មន្ត្រីរដ្ឋបាលអាមេរិកបានបង្ហើបឲ្យដឹងនៅមុនថ្ងៃប្រជុំថា លោកចូ បៃឌិន នឹងយករឿងដែលចិនផ្គត់ផ្គង់ទាំងសេដ្ឋកិច្ច និងយោធាឲ្យរុស្ស៊ីឈ្លានពានអ៊ុយក្រែន មកដាក់លើតុពិភាក្សាជាមួយសម្ព័ន្ធមិត្ត ដើម្បីស្វែងរកការឆ្លើយតបសមរម្យមួយចំពោះទង្វើរបស់ទីក្រុងប៉េកាំង។
ក្រៅពីនេះ សហរដ្ឋអាមេរិក និងសម្ព័ន្ធមិត្តនឹងពិភាក្សាអំពីការផ្តល់សព្វាវុធ និងជំនួយមនុស្សធម៌ដល់អ៊ុយក្រែន ក៏ដូចជាពិភាក្សាវិបត្តិជនភៀសខ្លួននៅអ៊ុយក្រែន ក្នុងកិច្ចប្រជុំកំពូលរបស់អង្គការណាតូ កិច្ចប្រជុំនៃក្រុមប្រទេសសេដ្ឋកិច្ចរីកចម្រើនទាំងប្រាំពីរ រួមទាំងកិច្ចប្រជុំក្រុមប្រឹក្សាអឺរ៉ុបនៅថ្ងៃព្រហស្បតិ៍ទី២៤មីនា ពោលគឺនៅសប្តាហ៍នេះតែម្ដង។
មិនដូចកាលពីរដ្ឋបាលអាមេរិកចាស់នោះទេ ដែលទំនងជាសំដៅដល់ជំនាន់លោកដូណាល់ត្រាំ មន្ត្រីជាន់ខ្ពស់អាមេរិកមួយរូបទៀតបានបង្ហើបប្រាប់ទីភ្នាក់ងាររ៉យទ័រថា ដោយសារតែភាពជោគជ័យនៃការរួមសាមគ្គីគ្នាយ៉ាងជិតស្និទ្ធ លើការដាក់ទណ្ឌកម្មសេដ្ឋកិច្ច ការនាំចេញ និងវិធានការពាណិជ្ជកម្ម ដែលដាក់លើប្រទេសរុស្ស៊ី បាននាំឱ្យអឺរ៉ុប និងសហរដ្ឋអាមេរិកកាន់តែជិតស្និទ្ធជាមួយគ្នាថែមទៀត។ បន្ថែមពីលើនេះ មេដឹកនាំនៃប្រទេសប្រជាធិបតេយ្យទាំងអស់កំពុងមានការព្រួយបារម្ភកាន់តែខ្លាំងឡើង អំពីតួនាទីដ៏មានសក្តានុពលរបស់ប្រទេសចិននៅក្នុងជម្លោះរវាងរុស្ស៊ី និងអ៊ុយក្រែននេះ។
អត្ថបទគួរអាន
គួរជម្រាបថា បណ្តាប្រទេសនៅអឺរ៉ុប និងសហរដ្ឋអាមេរិកបានធ្វើការងារជាច្រើនសប្តាហ៍មកហើយ ដើម្បីព្យាយាមបញ្ចុះបញ្ចូលទីក្រុងប៉េកាំង មិនឱ្យគាំទ្រទង្វើឈ្លានពានរបស់លោកពូទីន មកលើអ៊ុយក្រែន ដោយសារទាហានរុស្ស៊ីបាននិងកំពុងសម្លាប់អាយុជីវិតជនស៊ីវិលរាប់រយនាក់ បំផ្លិចបំផ្លាញទីក្រុង និងមនុស្សរាប់លាននាក់បានផ្លាស់ទីលំនៅ និងភៀសខ្លួនចេញពីប្រទេស។
សូមជម្រាបថា ចិនបានបដិសេធជាច្រើនលើកច្រើនសារមកហើយថា ខ្លួនមិនដែលបានគាំទ្ររុស្ស៊ីឲ្យឈ្លានពានអ៊ុយក្រែនឡើយ។ ជាក់ស្តែង ឯកអគ្គរដ្ឋទូតចិនប្រចាំសហរដ្ឋអាមេរិក លោក ឈិន កាំង បានប្រាប់សារព័ត៌មាន CBS News កាលពីថ្ងៃអាទិត្យសប្តាហ៍មុន ដោយបានច្រានចោលម្តងទៀតថា ប្រទេសចិនមិនបានបញ្ជូនអាវុធ ឬជំនួយហិរញ្ញវត្ថុទៅឱ្យប្រទេសរុស្ស៊ីនោះទេ។ ប្រទេសចិន តែងតែអំពាវនាវឲ្យប្រទេសជម្លោះទាំងពីរ គឺរុស្ស៊ី និងអ៊ុយក្រែនមានកិច្ចចរចាដោយសន្ដិវិធី ដើម្បីឈានទៅបញ្ចប់សង្គ្រាមឲ្យបានឆាប់ផងដែរ៕
None
