សហរដ្ឋអាមេរិកបានស្នើឱ្យរៀបចំកិច្ចប្រជុំកំពូលជាមួយមេដឹកអាស៊ាន នៅសប្តាហ៍ទី ៣ ក្នុងខែមករា ហើយក៏កំពុងសម្របសម្រួលកាលបរិច្ឆេទជាមួយសមាជិកអាស៊ានផងដែរ។ កិច្ចប្រជុំនេះ នឹងធ្វើឡើងក្រោយពេល រដ្ឋមន្ត្រីការបរទេសសហរដ្ឋអាមេរិក លោក Antony Blinken ធ្វើដំណើរទស្សនកិច្ចទៅកាន់ប្រទេសមួយចំនួនក្នុងតំបន់អាស៊ាន រួមមាន ឥណ្ឌូនេស៊ី និងថៃ នៅខាងធ្នូខាងមុននេះ។
ទោះយ៉ាងណា សហរដ្ឋអាមេរិក ប្រហែលជានឹងមិនអញ្ជើញមេដឹកនាំរបបយោធាមីយ៉ាន់ម៉ា គឺឧត្តមសេនីយ៍ មីន អ៊ុងឡាំង ចូលរួមកិច្ចប្រជុំកំពូលនោះទេ។
សូមជម្រាបថា កិច្ចប្រជុំរបស់ លោក ចូ បៃឌិន និងមេដឹកនាំអាស៊ាន នឹងត្រូវរៀបធ្វើឡើង ចំពេលដែលទីក្រុងប៉េកាំងកំពុងពង្រឹងទំនាក់ទំនងរបស់ខ្លួនជាមួយបណ្តាប្រទេសតំបន់អាស៊ីអាគ្នេយ៍កាន់តែខ្លាំងឡើងៗផងដែរ។ ជាក់ស្ដែង កាលពីថ្ងៃទី ២២ ខែវិច្ឆិកា ប្រទេសចិន និងអាស៊ានបានព្រមព្រៀងគ្នាក្នុងការធ្វើឱ្យប្រសើរឡើងនូវទំនាក់ទំនងរបស់ពួកគេទៅជា "ភាពជាដៃគូយុទ្ធសាស្ត្រគ្រប់ជ្រុងជ្រោយ" ហើយក្នុងនោះប្រធានាធិបតីចិន លោក ស៊ី ជីងពីង ក៏បានបង្ហាញខ្លួនដ៏កម្រក្នុងអំឡុងពេលកិច្ចប្រជុំកំពូលតាមប្រព័ន្ធវីដេអូនៃភាគីទាំងពីរផងដែរ ព្រោះថា ជាធម្មតា នាយករដ្ឋមន្ត្រីចិនលោក លី ឃឺឈាំង ជាតំណាងឱ្យប្រទេសចិននៅក្នុងកិច្ចប្រជុំកំពូលទាក់ទងនឹងអាស៊ាន។អត្ថបទគួរអាន
តែយ៉ាងណាមិញ កាលពីចុងខែ តុលា សហរដ្ឋអាមេរិក និងអាស៊ាន ក៏បានធ្វើកិច្ចប្រជុំកំពូលតាមប្រព័ន្ធអនឡាញផងដែរ ប៉ុន្តែមិនមានប្រទេស មីយ៉ាន់ម៉ា ទេ ហើយនៅក្នុងកិច្ចប្រជុំនោះ សហរដ្ឋអាមេរិកបានប្រកាសនឹងផ្តល់ប្រាក់ចំនួន ១០២ លានដុល្លារដល់សមាជិកអាស៊ាន ដើម្បីគាំទ្រដល់កិច្ចខិតខំប្រឹងប្រែង ក្នុងការដោះស្រាយបញ្ហាជំងឺរាតត្បាតដែលកំពុងបន្តកើតមាន និងបញ្ហាផ្សេងៗទៀត។
គួរឱ្យកត់សម្គាល់ដែរថា លោក ចូ បៃឌិន បាននិងកំពុងព្យាយកយកចិត្តទុកដាក់ និងផ្សះផ្សាទំនាក់ទំនង ព្រមទាំងចាប់ផ្ដើមធ្វើការជាមួយយអាស៊ានឡើងវិញ បន្ទាប់ពីអតីតប្រធានាធិបតីអាមេរិក លោក ដូណាល់ ត្រាំ មិនសូវជាខ្វាយខ្វល់ពីអាស៊ាន ជាពិសេសកិច្ចប្រជុំអាមេរិក-អាស៊ាននេះតែម្ដង ពោលគឺលោក បានចូលរួមកិច្ចប្រជុំកំពូល អាមេរិក-អាស៊ាន តែមួយដងគត់ក្នុងឆ្នាំ ២០១៧៕
អត្ថបទ ស៊ើង និមល់
None
