កូវីដ-១៩ នៅតែជាបញ្ហាធំបំផុត ដែលបានរាំងស្ទះស្ទើរគ្រប់សកម្មភាពនានា រួមទាំងវិស័យសាងសង់នៅកម្ពុជា ផងដែរ។ ការផ្ទុះឡើងជាបន្តបន្ទាប់នូវវីរុសកូវីដ-១៩ ហាក់ធ្វើឱ្យក្រុមអ្នកវិនិយោគទាំងក្នុងស្រុក និងក្រៅស្រុក នៅតែមានការរារែកចិត្ត ក្នុងការវិនិយោគ ទើបធ្វើឱ្យគម្រោងវិនិយោគនៅកម្ពុជា មានការថយចុះ។ តែយ៉ាងណា អ្នកជំនាញក្នុងវិស័យសំណង់ និងអចលនទ្រព្យ យល់ថា ស្ថានភាពនឹងប្រសើរឡើងវិញ ក្រោយកម្ពុជា សម្រេចបាននូវការចាក់វ៉ាក់សាំងបង្កាជំងឺកូវីដ-១៩ ជូនពលរដ្ឋ១០០% ព្រមទាំងអនុញ្ញាតឱ្យដំណើរសកម្មភាពអាជីវកម្មឡើងវិញពេញលេញ។
ជុំវិញបញ្ហានេះ លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យកម្ពុជា ស៊ីភីអិល យល់ឃើញថា បច្ចុប្បន្ន វិស័យសំណង់ និងអចលនទ្រព្យ ពិតជាបានជួបបញ្ហាខ្លះក៏ពិតមែន ដែលកន្លងមក ក្រុមអ្នកវិនិយោគពីបរទេស មិនអាចចូលមកវិនិយោគ ក្នុងប្រទេសកម្ពុជា ទើបធ្វើឱ្យវិស័យសំណង់ ក្នុងឆ្នាំនេះ មានការថយចុះ។ ដ្បិតថា វិស័យសំណង់ក្នុងឆ្នាំនេះ បានធ្លាក់ចុះ តែអ្នកជំនាញផ្នែកអចលនទ្រព្យរូបនេះ បានអះអាងថា សកម្មភាពមួយចំនួន ដូចជា ការសាងសង់លំនៅឋានដែលមានតម្លៃសមរម្យ ឬគម្រោងធំៗជាដើម នៅតែបន្តសកម្មភាព។
អត្ថបទគួរអាន
យ៉ាងណាក៏ដោយ លោកឧកញ៉ា ចេង ខេង រំពឹងខ្ពស់ថា ក្រោយកម្ពុជា សម្រេចការចាក់វ៉ាក់សាំងតាមផែនការ និងឱ្យមានការបើកប្រទេសពេញលេញឡើងវិញ វិស័យអចលនទ្រព្យ និងសំណង់ ក៏ងើបឡើងវិញដែរ។
មិនខុសគ្នាប៉ុន្មាន ពីលោកឧកញ៉ា ចេង ខេង ចំពោះស្ថានភាពក្នុងវិស័យអចលនទ្រព្យ និងសំណង់ ត្រូវបានលោក ច្រឹក សុខនីម ប្រធានសមាគអ្នកវាយតម្លៃ និងភ្នាក់ងារអចលនវត្ថុ បានកត់សម្គាល់ឃើញថា អំឡុងនៃការរីករាលដាលនៃជំងឺកូវីដ-១៩ មិនមែនតែនៅកម្ពុជាទេ ប្រទេសមួយចំនួន នៅតំបន់អាស៊ាន វិស័យអចលនទ្រព្យ ក៏មានការជាប់គាំងខ្លះៗដែរ។ ដោយឡែក នៅកម្ពុជា ដោយសារផ្ទុះឡើងនៃវីរុសនេះ ធ្វើឱ្យការស្នើសុំនៃគម្រោងថ្មី ក្នុងឆ្នាំនេះបានថយចុះ ក៏ពិតមែន តែលោក ច្រឹក សុខនីម បានបញ្ជាក់ថា គម្រោងសាងសង់ដែលកំពុងដំណើរការ មិនមានបញ្ហាប្រឈមអ្វីនោះទេ។
យ៉ាងណាមិញ អ្នកជំនាញផ្នែកអចលនទ្រព្យរូបនេះ នៅតែក្ដីរំពឹងយ៉ាងមុតមាំ ថាស្ថានភាពនឹងប្រសើរឡើងវិញ ព្រោះលោកកត់សម្គាល់ឃើញថា នារយៈពេល ២សប្ដាហ៍ចុងក្រោយនេះ សកម្មភាពក្នុងវិស័យអចលនទ្រព្យហាក់កំពុងងើបឡើងវិញ។
យោងតាមរបាយការណ៍របស់ក្រសួងដែនដី នគរូបនីយកម្ម និងសំណង់ នៅឆមាសទី១ ឆ្នាំ២០២១ ក្រសួងបានផ្ដល់លិខិតអនុញ្ញាតសាងសង់ សរុប ២.២៣៥គម្រោង ជាមួយនឹងទុនវិនិយោគ ២.៥០០លានដុល្លារអាមេរិក៕
អត្ថបទ៖ ខន ណារី
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
