ស្របពេលមានការកើនឡើងសង្គ្រាមពាណិជ្ជកម្មជាមួយនឹងសហរដ្ឋអាម៉េរិក សហភាពអឺរ៉ុប បានងាកទៅបង្កើនទំនាក់ទំនងជាមួយចិន ដោយប្រធានគណៈកម្មការអឺរ៉ុប លោកស្រី យូស៊ូឡា វ៉ុនឌ័រ ឡេយេន បានជួបពិភាក្សាគ្នាតាមទូរសព្ទជាមួយនាយករដ្ឋមន្ត្រីចិន លោក លី ឈាំង កាលពីថ្ងៃទី៨ ខែមេសា ឆ្នាំ២០២៥។
នៅក្នុងកិច្ចសន្ទនានោះ ប្រធានគណកម្មការអឺរ៉ុប បានគូសបញ្ជាក់ពីសារសំខាន់នៃស្ថិរភាព និងការព្យាករសម្រាប់សេដ្ឋកិច្ចពិភពលោកដោយបានសង្កត់ធ្ងន់ពីការទទួលខុសត្រូវរបស់អឺរ៉ុប និងចិន ដែលជាទីផ្សារធំជាងគេទាំងពីររបស់ពិភពលោកក្នុងការគាំទ្រប្រព័ន្ធពាណិជ្ជកម្មដែលត្រូវបានកែទម្រង់ឱ្យមានសេរីភាព យុត្តិធម៌ និងស្មើភាពគ្នា។
ប្រទេសចិន បានឆ្លើយតបចំពោះការយកពន្ធ៥៤% របស់សហរដ្ឋអាម៉េរិក លើទំនិញរបស់ចិនជាមួយនឹងការយកពន្ធ៣៤% លើការនាំចូលទាំងអស់របស់សហរដ្ឋអាម៉េរិក ហើយថ្មីៗនេះលោក ដូណាល់ ត្រាំ ប្រធានាធិបតីអាម៉េរិក ក៏បានផ្ចាញ់តបវិញដោយបានដំឡើងពន្ធ៥០%ទៀតលើប្រទេសចិន ដែលធ្វើឱ្យអត្រាពន្ធឡើងដល១០៤% ដោយបានចូលជាធរមាននៅថ្ងៃទី៩ ខែមេសា ឆ្នាំ២០២៥។ ទន្ទឹមនឹងនេះ ប្រធានគណៈកម្មការអឺរ៉ុប បានជំរុញឱ្យលោក លី ត្រូវជៀសវាងការធ្វើឱ្យស្ថានការណ៍ពន្ធឡើងកម្ដៅថែមទៀត៕
អត្ថបទ៖ សុខ មង្គល
