យ៉ាងណាក៏ដោយចុះ អ្វីដែលគេមើលឃើញថាជារឿងលំបាក និងសំខាន់ជាងនេះទៀតនោះ ការអភិវឌ្ឍអាជីវកម្មឲ្យមាននិរន្តរភាពគឺជារឿងមួយលំបាកបំផុតសម្រាប់សហគ្រិន ដូច្នេះហើយ ទើបយើងអាចឃើញថា អាជីវកម្មជោគជ័យមានតិចជាងបរាជ័យ។
តាមរយៈ ខេមបូណូមីស លោកស្រី ឃី មុនី សហស្ថាបនិកនិងជានាយិកាគ្រប់គ្រង ក្រុមហ៊ុន Amru Rice ដែលជាម្ចាស់ជ័យលាភីសហគ្រិនវ័យក្មេងស្ត្រីឆ្នើមប្រចាំឆ្នាំ២០១៧ បានបង្ហើបពីគន្លឹះមួយចំនួនសម្រាប់អ្នកចង់ជោគជ័យក្នុងមុខជំនួញគួរពិចារណា រួមមាន៖
មានគម្រោងអាជីវកម្មច្បាស់លាស់
គម្រោងអាជីវកម្ម គឺដូចជាផែនទីមួយសម្រាប់អាជីវកម្ម ដែលអាចនាំអ្នកទៅរកទិសដៅដែលអ្នកចង់ទៅ ហើយម្ចាស់អាជីវកម្មគួរតែគិតគូរ និងចំណាយពេលរៀបចំផែនទីមួយនេះឲ្យបានល្អិតល្អន់មុនសម្រេចចិត្តចេញប្រកបអាជីវកម្ម។
អត្ថបទទាក់ទង!
បើអ្នកធ្វើអាជីវកម្មដោយគ្មានផែនការជាក់លាក់ទេ មិនយូរមិនឆាប់ អ្នកច្បាស់ជាត្រូវវង្វេងផ្លូវ ពិបាកនឹងរកផ្លូវទៅមុខបានលឿនណាស់ ឬងាយនឹងប្រឈមហានិភ័យ។
ឆ្លាតក្នុងការប្រើប្រាស់ដើមទុន
ម្ចាស់អាជីវកម្មមិនតិចនោះទេ ដែលតែងជួបបញ្ហាចាយលុយខុសក្បូនក្នុងអាជីវកម្ម ឬហៅថាចំណាយហួសមាឌ។ ការចំណាយទុនខុសនេះ ប្រាកដណាស់គឺអ្នកនឹងត្រូវជួបនូវបញ្ហាលំហូរសាច់ប្រាក់ ឬខ្វះសាច់ប្រាក់ក្នុងការប្រតិបត្តិការ។
ដូច្នេះ គ្រប់ការចំណាយ អ្នកត្រូវប្រាកដថា ត្រូវតាមការកំណត់ មិនខ្ជះខ្ជាយ ពោលគឺចំណាយតិច តែអាចរកផលចំណូលមកវិញបានច្រើន។
សមត្ថភាពក្នុងការដឹកនាំ
ការគ្រប់គ្រងធនធានមនុស្ស គឺសំខាន់បំផុតសម្រាប់ប្រតិបត្តិការអាជីវកម្ម ឬក្រុមហ៊ុន។ បុគ្គលិកគឺជាអតិថិជនខាងក្នុងដែលយើងត្រូវយកចិត្តទុកដាក់ តែបើខ្វះការគ្រប់គ្រងល្អ នោះវាក៏អាចនឹងចោទជាបញ្ហាសម្រាប់ក្រុមហ៊ុនស្ទើរតែរាល់ថ្ងៃផងដែរ។ ដូច្នេះ ការលើកទឹកចិត្តបុគ្គលិក និងការបង្កើតឲ្យមានរចនាសម្ព័ន្ធត្រឹមត្រូវនៅក្នុងក្រុមហ៊ុន គឺជាធាតុផ្សំដ៏សំខាន់បំផុត ដើម្បីជំរុញឲ្យបុគ្គលិកធ្វើការងារដោយក្ដីរីករាយនិងនាំក្រុមហ៊ុនទៅរកវិបុលភាព។
មានការច្នៃប្រឌិត
សហគ្រិនឆ្នើម គឺជាបុគ្គលដែលមានភាពច្នៃប្រឌិតខ្ពស់ ពោលគឺតែងមានគំនិតក្នុងការបង្កើតថ្មីៗជានិច្ច។ លោកស្រី ឃី មុនី បានប្រាប់ ខេបូណូមីស ថា ដ្បិតថាក្រុមហ៊ុន Amru Rice របស់លោកស្រី រកស៊ីក្នុងវិស័យស្រូវអង្ករមែន ប៉ុន្ដែ លោកស្រីមិនបានគិតថា ខ្លួនលក់តែអង្ករនោះទេ ពោលគឺលោកស្រីតែងតែរកនូវវិធីសាស្ត្រធ្វើយ៉ាងណាឲ្យបរិយាកាសក្នុងមុខជំនួញរបស់លោកស្រីមានភាពស្រស់បំព្រង។
ក្នុងន័យនេះ គឺលោកស្រីតែងមានកិច្ចសហការល្អជាមួយកសិករដែលជាដៃគូអាជីវកម្ម និងតែងតែរកនូវពូជស្រូវដែលប្រទេសដទៃមិនមាន យកមកឲ្យកសិករធ្វើការដាំដុះ និងនាំចេញទៅលក់លើទីផ្សារបានតម្លៃថ្លៃជាដើម។
ស្គាល់ពីទីផ្សារក្នុងនិងក្រៅ
អាជីវកម្មរស់ព្រោះទីផ្សារ ឬអតិថិជន ដូច្នេះ បើអ្នកមិនស្គាល់ច្បាស់ពីអតិថិជនគោលដៅរបស់ខ្លួនជានរណាទេ នោះអាជីវកម្មអ្នកមិនងាយនឹងទទួលបានជោគជ័យនោះទេ។
ជាមួយគ្នានេះ លោកអ្នកក៏គួរតែមានចំណេះដឹងបន្ថែមខ្លះៗផងដែរ ទាក់ទងនឹងនិន្នាការទីផ្សារ និងសាកលលោក ដើម្បីជំនួយឲ្យការវិភាគនិងធ្វើការសម្រេចចិត្តប្រកបដោយភាពវិជ្ជមាន និងមានទស្សនៈ និងចក្ខុវិស័យវែងឆ្ងាយ៕
សូមប្រិយមិត្តអ្នកអាន រង់ចាំអានជីវប្រវត្តិ និងការប្រឡូកក្នុងអាជីវកម្មរបស់លោកស្រី ឃី មុនី ក្នុងពេលដ៏ឆាប់ខាងមុខនេះ!!!
None
