គេនៅចាំបានថា ចំពេល និងក្រោយពេលដំណើរទស្សនកិច្ចរបស់ប្រធានសភាអាមេរិក លោកស្រីណេនស៊ី ផេឡូស៊ី មកកាន់កោះតៃវ៉ាន់ ប្រទេសចិនបានប្រតិកម្មខឹងសម្បារយ៉ាងខ្លាំង ព្រោះទីក្រុងប៉េកាំងតែងចាត់ទុកដែនកោះនេះ ជាខេត្តមួយរបស់ខ្លួន ហើយជាការឆ្លើយតប ទីក្រុងប៉េកាំងបានធ្វើសមយុទ្ធទ្រង់ទ្រាយធំមិនធ្លាប់មានជុំវិញដែនកោះមួយនេះតែម្តង។ យ៉ាងណាមិញ ការធ្វើសកម្មយោធានេះនៅតែបន្ត គ្រាន់តែក្នុងលក្ខណៈតូចជាមុន។ ពាក់ព័ន្ធនឹងស្ថានការណ៍វិវត្តិចុងក្រោយនៅកោះតៃវ៉ាន់នេះដែរ លោក អូស្ទីន រដ្ឋមន្ត្រីការពារជាតិអាមេរិកបានផ្តល់បទសម្ភាសន៍មួយជាមួយសារព័ត៌មាន CNN ដោយលោកបានអះអាងថា «លោកមើលមិនឃើញពីតម្រុយនៃការត្រៀមលុកលុយរបស់ចិនចូលកោះតៃវ៉ាន់នោះទេ»។
ប៉ុន្ដែ អ្វីដែលមន្ត្រីជាន់ខ្ពស់អាមេរិករូបនេះមើលឃើញនោះគឺ ប្រទេសចិនកំពុងធ្វើសកម្មភាពយោធាដើម្បីបង្កើតនូវ «ស្ថានការថ្មី» ក្នុងសំណុំរឿងកោះតៃវ៉ាន់នេះ។ ក្នុងន័យនេះ លោកចង់សំដៅលើសកម្មភាពយោធាចិនបានកើនឡើងជុំវិញកោះតៃវ៉ាន់ ដូចជាយន្តហោះចម្បាំងចិន ព្រមទាំងនាវាចម្បាំងផ្សេងទៀត បានធ្វើការផ្លាស់ទី និងសម្ញែងសាច់ដុំកាន់តែញឹកញាប់នៅក្នុងច្រកសមុទ្រតៃវ៉ាន់ និងដែនការពារអាកាសរបស់កោះនេះជាដើម។
អត្ថបទគួរអាន
ការឆ្លើយតប សហរដ្ឋអាមេរិក និងសម្ព័ន្ធមិត្តនឹងធ្វើសមយុទ្ធជាបន្តបន្ទាប់ ដូចជាការបន្តធ្វើនាវាចរណ៍ឆ្លងកាតច្រកសមុទ្រនេះជារឿយៗ ជាក់ស្ដែង កាលពីថ្ងៃទី ២០ កញ្ញា កន្លងទៅ នាវាចម្បាំងអាមេរិក និងកាណាដា បានធ្វើដំណើររួមគ្នាក្នុងច្រកសមុទ្រតៃវ៉ាន់នេះ។
មួយវិញទៀត លោក Lloyd Austin បានបានគូសបញ្ជាក់ដែរថា «ទីក្រុងវ៉ាស៊ីតោន និងសម្ព័ន្ធមិត្តក្នុងតំបន់នឹងធ្វើការរួមគ្នាដើម្បីធានារក្សាបាននូវតំបន់ឥណ្ឌូបាស៊ីហ្វិកសេរី និងបើកចំហ» ហើយអាមេរិកក៏កំពុងបើកបណ្តាញទំនាក់ទំនងយោធាឡើងវិញជាមួយប្រទេសចិនផងដែរ ដែលកាលពីដំណើរទស្សនកិច្ចរបស់លោកស្រី ផេឡូស៊ីកន្លងទៅនោះ ទីក្រុងប៉េកាំងបានកាត់ផ្តាច់ទំនាក់ទំនងយោធាទាំងស្រុងជាមួយអាមេរិក ដើម្បីជាការសងសឹក ដោយការណ៍នេះពិតជាបង្កគ្រោះថ្នាក់យ៉ាងខ្លាំងដូចជា ការគិតខុសផ្នែកយោធាណាមួយជាដើម។
លោក Austin បានលើកឡើងដែរថា លោកបានទាក់ទងគ្នាតាមទូរស័ព្ទ និងដោយផ្ទាល់ជាមួយសមភាគីចិនគឺលោក Wei Fenghe រដ្ឋមន្ត្រីការពារជាតិចិន ដើម្បីពិភាក្សាយល់ព្រមបើកបណ្តាញទំនាក់ទំនងយោធារវាងមេបញ្ជាការប្រទេសទាំងពីរឡើងវិញផងដែរ៕
