេះក្នុងការស្វែងរកការជំរុញមុខមាត់ជាសកល ដើម្បីទទួលធ្វើជាម្ចាស់ផ្ទះការប្រកួតបាល់ទាត់ពិភពលោក ដែលខ្លួនប្រាថ្នាធ្វើម្ចាស់ផ្ទះនៅឆ្នាំ២០៣៤។

នៅពេលនេះអគារដែលខ្ពស់ជាងគេនៅលើពិភពលោកគឺ អគារ Burj Khalifa ដែលមានទីតាំងនៅទីក្រុងឌូបៃមានកម្ពស់៨២៨ម៉ែត្រ កសាងនៅឆ្នាំ២០១០។ អគារ Merdeka 118 នៅទីក្រុងកូឡាឡាំពូរ ប្រទេសម៉ាឡេស៊ី កម្ពស់៦៧៩ម៉ែត្រ កសាងរួចនៅឆ្នាំ២០២៣ និងអគារ Shanghai Tower កម្ពស់៦៣២ម៉ែត្រនៅទីក្រងសៀងហៃ ប្រទេសចិន កសាងរួចនៅក្នុងឆ្នាំ២០១៥៕

ដោយៈ សរ សុជាតិ