ក្រុមហ៊ុនផលិតឱសថ Pfizer បាននិយាយកាលពីថ្ងៃចន្ទ ថា វ៉ាក់សាំងដែលខ្លួនបាននិងកំពុងអភិវឌ្ឍជាមួយដៃគូអាល្លឺម៉ង់ BioNTech SE មានប្រសិទ្ធភាព ៩០% ប្រឆាំងនឹងកូវីដ-១៩ ។ ក្រុមហ៊ុននេះបាននិយាយថា ខ្លួនរំពឹងនឹងទទួលបានទិន្នន័យសុវត្ថិភាពនៅសប្តាហ៍ក្រោយ ដែលខ្លួនត្រូវការចាំបាច់ដើម្បីដាក់ពាក្យស្នើសុំការអនុញ្ញាតឱ្យប្រើប្រាស់ជាបន្ទាន់ ពីរដ្ឋបាលចំណីអាហារនិងឱសថអាមេរិក (FDA) ។
លោករដ្ឋមន្ត្រីសុខាភិបាលអាមេរិក Alex Azar បានផ្តល់បទសម្ភាសន៍តាមបណ្តាញទូរទស្សន៍ជាច្រើន ក្នុងនោះរាប់បញ្ចូលទាំងស្ថានីយទូរទស្សន៍ CNBC នៅព្រឹកថ្ងៃអង្គារនេះដែរ ដែលលោកបានមានប្រសាសន៍ថា រដ្ឋាភិបាលនឹងទទួលបានវ៉ាក់សាំង ២០លានដូស ក្នុងមួយខែ ពីក្រុមហ៊ុន Pfizer ដោយចាប់ផ្តើមពីដំណាច់ខែនេះទៅ ។ សហរដ្ឋអាមេរិកមានកិច្ចសន្យាទឹកប្រាក់ ២ពាន់លានដុល្លារ សម្រាប់វ៉ាក់សាំង Pfizer ចំនួន ១០០លានដូស ។
អត្ថបទទាក់ទង
លោក Azar បាននិយាយថា ការសម្រេចចិត្តចុងក្រោយ គឺអាស្រ័យទៅលើទិន្នន័យប្រសិទ្ធភាពនៃវ៉ាក់សាំង ប៉ុន្តែ ដោយផ្អែកតាមអនុសាសន៍ទៅរដ្ឋាភិបាល គេទំនងជានឹងចាប់ផ្តើមជាមួយនឹងការចាក់ថ្នាំបង្ការរោគដល់មនុស្សចាស់នៅក្នុងមណ្ឌលថែទាំ បុគ្គលិកថែទាំសុខភាព និងអ្នកឆ្លើយបឋម ជាមុនសិន ជាមួយនឹងគោលដៅចាក់វ៉ាក់សាំងពេញលេញ នៅដំណាច់ខែមករា ។
លោក Azar បាននិយាយថា លោករំពឹងថា នឹងទទួលបានវ៉ាក់សាំងបន្ថែមទៀតពីក្រុមហ៊ុនជាគូប្រជែងរបស់ Pfizer ដទៃទៀត ក្នុងពេលឆាប់ៗនេះ រួមទាំងពីក្រុមហ៊ុន Moderna ដែលត្រូវបានគេរំពឹងថា នឹងប្រកាសលទ្ធផលបណ្តោះអាសន្នរបស់ខ្លួន នៅចុងខែនេះ។ លោក Azar បាននិយាយថា "នៅចុងខែមីនា ឬដើមខែមេសា [ឆ្នាំក្រោយ] យើងរំពឹងថា យើងនឹងមានវ៉ាក់សាំងគ្រប់គ្រាន់សម្រាប់ជនជាតិអាមេរិកាំងទាំងអស់ ដែលចង់ចាក់វ៉ាក់សាំង ៕ (ប្រភព៖ រ៉យទ័រ)
