ថ្លែងនាកិច្ចប្រជុំផ្សព្វផ្សាយតាមប្រព័ន្ធអនឡាញ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានគូសបញ្ជាក់ថា កញ្ចប់ថវិកា១០០លានដុល្លារ ដែលរាជរដ្ឋាភិបាលទើបអនុម័តដាក់ឱ្យប្រើប្រាស់នេះ ជាផ្នែកមួយនៃការជំរុញ អនុវត្តក្របខណ្ឌយុទ្ធសាស្រ្ត និងកម្មវិធីស្ដារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយនឹងកូវីដ១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣។ អគ្គបណ្ឌិតសភាចារ្យ អូន ព័ន្ធមុនីរ័ត្ន បានគូសរំលេចថា ក្នុងរយៈពេល ២ឆ្នាំកន្លងមក កម្ពុជា បានរងផលប៉ះពាល់យ៉ាងធ្ងន់ធ្ងរពីវិបត្តិកូវីដ១៩ ដែលបានធ្វើឱ្យដំណើរការអភិវឌ្ឃន៍សង្គម និងសេដ្ឋកិច្ច មានភាពយឺតយ៉ាវ។
កន្លងមក ដើម្បីសម្រួលបន្ទុកប្រជាពលរដ្ឋដែលបានរងគ្រោះដោយសារវិបតិ្តកូវីដ១៩ រាជរដ្ឋាភិបាល ក៏បានសម្រេចលើកលែងការយកពន្ធលើវិស័យមួយចំនួនជាបន្តបន្ទាប់ផងដែរ។ ក្នុងនោះដែរ បើតាមរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសង្កត់ធ្ងន់ទៀតថា រាជរដ្ឋាភិបាលចាត់ទុក ការលើកកម្ពស់ការអភិវឌ្ឍន៍សហគ្រាសធុនតូច និងមធ្យម ពិសេសសហគ្រាសដែលស្ថិតក្នុងវិស័យសំខាន់ៗ ដូចជា កសិកម្ម និងទេសចរណ៍ ជាដើម នឹងរួមចំណែកដ៏សំខាន់ក្នុងការជំរុញសេដ្ឋកិច្ចជាតិ។
អត្ថបទគួរអាន
ឯកឧត្តម កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម បានគូសបញ្ជាក់ថា កញ្ចប់ថវិកាដែលរាជរដ្ឋាភិបាលកម្ពុជា ផ្ដល់ឱ្យជាលើកទី២នេះ ពិតជារួមចំណែកយ៉ាងសំខាន់ក្នុងការទ្រទ្រង់សកម្មភាពសេដ្ឋកិច្ច។ បើតាមឯកឧត្តម កៅ ថាច ហិរញ្ញប្បទាន៥០លានដុល្លារ ដែលរាជរដ្ឋាភិបាលកម្ពុជា ផ្ដល់ឱ្យក្រសួងអភិវឌ្ឍន៍ជនបទ គឺផ្ដោតសំខាន់លើវិស័យកសិកម្មទាំងមូល។ បើតាមឯកឧត្តម កៅ ថាច គោលដៅនៃការប្រើប្រាស់ថវិកា៥០លានដុល្លារ សម្រាប់ឆ្នាំ២០២២ ដែលត្រូវបែងចែកសម្រាប់ទ្រទ្រង់លើវិស័យស្រូវអង្ករ ការចិញ្ចឹមសត្វ ការដាំដុះបន្លែផ្លែឈើ និងការកែច្នៃផលិតផលកសិកម្ម ជាដើម។
សូមបញ្ជាក់ថា កន្លងមកមន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ ធ្លាប់បានអះអាងថា នៅឆ្នាំ២០២២នេះ រាជរដ្ឋាភិបាលកម្ពុជាបានត្រៀមទុកថវិកាប្រមាណ ២៥០លានដុល្លារ សម្រាប់ជួយដល់វិស័យសហគ្រាសខ្នាតតូច និងមធ្យម ទាំងនៅក្នុងវិស័យកសិកម្ម និងមិនមែនកសិកម្ម ដើម្បីជំរុញកំណើនសេដ្ឋកិច្ចជាតិ៕
None
