បើគ្មានអ្វីប្រែប្រួលទេក្រុមហ៊ុនអភិវឌ្ឍន៍ផ្លូវល្បឿនលឿនភ្នំពេញ-ក្រុងព្រះសីហនុ នឹងចាប់ផ្តើមយកកម្រៃសេវាពីអ្នកប្រើប្រាស់ផ្លូវនេះចាប់ពីខែវិច្ឆិកា ឆ្នាំ២០២២ តទៅ បន្ទាប់ពីបើកឲ្យប្រជាពលរដ្ឋ និងក្រុមហ៊ុនដឹកជញ្ជូននានាធ្វើដំណើរសាកស្បងដោយឥតគិតថ្លៃពេញមួយខែតុលានេះ។ ក្រោយផ្លូវនេះត្រូវបានដាក់ឲ្យដំណើរការជាផ្លូវការ នឹងតម្រូវឲ្យអ្នកប្រើប្រាស់ត្រូវបង់ថ្លៃសេវាតាមប្រភេទរថយន្ត ក្នុងនោះរថយន្តទេសចរណ៍លក្ខណៈគ្រួសារតម្រូវឲ្យបង់ប្រមាណ២៤ដុល្លារ ខណៈរថយន្តដឹកទំនិញធុនធំតម្រូវឲ្យបង់ប្រមាណ១២០ដុល្លារសម្រាប់ការធ្វើដំណើរលើផ្លូវនេះទៅ-មករាជធានីភ្នំពេញ-ក្រុងព្រះសីហនុ។
ពាក់ព័ន្ធតម្លៃសេវាផ្លូវល្បឿនលឿននេះដែរលោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាយល់ឃើញថា តម្លៃទៅមក២៤ដុល្លារសម្រាប់រថយន្តលក្ខណៈគ្រួសារ និង១២០ដុល្លារសម្រាប់រថយន្តដឹកទំនិញធុនធំជាតម្លៃមួយខ្ពស់ ដែលទាមទារឲ្យភាគីពាក់ពាក់មានការគិតគួរពិចារណាលើបញ្ហានេះ។ សម្រាប់ លោកឧកញ៉ា ការយកកម្រៃសេវាខ្ពស់វាជាផលល្អសម្រាប់ក្រុមហ៊ុនវិនិយោគលើផ្លូវនេះ តែវាក៏អាចជះផលអវិជ្ជមានដល់អ្នកប្រើប្រាស់ ផងដែរ។ ប៉ះពាល់ក៏ដោយសារអ្នកប្រើប្រាស់ និងក្រុមហ៊ុនដឹកជញ្ជូនទំនិញត្រូវបង្កើនការចំណាយ ដែលអាចជំរុញឲ្យថ្លៃដើមដឹកជញ្ជូនមានការកើនឡើង ខណៈតម្លៃទំនិញក៏អាចកើនឡើងតាមនឹងផងដែរ។
អត្ថបទគួរអាន
ទន្ទឹមនឹងនេះ អ្នកជំនួញចាស់វស្សាក្នុងវិស័យដឹកជញ្ជូនរូបនេះ បានផ្តល់ជាយោបល់ឲ្យក្រុមហ៊ុនអភិវឌ្ឍន៍ និងភាគីពាក់ព័ន្ធគួរពិចារណាឲ្យមានការបញ្ចុះការយកកម្រៃសេវាលើការប្រើប្រាស់ផ្លូវល្បឿនលឿននេះសម្រាប់ការដាក់ឲ្យដំណើរការនៅឆ្នាំដំបូង និងឆ្នាំបន្តបន្ទាប់តាមដំណាក់កាល។ ព្រោះលោកឧកញ៉ា ស៊ិន ចន្ធី យល់ឃើញថា ការធ្វើបែបនេះមិនត្រឹមតែជួយជំរុញកំណើនការប្រើប្រាស់ផ្លូវនេះនោះទេ តែវាក៏បានរួមចំណែកជួយកាត់ការចំណាយលើថ្លៃដើមនៃការដឹកជញ្ចូន ដែលវាស្របទៅនឹងគោលនយោបាយរបស់រាជរដ្ឋាភិបាល ដែលកំពុងខិតខំអភិវឌ្ឍហេដ្ឋារចនាសម្ព័ន្ធធ្វើយ៉ាងណាឲ្យវិស័យដឹកជញ្ជូន និងឡូជីស្ទីកនៅកម្ពុជាមានការប្រកួតប្រជែងខ្ពស់ជាមួយប្រទេសជិតខាង និងក្នុងតំបន់។
យ៉ាងណាក៏ដោយចុះ លោកឧកញ៉ា ស៊ិន ចន្ធី បានបង្ហាញសុទិដ្ឋិនិយមខ្ពស់ចំពោះផ្លូវល្បឿនលឿនភ្នំពេញ-ក្រុងព្រះសីហនុនេះក្នុងការជួយធ្វើឲ្យប្រសើរឡើងនូវវិស័យដឹកជញ្ជូន និងឡូជីកស្ទីករបស់កម្ពុជា។ អ្នកជំនាញរូបនេះជឿជាក់ថា ទាំងក្រុមហ៊ុនអភិវឌ្ឍន៍ និងភាគីរាជរដ្ឋាភិបាលកម្ពុជានឹងយកចិត្តទុកដាក់ខ្ពស់ក្នុងការជួយសម្រួលការយកថ្លៃកម្រៃសេវាដល់អ្នកប្រើប្រាស់ផ្លូវល្បឿនលឿននេះ។
ផ្លូវល្បឿនលឿនភ្នំពេញ-ក្រុងព្រះសីហនុ ដែលមានប្រវែងជិត១៩០គីឡូម៉ែត្រ និងចំណាយថវិកាសាងសង់ជិត២ពាន់លានដុល្លារអាមេរិកនេះ ត្រូវបានបើកសាងសង់ឡើងដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យ បច្ចេកទេសដោយក្រុមហ៊ុន MINCONSULT SDN. BHD។ បើតាមការគូសបញ្ជាក់របស់ក្រសួងសាធារណការ និងដឹកជញ្ជូន គ្រាន់តែមួយដំបូងនៃការដាក់ឲ្យដំណើរផ្លូវនេះ មានរថយន្តជិត៩ពាន់គ្រឿងបានធ្វើចរាចរណ៍លើផ្លូវនេះ ដោយចេញចូលតាមស្ថានីយទាំង៨៕
