របាយការណ៍សម្ងាត់បំផុត ដែលជាលទ្ធផលនៃការសិក្សាស៊ើបអង្កេតរបស់ភ្នាក់ងារអាមេរិក នៅតែមិនអាចបំភ្លឺបានច្បាស់លាស់ពីប្រភពដើមនៃកូវីដ១៩ ក៏ដូចជាមិនបានឆ្លើយតបនឹងចម្ងល់ជាច្រើនផ្សេងទៀតដូចគ្នា។ ជាក់ស្តែង វាគ្រាន់តែអាចជម្រះការសង្ស័យខ្លះៗ ព្រមទាំងបានច្រានចោលនូវសេណារីយ៉ូមួយចំនួន។
បើតាមការចុះផ្សាយដោយទីភ្នាក់ងារសារព័ត៌មាន AP ការសន្និដ្ឋានចុងក្រោយរបស់ទីភ្នាក់ងារស៊ើបការសម្ងាត់អាមេរិក បង្ហាញថា វីរុសកូរ៉ូណា ជាវិរុសមួយដែលបង្កជាជំងឺកូវីដ១៩បច្ចុប្បន្ន មិនមែនកើតចេញពីការផលិតឡើងបែបសិប្បនិម្មិតសម្រាប់ប្រើជាអាវុធជីវសាស្ត្រនោះទេ។
អត្ថបទគួរអាន
អាចនិយាយបានថា ជាការខកចិត្ត ឬភាពអាម៉ាសមួយដែរ របស់អាមេរិក ដែលមកដល់ពេលនេះទៅហើយ ប្រទេសមហាអំណាចពិភពលោកលេខ១នេះ នៅតែមិនអាចផ្តល់ចម្លើយពិតប្រាកដច្បាស់លាស់មួយពីប្រភពដើមនៃជំងឺឆ្លងដ៏កាចសាហាវកូវីដមួយនេះ ថាវាពិតជាឆ្លងពីសត្វមក មនុស្ស ដូចលទ្ធផលស្រាវជ្រាវរបស់ WHO ពិតមែន ឬមួយ វាមកពីសេណារីយ៉ូ លេចធ្លាយចេញពីមន្ទីរពិសោធន៍ ដូចអ្វីដែលអាមេរិកតែងតែចោទប្រកាន់កន្លងមកនោះទេ។
យ៉ាងណាមិញ ជុំវិញទៅនឹងបញ្ហាដែលនៅតែមិនអាចរកឃើញពីប្រភពដើមរបស់កូវីដ១៩ ប្រធានាធិបតីអាមេរិកលោកចូ បៃឌិន កាលពីពេលថ្មីៗនេះ បានចេញមុខ មកបរិហារចិនថាបានបិទបាំងព័ត៌មាន និង ទិន្នន័យសំខាន់ៗស្តីពីប្រភពដើមនៃជំងឺកូវីដ មិនឲ្យអ្នកស៊ើបអង្កេតអន្តរជាតិ និងអង្គការសុខភាពពិភពលោកដឹងឡើយ។
ចិនចេញមុខឆ្លើយតប និង ច្រានចោលការស៊ើបអង្កេតរបស់អាមេរិក
ភ្លាមៗក្រោយលទ្ធផលស៊ើបអង្កេត និងក្រោយការចោទប្រកាន់ពីប្រធានាធិបតីអាមេរិក មន្រ្តីសុខាភិបាលជាន់ខ្ពស់ចិនមួយរូបបានច្រានចោលរបាយការណ៍របស់សហរដ្ឋអាមេរិកដែលស្តីបន្ទោសប្រទេសចិនចំពោះការរាំងខ្ទប់ការស៊ើបអង្កេតទៅលើប្រភពដើមនៃវីរុសកូរ៉ូណា។ នេះបើតាមសារព័ត៌មានរដ្ឋចិនស៊ិនហួរដែលបានចុះផ្សាយ។
លោក ហ្សេង អ៊ីស៊ីន (Zeng Yixin) អនុប្រធានគណៈកម្មការសុខភាពជាតិចិន បាននិយាយថា ប្រទេសចិនប្រឆាំងនឹងការយកប្រភពដើមនៃមេរោគកូវីដ១៩មកធ្វើជាហេតុផលនយោបាយ។ មន្ត្រីជាន់ខ្ពស់ចិនរូបនេះដដែលថែមទាំងបានចោទថា ក្រុមចារកម្មអាមេរិកត្រូវនយោបាយដឹកច្រមុះ មានគំនិតចង់តែទម្លាក់កំហុសដាក់មកលើប្រទេសចិន។
សូមរំឭកថា ភាគីចិនកាលពីពេលថ្មីៗនេះក៏បានច្រានចោលជាថ្មីម្តងទៀតផងដែរ នូវការស្នើរបស់អង្គការសុខភាពពិភពលោក ជុំវិញការស៊ើបអង្កេតលើកទីពីរក្នុងទឹកដីប្រទេសចិន ស្តីអំពីប្រភពដើមរបស់កូវីដ១៩នេះ។ ភាគីចិនបានបង្វែរឲ្យ WHO ទៅស៊ើបអង្កេតនៅប្រទេសដទៃផ្សេងផង ជាជាងស្វែងរកតែនៅក្នុងប្រទេសចិន៕
None
