បើទោះបីជាដឹងថា សង្គ្រាមពាណិជ្ជកម្មរវាងមហាអំណាចសេដ្ឋកិច្ចទាំងពីរ បានបង្កផលប៉ះពាល់អវិជ្ជមានដល់ កំណើនសេដ្ឋកិច្ចសកល ក៏ដោយ លោក ដូណាល់ ត្រាំ បានប្រាប់ដល់មន្រ្តីជាន់ខ្ពស់ នៅក្នុងកិច្ចប្រជុំគណៈរដ្ឋមន្រ្តី ថា លោក នឹងដំឡើងពន្ធលើ ទំនិញនាំចូលរបស់ចិន បើសិនជាគ្មានកិច្ចព្រមព្រៀងណាមួយ ត្រូវបានសម្រេចនោះទេ ហើយកិច្ចព្រមព្រៀងនោះ ក៏ត្រូវតែជា កិច្ចព្រមព្រៀងដែលលោកប្រធានាធិបតីរូបនេះ ពេញចិត្តផងដែរ។
ក្តីសង្ឃឹមនៃការដោះស្រាយសង្រ្គាមមួយនេះ គឺនៅពេលដែល ផ្នែកណាមួយនៃកិច្ចព្រមព្រៀងពាណិជ្ជកម្មរវាង អាមេរិក និងចិន អាចសម្រេចបាន ក្នុងខែឧសភា និងពាក់កណ្តាល ខែវិច្ឆិកានេះ តែវាត្រូវបានច្រានចោល និងពន្យារពេលម្តងហើយ ម្តងទៀត។
អត្ថបទទាក់ទង!
លោក ឡារី ឃុតឡូ ទីប្រឹក្សាសេដ្ឋកិច្ចនៃសេតវិមានអាមេរិក បានបញ្ជាក់កាលពីដើមខែ វិច្ឆិកា នេះ ដែរថា ប្រទេសទាំងពីរ ខិតជិតទៅរកការសម្រេចកិច្ចព្រមព្រៀងបញ្ចប់សង្គ្រាម ដែលអូសបន្លាយអស់រយៈពេល ១៦ខែនេះហើយ ក៏ប៉ុន្តែ លោក មិនបានបញ្ជាក់លម្អិតពី ពេលវេលានៃការសម្រេចនេះទេ។
យ៉ាងណាក៏ដោយ បញ្ហាដែលស៊ីចង្វាក់គ្នា ត្រូវបានគេមើលឃើញថា តើអាមេរិក គួរបន្ថយពន្ធលើ ទំនិញនាំចូលចិន ដោយរបៀបណា និងនៅពេលណា ហើយសម្រាប់ម្ខាងទៀត តើចិន គឺទិញ ផលិតផលកសិកម្មអាមេរិក ច្រើនប៉ុនណា?
សូមរម្លឹកបន្តិចថា សេដ្ឋកិច្ចយក្ស-យក្សរបស់ប្រទេសទាំងពីរ សុទ្ធតែចង់ឲ្យដៃគូចរចារបស់ខ្លួន បត់បែនទៅតាមការកំណត់របស់ខ្លួន ហើយវាមិនមែនជារឿងងាយស្រួលនោះទេ ព្រោះថា ជម្លោះនេះ ចាប់ផ្តើមពីរឿងតូច រហូតដល់ តម្លើងពន្ធលើទំនិញ រាប់ពាន់លានដុល្លារដាក់គ្នា។
ការគំរាមដំឡើងពន្ធចុងក្រោយនេះ គឺ ចិន បានបង្ហាញពីគម្រោងដំឡើងពន្ធលើ ទំនិញអាមេរិក នៅពាក់កណ្តាលខែធ្នូ ដូចគ្នាទៅនឹងការកំណត់របស់អាមេរិកដែរ ដោយចិន នឹងដំឡើង ពន្ធ ៥% លើទៅ ប្រេងឆៅ និងគ្រឿងបង្គុំរថយន្តរបស់អាមេរិក ហើយដាក់ពន្ធ ២៥% លើរថយន្តផលិតដោយអាមេរិក ជាថ្មីម្តងទៀត។
រីឯ រដ្ឋាភិបាលលោកដូណាល់ ត្រាំ ក៏គ្រោងដំឡើងពន្ធបន្ថែម ៥ភាគរយទៀត ដោយដូរពី ១០% ទៅ ១៥% វិញ ទៅលើទំនិញចិន ដែលមានតម្លៃ ៣០០ពាន់លានដុល្លារអាមេរិក ដោយក្នុងនោះ ទំនិញជាងពាក់កណ្តាល ត្រូវចាប់ផ្តើមតម្លើងពន្ធពីថ្ងៃទី ១៥ ខែធ្នូខាងមុខ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
