កិច្ចប្រជុំកំពូលសន្តិសុខអាស៊ី ឬហៅថាកិច្ចពិភាក្សា Shangri-La ដែលចូលរួមដោយមន្ត្រីយោធាជាន់ខ្ពស់ មន្ត្រីការទូត និងអ្នកផលិតសព្វាវុធនៅជុំវិញពិភពលោកនោះ នឹងប្រព្រឹត្តទៅនៅថ្ងៃទី១០-១២ ខែមិថុនានៅប្រទេសសិង្ហបុរី ហើយវាជាលើកទីមួយហើយដែលព្រឹត្តិការណ៍នេះត្រូវបានប្រារព្ធឡើងចាប់តាំងពីឆ្នាំ២០១៩បន្ទាប់ពីបានពន្យារពេលពីរដងដោយសារជំងឺកូវីដ១៩។
នៅខាងក្រៅកិច្ចប្រជុំនេះ រដ្ឋមន្ត្រីការពារជាតិអាមេរិកលោក ឡយ អូស្ទីន (Lloyd Austin) និងរដ្ឋមន្ត្រីការពារជាតិចិនលោកឧត្តមសេនីយ៍ វ៉េ ហ្វឹងហេ (Wei Fenghe) ត្រូវបានគេរំពឹងថា នឹងជួបផ្ទាល់ទល់មុខគ្នាជាលើកដំបូងចាប់តាំងពីប្រធានាធិបតីលោក Joe Biden ចូលកាន់តំណែងអស់រយៈពេលជាង២ឆ្នាំកន្លងមកនេះ។
មន្ត្រីជាន់ខ្ពស់អាមេរិកម្នាក់បាននិយាយថា តាមការយល់ឃើញរបស់អាមេរិក សហរដ្ឋអាមេរិករំពឹងថា ខ្លឹមសារនៃកិច្ចប្រជុំនោះនឹងផ្តោតលើការគ្រប់គ្រងការប្រកួតប្រជែងក្នុងបញ្ហាតំបន់ និងពិភពលោក។ ហើយប្រព័ន្ធផ្សព្វផ្សាយចិនក៏បាននិយាយដែរថា ទីក្រុងប៉េកាំងនឹងប្រើប្រាស់កិច្ចប្រជុំនេះ ដើម្បីពិភាក្សាពីកិច្ចសហប្រតិបត្តិការជាមួយសហរដ្ឋអាមេរិក។
ក្នុងកិច្ចប្រជុំកំពូលនោះដែរ លោក Austin រដ្ឋមន្ត្រីការពារជាតិអាមេរិក និងលោក Wei រដ្ឋមន្ត្រីការពាជាតិចិន ទំនងជានឹងថ្លែងសុន្ទរកថារៀងៗខ្លួន ដើម្បីបញ្ជាក់ឡើងវិញនូវការប្តេជ្ញាចិត្តរបស់ពួកគេចំពោះតំបន់អាស៊ីប៉ាស៊ីហ្វិក ហើយក៏នឹងប្រើសុន្ទរកថាដដែលនេះ ចង្អុលបង្ហាញក្នុងទិសដៅផ្សេងទៀតផងដែរ។
ទំនាក់ទំនងរវាងចិន និងសហរដ្ឋអាមេរិកមានភាពតានតឹងនឹងគ្នានៅក្នុងពេលប៉ុន្មានខែថ្មីៗនេះ ដោយប្រទេសដែលមានសេដ្ឋកិច្ចធំបំផុតក្នុងពិភពលោកទាំង២នេះ បានប៉ះទង្គិចគ្នានៅក្នុងសំណុំរឿងជាច្រើន រាប់តាំងពីការបង្កហេតុរបស់ចិនចំពោះកោះតៃវ៉ាន់ និងសកម្មភាពយោធាចិននៅសមុទ្រចិនខាងត្បូង រហូតដល់ការប៉ុនប៉ងរបស់ទីក្រុងប៉េកាំង ដើម្បីពង្រីកឥទ្ធិពលនៅក្នុងតំបន់ប៉ាស៊ីហ្វិកផងដែរ។
អត្ថបទគួរអាន
ទោះបីជាកិច្ចប្រជុំកំពូលនេះផ្តោតលើបញ្ហាសន្តិសុខអាស៊ីក៏ពិតមែនប៉ុន្តែការឈ្លានពានរបស់រុស្ស៊ីទៅលើអ៊ុយក្រែននឹងនៅតែជាចំណុចសំខាន់នៃកិច្ចពិភាក្សានេះផងដែរ។ សង្គ្រាមនេះបានសម្លាប់មនុស្សរាប់ម៉ឺននាក់ ធ្វើឱ្យមនុស្សរាប់លាននាក់រត់ចោលផ្ទះសម្បែង និងធ្វើឱ្យទីក្រុងតូចធំមួយចំនួនក្លាយជាគំនរបាក់បែក ហើយមកពលពេលនេះ សង្គ្រាមនៅអ៊ុយក្រែននេះក៏បានអូសបន្លាយមកជាង៣ខែផងដែរ។
ប្រទេសអ៊ុយក្រែននឹងបញ្ជូនគណៈប្រតិភូមួយក្រុមទៅចូលរួមកិច្ចប្រជុំកំពូលសន្ដិសុខអាស៊ីនេះដែរ ប៉ុន្តែមន្ត្រីរបស់រុស្ស៊ីនឹងមិនចូលរួមនោះទេ។ នេះបើតាមប្រភពដែលដឹងពីការចុះឈ្មោះអ្នកចូលរួមកិច្ចប្រជុំនេះ។
អ្នកជំនាញភូមិសាស្ត្រនយោបាយរបស់ប្រទេសសិង្ហបុរីបាននិយាយថា អាមេរិកនឹងប្រើឱកាសនេះ ដើម្បីរិះគន់ខ្លាំងៗទៅភាពជាដៃគូយុទ្ធសាស្ត្ររបស់ចិនជាមួយរុស្ស៊ី។ បន្ថែមពីនេះ អ្នកជំនាញសង្កត់ធ្ងន់ទៀតថា អាមេរិកអាចនឹងធ្វើការសន្និដ្ឋានមួយចំនួនពីភាពជាដៃគូរវាងចិន និងរុស្ស៊ីថា ជាសម្ព័ន្ធភាពផ្ដាច់ការមួយក្រុម ហើយប្រទេសចិននឹងការពារទំនាក់ទំនងរបស់ខ្លួនជាមួយរុស្ស៊ី នៅក្នុងគោលជំហរ និងគោលនយោបាយក្នុងការឆ្លើយតបនឹងប្រទេសអ៊ុយក្រែន៕
អត្ថបទ៖ សុខ ជា
None
