ក្រុមប្រទេសមានសេដ្ឋកិច្ច និងនយោបាយជឿនលឿនទាំងប្រាំពីរ (G7) រួមមានសហរដ្ឋអាមេរិក និងសម្ព័ន្ធមិត្តរបស់ខ្លួនបានស្នើឡើងនូវគំនិតផ្តួចផ្តើម Build Back Better World ឬហៅកាត់ថា B3W កាលពីខែមិថុនាឆ្នាំមុន ដើម្បីជួយប្រទេសកំពុងអភិវឌ្ឍន៍ បំពេញតម្រូវការហេដ្ឋារចនាសម្ព័ន្ធ ខណៈដែលG7 ព្យាយាមប្រឆាំងនឹងឥទ្ធិពលដែលកំពុងកើនឡើងរបស់ប្រទេសចិន។
រដ្ឋមន្ត្រីការបរទេសចិនលោក Wang Yi បាននិយាយនៅក្នុងសារជាវីដេអូមួយថា៖ យើងក៏មានឆន្ទៈក្នុងការពិចារណាសម្របសម្រួលជាមួយគំនិតផ្តួចផ្តើម 'Build Back Better World' របស់សហរដ្ឋអាមេរិក ដើម្បីផ្តល់ឱ្យពិភពលោកនូវការអេភិវឌ្ឍនានា ដែលមានគុណភាពខ្ពស់បន្ថែមទៀត។ ការលើកឡើងរបស់ប្រមុខការទូតចិនបែបនេះ ទំនងជាចេតនាចង់ធ្វើឱ្យមានប្រក្រតីភាពឡើងវិញ នៃទំនាក់ទំនងរវាងវ៉ាស៊ីនតោន និងប៉េកាំង ដែលកំពុងល្អក់កករមកជាច្រើនឆ្នាំមកហើយនោះ។
លោកបានបន្តថា ប្រទេសចិនក៏នឹងបើកចំហចំពោះសហរដ្ឋអាមេរិកដែរ បើសិនគេចង់ចូលរួមក្នុងគំនិតផ្តួចផ្តើមខ្សែក្រវាត់ និងផ្លូវ (BRI) និងគំនិតផ្តួចផ្តើមអភិវឌ្ឍន៍សកលនានា ដែលជាការអំពាវនាវកន្លងមករបស់ប្រធានាធិបតីចិនស៊ី ជីនពីង ដើម្បីធ្វើការឆ្ពោះទៅរកការអភិវឌ្ឍប្រកបដោយចីរភាព។
អត្ថបទគួរអាន
យ៉ាងណាក៏ដោយ គំនិតផ្តួចផ្តើម B3W របស់ G7 ត្រូវបានគេមើលឃើញថា ជាដៃគូប្រជែង នឹងគំនិតផ្តួចផ្តើម BRI របស់ប្រទេសចិន ដែលត្រូវបានដាក់ឱ្យដំណើរការតាំងតែពីឆ្នាំ២០១៣មកម្ល៉េះ។ ប្រទេសជាង ១០០បានចុះហត្ថលេខាលើកិច្ចព្រមព្រៀងជាមួយប្រទេសចិន ដើម្បីសហការក្នុងគម្រោង BRI រួចទៅហើយ ក្នុងនោះរួមមាន គម្រោងផ្លូវដែក កំពង់ផែ ផ្លូវហាយវេ និងហេដ្ឋារចនាសម្ព័ន្ធផ្សេងទៀត។
ចិនបានជំរុញឱ្យទីក្រុងវ៉ាស៊ីនតោនធ្វើការជាមួយខ្លួននៅអាស៊ីប៉ាស៊ីហ្វិកដើម្បីកសាង តំបន់មួយដែលបើកចំហ ពោរពេញដោយការច្នៃប្រឌិត កំណើនជាវិជ្ជមាន ការតភ្ជាប់ងាយស្រួល និងកិច្ចសហប្រតិបត្តិការឈ្នះ-ឈ្នះ ជាជាងប្រែក្លាយតំបន់នេះ ទៅជាជម្លោះ និងការប្រឈមមុខដាក់គ្នា។
យ៉ាងណាមិញ ចិននៅតែអំពាវនាវជាថ្មីឱ្យសហរដ្ឋអាមេរិកឈប់គាំទ្រឯករាជ្យភាពសម្រាប់កោះតៃវ៉ាន់ ដែលចិនតែងអះអាងថាស្ថិតក្រោមការគ្រប់គ្រងរបស់ខ្លួន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
