រដ្ឋមន្ត្រីក្រសួងរតនាគារអាម៉េរិក លោកស្រី ជេណេត យេឡេន (Janet Yellen) បានចាត់ទុកកំណើនក្នុងត្រីមាសទីបីឆ្នាំនេះ គឺបានបង្ហាញពីការដំណើរដ៏រឹងមាំរបស់សេដ្ឋកិច្ចអាម៉េរិក បើទោះបីសេដ្ឋកិច្ចសកលស្ថិតក្នុងស្ថានភាពមិនច្បាស់លាស់ ដែលបង្កឡើងដោយវិបត្តិសកល និងសង្គ្រាមនានាក៏ដោយ។
ទន្ទឹមនឹងស្ថានភាពសេដ្ឋកិច្ចមានដំណើរការល្អ កម្រិតអតិផរណានៅក្នុងប្រទេសមហាសេដ្ឋកិច្ចពិភពលោកផុតលេខមួយនេះ ក៏បានបង្ហាញទំនោរធ្លាក់ចុះមកវិញបន្តិចផងដែរ។
ថ្នាក់ដឹកនាំរូបនេះមិនរំពឹងថា ស្ថានភាពសេដ្ឋកិច្ចរបស់អាម៉េរិក មានកំណើនក្នុងល្បឿនដ៏លឿនបែបនេះនោះទេ។ យ៉ាងណាក៏ដោយ អ្នកជំនាញខាងសេដ្ឋកិច្ចរូបនេះ មិនទាន់អាចវាយតម្លៃពីភាពប្រាកដប្រជានៃសេដ្ឋកិច្ចរបស់អាម៉េរិក នៅពេញមួយឆ្នាំនេះបាននៅឡើយទេ ដ្បិតលោកស្រីមិនរំពឹងថា សេដ្ឋកិច្ចអាម៉េរិក អាចបន្តជាមួយកំណើនក្នុងល្បឿននេះនោះទេ។ ម្យ៉ាងទៀតលោកស្រី មើលឃើញថា សម្រាប់ រយៈពេលទៅមុខវាអាចមានបញ្ហាមួយចំនួនអាចជះឥទ្ធិពលដល់ការរំពឹងទុកនៃស្ថានភាពសេដ្ឋកិច្ចអាម៉េរិក។
អត្ថបទគួរអាន
ការលើកឡើងបែបនេះរបស់លោកស្រី ជេណេត យេឡេន ធ្វើឡើងនៅប៉ុន្មានម៉ោងបន្ទាប់ពីទិន្នន័យបង្ហាញថា សេដ្ឋកិច្ចអាម៉េរិក បានកើនឡើងក្នុងអត្រាជិត៥% នៅក្នុងត្រីមាសទីបីឆ្នាំនេះ ដែលជាល្បឿនលឿនបំផុតក្នុងរយៈពេលជិតពីរឆ្នាំ ខណៈកាលពីត្រីមាសទីពីរសេដ្ឋកិច្ចអាម៉េរិក មានកំណើនត្រឹមតែ២,១%ប៉ុណ្ណោះ។
កំណើននេះ ត្រូវបានជំរុញដោយភាពរឹងមាំនៃការចំណាយរបស់អតិថិជន បានជួយជំរុញ និងគាំទ្រឱ្យទីផ្សារការងារនៅសហរដ្ឋអាម៉េរិកមានរឺងមាំ និងស្ថិរភាពល្អ។
ភាពអត់ការងារធ្វើនៅក្នុងសហរដ្ឋអាម៉េរិក បានធ្លាក់ចុះក្រោម៤ភាគរយនៅ២០ខែជាប់ៗគ្នា ហើយភាគរយនៃការចូលរួមនៅក្នុងកម្លាំងពលកម្មត្រូវបានពង្រីក ទោះបីជាយុទ្ធនាការដំឡើងអត្រាការប្រាក់ ដ៏អាក្រក់បំផុតរបស់ធនាគារកណ្តាលរបស់ប្រទេសនេះ នៅមិនទាន់បន្ធូរបន្ថយក៏ដោយ។
សញ្ញាវិជ្ជមានមួយផ្សេងទៀតដែលជាបច្ច័យនាំឲ្យអាម៉េរិកសម្រេចបានសមិទ្ធផលសេដ្ឋកិច្ចបែបនេះ គឺវិធានការតាមដានយ៉ាងជិតស្និទ្ធនៃអតិផរណាមូលដ្ឋាន ដែលមកដល់ពេលនេះបានចុះដល់កម្រិតទាបបំផុតចាប់តាំងពីឆ្នាំ២០២០៕
ដោយៈ សរ សុជាតិ
None
