ទាហានហ្វីលីពីន និងអាមេរិកជិតចំនួន ៩ពាន់នាក់នឹងចូលរួមក្នុងសមយុទ្ធយោធារយៈពេល ១២ ថ្ងៃនៅលើកោះធំ Luzon នៃប្រទេសហ្វីលីពីន។ ស្ថានទូតអាមេរិកបាននិយាយនៅក្នុងសេចក្តីថ្លែងការណ៍មួយថា សមយុទ្ធដែលចាប់ផ្តើមពីថ្ងៃទី ២៨ ខែមីនាតទៅ នឹងគ្របដណ្តប់លើផ្នែកសន្តិសុខដែនសមុទ្រ ការហ្វឹកហ្វឺនបាញ់គ្រាប់ពិត ការប្រឆាំងភេរវកម្ម និងជំនួយមនុស្សធម៌ ព្រមទាំងការសង្គ្រោះគ្រោះមហន្តរាយ។
ឧត្តមសេនីយ Jay Bargeron មេបញ្ជាការកងម៉ារីនទី ៣ របស់សហរដ្ឋអាមេរិក បាននិយាយថា ភាគីទាំងពីរនឹងហ្វឹកហាត់រួមគ្នា ដើម្បីពង្រីក និងជំរុញយុទ្ធសាស្ត្រ បច្ចេកទេស និងនីតិវិធីរួមគ្នា ដែលពង្រឹងសមត្ថភាពឆ្លើយតប និងការត្រៀមខ្លួនសម្រាប់បញ្ហាប្រឈមក្នុងពិភពលោក។
សូមជម្រាបថា សមយុទ្ធនាពេលថ្មីៗរវាងសម្ព័ន្ធមិត្តដ៏យូរអង្វែងនេះ ក៏នឹងផ្តោតលើជម្លោះដែលអាចកើតមាននៅក្នុងសមុទ្រចិនខាងត្បូងផងដែរ ខណៈទីក្រុងប៉េកាំងតែងតែទាមទារស្ទើរតែទាំងស្រុងនូវតំបន់ជម្លោះនេះ។
ភាពតានតឹងរវាងទីក្រុងម៉ានីល និងទីក្រុងប៉េកាំងបានកើនឡើងកាន់តែខ្លាំងកាលពីសប្តាហ៍មុន បន្ទាប់ពីហ្វីលីពីនបានប្រឈមមុខនឹងឯកអគ្គរដ្ឋទូតចិនទាក់ទិននឹងកប៉ាល់កងទ័ពជើងទឹកចិន ដែលត្រូវបានចាប់ដោយខុសច្បាប់នៅក្នុងដែនទឹកប្រជុំកោះរបស់ខ្លួន។
អត្ថបទគួរអាន
យ៉ាងណាមិញ បើទោះបីជាហ្វីលីពីន និងអាមេរិកសម្រេចធ្វើសមយុទ្ធនឹងគ្នាក៏ពិតមែន ប្រធានាធិបតីហ្វីលីពីនលោក Rodrigo Duterte ក៏បានសម្តែងការព្រួយបារម្ភផងដែរ កាលពីថ្ងៃច័ន្ទដើមសប្ដាហ៍នេះ ខណៈប្រទេសហ្វីលីពីនមានជាប់ពាក់ព័ន្ធនៅក្នុងជម្លោះ ដោយសារតែសម្ព័ន្ធភាពសន្តិសុខរបស់ខ្លួនជាមួយសហរដ្ឋអាមេរិក។ ក្នុងនោះរាប់បញ្ចូលទាំងសន្ធិសញ្ញាការពារទៅវិញទៅមក និងការអនុញ្ញាតឱ្យយោធាអាមេរិករក្សាទុកឧបករណ៍ការពារជាតិ និងការផ្គត់ផ្គង់នៅលើមូលដ្ឋានហ្វីលីពីនមួយចំនួន៕
អត្ថបទ៖ វ៉ាន់ ស្រីរ័ត្ន
None
