«យើងត្រូវការជាបន្ទាន់នូវច្រករបៀងមនុស្សធម៌ ដែលធានាបានពីសុវត្ថិភាព និងមានប្រសិទ្ធភាព» នេះជាអ្វីដែលលោកហ្គូទែរ៉េស បាននិយាយក្នុងសន្និសីទសារព័ត៌មាននៅទីក្រុងមូស្គូកាលពីថ្ងៃអង្គារ បន្ទាប់ពីការពិភាក្សាជាមួយរដ្ឋមន្ត្រីការបរទេសរុស្ស៊ីលោក ស៊ែរហ្កី ឡាវរ៉ូវ (Sergey Lavrov) ។
ប្រមុខដឹកនាំ UNបន្តថា៖ លោកបានស្នើឲ្យបង្កើតក្រុមទំនាក់ទំនងមនុស្សធម៌មួយ ដែលចូលរួមពីភាគីរុស្ស៊ី អ៊ុយក្រែន និងក្រុមការងាររបស់អង្គការសហប្រជាជាតិ ដើម្បីស្វែងរកឱកាសសម្រាប់ការបើកច្រករបៀងសុវត្ថិភាពសម្រាប់ជនស៊ីវិល។
លោក Guterres បានប្រាប់រដ្ឋមន្ត្រីការបរទេសរុស្ស៊ីថា លោកបានត្រៀមខ្លួនរួចជាស្រេចក្នុងការប្រមូលធនធានរបស់អង្គការសហប្រជាជាតិ ដើម្បីជួយសង្គ្រោះជីវិតមនុស្ស និងជម្លៀសប្រជាជនដែលនៅសេសសល់ចេញពីទីក្រុង Mariupol និងទីតាំងរបស់អ៊ុយក្រែនផ្សេងទៀត ដែលកំពុងត្រូវបានឡោមព័ទ្ធ។ ជនស៊ីវិលរាប់ពាន់នាក់កំពុងត្រូវការជំនួយមនុស្សធម៌ សង្គ្រោះជីវិតយ៉ាងខ្លាំង និងជាបន្ទាន់។
គួរជម្រាបថា បើផ្អែកលើប្រភពព័ត៌មានពីស្ថាប័នធំៗជាច្រើន មានពលរដ្ឋប្រមាណ ១០ម៉ឺននាក់ កំពុងជាប់គាំងក្នុងទីក្រុងម៉ារីយ៉ូប៉ូល ខ្វះខាតទឹក ស្បៀងអាហារ និងថ្នាំសង្កូវ ខណៈជាច្រើនពាន់នាក់ទៀតកំពុងលាក់ខ្លួនជាមួយកងទ័ពអ៊ុយក្រែន ដែលនៅសេសសល់ក្នុងតំបន់រោងចក្រស្លរដែក Azov។
អត្ថបទគួរអាន
រដ្ឋមន្ត្រីការបរទេសរុស្ស៊ីបានលើកឡើងក្នុងសន្និសីទកាសែត ដែរថា ភាគីរុស្ស៊ីបានត្រៀមខ្លួនរួចហើយ ក្នុងការសហការជាមួយក្រុមការងារ របស់អង្គការសហប្រជាជាតិ ដើម្បីធ្វើយ៉ាងណា សម្រួលដល់ជនស៊ីវីល ព្រោះបំណងរបស់រុស្ស៊ី គឺការពារអាយុជីវិតប្រជាជនស៊ីវីល។
ដោយឡែក នៅថ្ងៃពុធទី២៧មេសានេះ តាមការគ្រោងទុកលោកអង់តូនីញ៉ូ ហ្គូតទែរ៉េស បានចូលទៅជួបប្រធានាធិបតីពូទីន ដើម្បីជជែកពីបញ្ហាមនុស្សធម៌ដដែលនេះ។ ជាក់ស្តែង លោកពូទីន បានយល់ព្រមជាគោលការណ៍ហើយ លើការចូលរួមរបស់អង្គការសហប្រជាជាតិ និងគណៈកម្មាធិការអន្តរជាតិកាកបាតក្រហម ក្នុងការជម្លៀសជនស៊ីវិលចេញពីរោងចក្រស្លរដែក ដែលត្រូវបានឡោមព័ទ្ធនៅទីក្រុង Mariupol ភាគខាងត្បូងប្រទេសអ៊ុយក្រែន។
បន្ថែមពីលើការយល់ព្រមខាងលើ លោកពូទីនបានបង្ហើបថា រុស្ស៊ីនិងអ៊ុយក្រែន និងបន្តការចរចាគ្នាតាមប្រព័ន្ធអនឡាញក្នុងពេលខាងមុខនេះ។ លោកពូទីន សង្ឃឹមថា កិច្ចចរចាលើកក្រោយៗនឹងផ្តល់លទ្ធផលជាវិជ្ជមាន ជាងពេលមុនៗ៕
None
