កាលពីថ្ងៃច័ន្ទដើមសប្តាហ៍នេះ លោកស្រី ណូអែលលីន ហាយស័រ ប្រសិតពិសេសអង្គការសហប្រជាជាតិ ទទួលបន្ទុកកិច្ចការមីយ៉ាន់ម៉ា បានជួបពិភាក្សានឹង លោកប្រាយុទ្ធ ចាន់អូចា នាយករដ្ឋមន្ត្រីថៃ ដើម្បីស្វែងរកការគាំទ្រក្នុងក្របខណ្ឌកិច្ចខិតខំប្រឹងប្រែងជាអន្តរជាតិ ក្នុងជំនួយមនុស្សធម៌ដល់ពលរដ្ឋមីយ៉ាន់ម៉ា ក៏ដូចជាជួយជំរុញឲ្យមេដឹកនាំយោធា អនុវត្តទៅតាមកិច្ចព្រមព្រៀងជាឯកច្ឆន្ទទាំង ៥ចំណុចរបស់អាស៊ានផងដែរ។
លោកស្រី ណូអែលលីន ហាយស័របាននិយាយក្នុងសេចក្តីថ្លែងការណ៍មួយក្រោយជំនួបជាមួយលោកប្រាយុទ្ធ ចាន់អូចាថា៖ លោកនាយករដ្ឋមន្ត្រីថៃ ដើរតួនាទីសំខាន់ណាស់ ក្នុងការទប់ស្កាត់វិបត្តិនៅក្នុងប្រទេសមីយ៉ាន់ម៉ា កុំឲ្យធ្ងន់ធ្ងរជាងនេះ ដែលប្រសិនបើស្ថានការណ៍កាន់តែអាក្រក់ វានឹងនាំមកនូវអស្ថិរភាពបន្ថែមទៀតដល់ក្នុងតំបន់ និងពិសេសនៅតាមព្រំដែននៃប្រទេសទាំងពីរ ដែលកំពុងមានអស្ថិរភាពរួចទៅហើយនោះ។អត្ថបទគួរអាន
ការលើកឡើងបែបនេះ ធ្វើឡើងក្រោយពេលអ្នកជំនាញបារម្ភថា ចំនួនជនភៀសខ្លួននឹងជន់ជោរកាន់តែច្រើនមកក្នុងប្រទេសថៃ ប្រសិនបើយោធាមីយ៉ាន់ម៉ាបង្កើនការវាយបង្ក្រាបលើក្រុមដែលប្រឆាំងនឹងខ្លួន ពិសេសក្រុមជនជាតិភាគតិចដែលនៅតាមព្រំដែន។
គួរឲ្យដឹងថា មានជនស៊ីវិលមីយ៉ាន់ម៉ារាប់ពាន់នាក់បានភៀសខ្លួនចូលទៅក្នុងប្រទេសថៃចាប់តាំងពីមានការប៉ះទង្គិចគ្នាតាមបណ្តោយព្រំដែនបានផ្ទុះឡើងបន្ទាប់ពីរដ្ឋប្រហារកាលពីឆ្នាំមុន។ យោងតាមតួលេខផ្លូវការពីរដ្ឋាភិបាលថៃបានឲ្យដឹងថា មនុស្សជាង ១៣០០ នាក់កំពុងស្ថិតក្នុងជំរុំជនភៀសខ្លួនក្នុងប្រទេសថៃនៅឡើយ។
យ៉ាងណាមិញ ក្រុមអង្គការសង្គមស៊ីវិលអន្តរជាតិកន្លងមកបានប្រាប់ទីភ្នាក់ងារសារព័ត៌មានរ៉យទ័រថា ពួកគេមិនធ្លាប់បានត្រូវគេអនុញ្ញាតឲ្យចូលទៅកាន់តំបន់ជំរុំជនភៀសខ្លួនទាំងនោះទេ៕
None
