ជនភៀសខ្លួនដោយសារសង្គ្រាមនៅអ៊ុយក្រែននេះ គឺជាលំហូរជនភៀសខ្លួនដ៏ច្រើនបំផុតមួយក្នុងប្រវត្តិសាស្ត្រមនុស្សជាតិ ពិសេសនៅក្នុងសម័យទំនើបដូចនេះ។
ប្រធានឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន លោក ហ្វីលីបប៉ូ ហ្គ្រេនឌី (Filippo Grandi) បាននិយាយថា ចំនួនជនភៀសខ្លួនអ៊ុយក្រែនបានកើនឡើងដល់១លាន៥សែននាក់ហើយ ក្រោយពីបានកើនដល់កំរិតខ្ពស់បំផុតជាង១លាននាក់កាលពីថ្ងៃសុក្រទី៤។
លោកហ្វីលីបប៉ូ ហ្គ្រេនឌី អះអាងថា នេះជាវិបត្តិជនភៀសខ្លួនដែលមានការវិវត្តលឿនបំផុតដែលគេមិនធ្លាប់បានឃើញនៅអឺរ៉ុប ចាប់តាំងពីការបញ្ចប់សង្គ្រាមលោកលើកទីពីរមក។
ប្រធានឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនអះអាងថា ឥលូវនេះជនភៀសខ្លួនភាគច្រើនបាននិងកំពុងភ្ជាប់ទំនាក់ទំនងជាមួយមិត្តភក្តិ ក្រុមគ្រួសារ របស់ពួកគេ ដែលកំពុងរស់នៅក្នុងទ្វីបអឺរ៉ុបរួចហើយ ដែលវាបានសម្រួលដល់ប្រទេសក្បែរខាងដែលទទួលយកជនភៀសខ្លួនអ៊ុយក្រែនខ្លះដែរ។ យ៉ាងណាមិញ លោកបានព្រមានថា រលកជនភៀសខ្លួននាពេលអនាគតនឹងកាន់តែស្មុគស្មាញ ហើយបង្កការលំបាកជាងនេះ។
អត្ថបទគួរអាន
ប្រទេសប៉ូឡូញ ដែលមានសហគមន៍ជនជាតិអ៊ុយក្រែនប្រហែល១លាននាក់កំពុងរស់នៅស្រាប់ គឺជាប្រទេសដែលបានទទួលយកជនភៀសខ្លួនអ៊ុយក្រែនច្រើនជាងគេ ពោលគឺជិត ៨០ម៉ឺននាក់រួចហើយ ចាប់តាំងពីការចាប់ផ្តើមនៃប្រតិបត្តិការឈ្លានពានរបស់រុស្ស៊ីកាលពីថ្ងៃទី២៤ ខែកុម្ភៈ ហើយនៅចុងក្រោយនេះ ចំនួនជនភៀសបានកើនបន្ថែម ១០ម៉ឺននាក់ទៀត នៅក្នុងរយៈពេលតែមួយថ្ងៃប៉ុណ្ណោះ ដែលវាជាតួលេខប្រចាំថ្ងៃខ្ពស់បំផុតចាប់តាំងពីសង្គ្រាមបានផ្ទុះឡើង។
គួរជម្រាបថា ភាគច្រើនលើសលុបនៃពលរដ្ឋអ៊ុយក្រែនដែលរត់គេចខ្លួន គឺបានឆ្លងចូលទៅក្នុងសហភាពអឺរ៉ុប នៅភាគខាងកើតប្រទេសប៉ូឡូញ ស្លូវ៉ាគី ហុងគ្រី និងភាគខាងជើងប្រទេសរ៉ូម៉ានី ដែលសុទ្ធសឹងជាប្រទេសជាប់ព្រំប្រទល់នឹងអ៊ុយក្រែន។
រដ្ឋមន្ត្រីការបរទេសអាមេរិក លោក អង់តូនី ប្លីងខេន បានទៅដល់ប្រទេសប៉ូឡូញ ដើម្បីធ្វើទស្សនកិច្ចមួយជុំនៅក្នុងតំបន់ ដែលកំពុងប្រឈមនឹងវិបត្តិបង្កឡើងដោយសង្គ្រាមរុស្ស៊ីលើអ៊ុយក្រែន។ នៅចំពោះមុខសមភាគីប៉ូឡូញ លោក អង់តូនី ប្លីងខេន បានអបអរទឹកចិត្តប៉ូឡូញ ដែលទទួលស្វាគមន៍ជនភៀសខ្លួនអ៊ុយក្រែន និងបានប្រកាសស្វែងរកជំនួយហិរញ្ញវត្ថុបន្ថែម ២.៧៥០លានដុល្លារ សម្រាប់ជួយដោះស្រាយវិបត្តិមនុស្សធម៌។
សូមបញ្ជាក់ថា អស់ពេល១២ថ្ងៃមកហើយរុស្ស៊ីនៅតែបន្តវាយប្រហារលើអ៊ុយក្រែនមិនដកដៃនោះទេ។ យ៉ាងណាក៏ដោយ លទ្ធផលនៃកិច្ចចរចាជុំទីពីររវាងប្រទេសទាំងពីរនៅសប្តាហ៍មុន បានឈានដល់ការព្រមព្រៀងគ្នាផ្អាកការបាញ់ប្រហារ ដើម្បីជម្លៀសជនស៊ីវិល។
ទន្ទឹមនឹងនេះ ប្រតិភូចរចារបស់អ៊ុយក្រែន លោកដេវីដ អារ៉ាខាមៀ David Arakhamia បាននិយាយនៅក្នុងសារមួយដែលបង្ហោះនៅលើគណនី Facebook ថារុស្ស៊ីនិងអ៊ុយក្រែននឹងធ្វើកិច្ចចរចាជុំទីបីនៅថ្ងៃចន្ទ ទី០៧មីនានេះហើយ តែមិនបានផ្តល់ព័ត៌មានលម្អិតបន្ថែមថា ជាការចរចាអំពីការបញ្ចប់សង្គ្រាម ឬយ៉ាងណានោះទេ។ ដោយឡែក ភាគីរុស្ស៊ីវិញមិនសូវជានិយាយច្បាស់លាស់ប៉ុន្មានទេ ដោយគ្រាន់តែប្រើពាក្យថា កិច្ចចរចាប្រហែលចាប់ផ្តើមនៅថ្ងៃចន្ទ៕
None
