កងទ័ពអ៊ុយក្រែនបាននិយាយថា វរសេនីយ៍ឯក អាឡិកសេ សារ៉ូវ (Alexei Sharov) ដែលដឹកនាំកងពលតូចថ្មើរជើងលេខ ៨១០ របស់រុស្ស៊ីត្រូវបានសម្លាប់នៅក្នុងការប្រយុទ្ធគ្នានៅទីក្រុងម៉ារីអូប៉ូល (Mariupol) កាលពីដើមសប្តាហ៍នេះ។
ប៉ុន្តែរហូតមកដល់ពេលនេះកងទ័ពរុស្ស៊ីមិនទាន់បានបញ្ជាក់ពីការស្លាប់របស់មេដឹកនាំយោធារបស់ខ្លួនរូបនេះនៅឡើយទេ នេះគឺជាការស្លាប់លើកទី១៥ហើយនៅក្នុងចំណោមមន្ត្រីយោធាគ្រាក់ៗរបស់រុស្ស៊ីជាច្រើនរូបទៀត ចាប់តាំងពីសង្គ្រាមនៅប្រទេសអ៊ុយក្រែនបានចាប់ផ្ដើមអស់រយៈពេល១ខែមកនេះ។
មន្ត្រីពីប្រទេសលោកខាងលិចបាននិយាយថា ចំនួនឧត្តមសេនីយយោធារុស្ស៊ីដែលបានស្លាប់នៅក្នុងប្រទេសអ៊ុយក្រែននេះបង្ហាញថា រុស្ស៊ីកំពុងទទួលការបាត់បង់យ៉ាងធ្ងន់ធ្ងរបំផុតក្នុងចំណោម មន្ត្រីទូទៅ ចាប់តាំងពីសង្គ្រាមលោកលើកទី២មក ដែលសម័យនោះមានឧត្តមសេនីយ៍គ្រាក់ៗរុស្ស៊ីស្លាប់ត្រឹមតែចំនួន ៥នាក់ប៉ុណ្ណោះ។
នៅក្នុងចំណោមអ្នកដែលបានស្លាប់ក្នុងសង្គ្រាមនៅអ៊ុយក្រែនទាំងនេះ ក៏មានមន្ត្រីយោធាសំខាន់ៗចំនួន ២រូបផងដែរ។ ទី១ គឺលោកឧត្តមសេនីយឯក វីតាលី ជេរ៉ាស៊ីម៉ូវ (Vitaly Gerasimov) ដែលជាឧត្តមសេនីយផ្កាយមួយ ដែលទទួលបានមេដាយសម្រាប់ការចូលរួមក្នុងយុទ្ធនាការយោធារបស់រុស្ស៊ីនៅប្រទេសស៊ីរី នៅសាធារណរដ្ឋឆេឆេនី និងនៅតំបន់គ្រីមៀ ហើយលោកត្រូវបានគេរាយការណ៍ថា ត្រូវបានសម្លាប់នៅជាយក្រុងខាកៀវនៅប្រទេសអ៊ុយក្រែនកាលពីថ្ងៃទី៨ ខែមីនា។
អត្ថបទទាក់ទង
ទី២គឺលោកឧត្តមសេនីយ៍ អេនដ្រេយ៍ ស៊ូខូវវ៉េតស្គី (Andrey Sukhovetsky) ដែលជាមេបញ្ជាការកងកម្លាំងពិសេស ដែលបានក្លាយជាឧត្តមសេនីយ៍រុស្ស៊ីដំបូងគេ ដែលបានស្លាប់នៅក្នុងប្រទេសអ៊ុយក្រែនដែរ។
មន្ត្រីជំនាញការខាងយោធាបាននិយាយថា អត្រានៃការបាត់បង់មន្ត្រីកំពូលៗក្នុងពេលបំពេញបេសកកម្មបង្ហាញថា ក្រុមមន្ត្រីជាន់ខ្ពស់ត្រូវបានបង្ខំចិត្តឱ្យផ្លាស់ប្ដូរទៅកាន់ខ្សែត្រៀមជួរមុខ ដោយសារការទាក់ទងមិនសូវល្អ និងកង្វះវិន័យនៅក្នុងជួរកងទ័ពរបស់រុស្ស៊ី។
យោងតាមសារព័ត៌មាន Bellingcat របស់ហូឡង់បានបង្ហាញថា ការស្លាប់របស់មេទ័ពកំពូលទាំងពីររូបនេះខាងលើនេះ វាអាចបណ្ដាលមកពីបញ្ហាបច្ចេកទេសនៃទំនាក់ទំនងគ្នារវាងមន្ត្រីយោធាតាមរយៈបណ្តាញរលកធាតុអាកាស ដែលអាចកងកម្លាំងអ៊ុយក្រែនលួចស្ទាក់ចាប់ និងស្ដាប់ឭក្នុងពេលបញ្ជាឱ្យធ្វើការវាយប្រហារតាមគោលដៅទៅលើប៉ុស្តិ៍បញ្ជាការ។
ដោយឡែក កាលពីថ្ងៃទី២០ ខែមីនា លោក មីខៃឡូ ប៉ូដូលីកា (Mykhailo Podolyka) ទីប្រឹក្សាលោកប្រធានាធិបតីអ៊ុយក្រែនបានអះអាងថា ឧត្តមសេនីយ៍រុស្ស៊ី៦នាក់ត្រូវបានសម្លាប់ ហើយទំហំនៃការបាត់បង់នេះបង្ហាញថា កងទ័ពរុស្ស៊ី «មិនទាន់ត្រៀមខ្លួនពេញលេញនៅឡើយទេគឺពឹងផ្អែកលើតួលេខនិងការបាញ់ផ្លោងមីស៊ីលតែប៉ុណ្ណោះ។
មកទល់ពេលនេះ មិនទាន់មានរបាយការណ៍ថ្មីពីរដ្ឋាភិបាលរុស្ស៊ី បង្ហាញពីចំនួនកងទ័ពរុស្ស៊ី ដែលត្រូវបានស្លាប់នៅក្នុងសង្គ្រាមនៅអ៊ុយក្រែនៅឡើយទេ។ ប៉ុន្ដែ បើតាមយោធាអ៊ុយក្រែនបានអះអាងថា កងទ័ពរុស្ស៊ីជាង១ម៉ឺន៥ពាន់នាក់ហើយដែលបានស្លាប់នៅក្នុងសង្គ្រាមនៅអ៊ុយក្រែន ដែលមានចំនួនប្រហែលនឹងការស្លាប់ទាហាននៅក្នុងសង្គ្រាមរបស់អតីតសហភាពសូវៀត នៅប្រទេសអាហ្វហ្គានីស្ថានដែរ។ ប៉ុន្ដែ ខាងអ៊ុយក្រែន ក៏មិនបានបង្ហាញពីតួលេខទាហានរបស់ខ្លួនដែលបានស្លាប់នោះដែរ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
