វៀតណាម នឹងផ្ដោតអាទិភាពលើគម្រោងដឹកជញ្ជូនចំនួន ៥៩នៅក្រុងហូជីមិញ ជាមួយទំហំចំណាយជិត១០ពាន់លានដុល្លារ

មន្ទីរដឹកជញ្ជូនក្រុងហូជីមិញ បាននិយាយថា គម្រោងដឹកជញ្ជូនសំខាន់ៗទាំងនេះគ្រោងនឹងចាប់ផ្ដើមសាងសង់ពីឆ្នាំ២០២៤-ឆ្នាំ២០៣០ ហើយមន្ទីរដឹកជញ្ជូនក្រុងហូជីមិញ បានដាក់ជូនគម្រោងនេះទៅគណៈកម្មាធិការប្រជាជនវៀតណាម ដើម្បីពិនិត្យមើលកាលពីថ្ងៃសុក្រសប្ដាហ៍មុនរួចហើយ។

ក្នុងចំណោមគម្រោងដឹកជញ្ជូនទាំងនេះ មានគម្រោងផ្លូវល្បឿនលឿនចំនួន៤ ដោយក្នុងនោះ រួមទាំងគម្រោងផ្លូវតភ្ជាប់ពីក្រុងហូជីមិញ មកកាន់ស្រុកម៉ុកបៃ (Moc Bai) ក្នុងខេត្តតាយនិញ (Tay Ninh) ជាប់ព្រំដែនកម្ពុជាផងដែរ។

បន្ថែមពីនេះ កំណាត់ផ្លូវជាតិមួយចំនួន ដែលរត់ឆ្លងកាត់ទីក្រុងហូជីមិញ នឹងត្រូវបានជួសជុលកែលម្អ និងពង្រីកឱ្យកាន់តែធំដោយគ្រោងនឹងចំណាយថវិកាប្រហែលជាង ១២៣លានដុល្លារ។ អាជ្ញាធរក្រុងហូជីមិញ ត្រូវការថវិកាចំនួនជាង ៥៧៧លានដុល្លារទៀត ដើម្បីបញ្ចប់ផ្លូវក្រវាត់ក្រុងលេខ២ ដែលនឹងជួយសម្រាលការស្ទះចរាចរណ៍រ៉ាំរ៉ៃ និងអនុញ្ញាតឱ្យរថយន្តកុងតឺន័របើកបរលើផ្លូវខ្សែក្រវាត់ក្រុងនេះ។

គម្រោងដឹកជញ្ជូនមួយទៀតនៅក្នុងបញ្ជីនេះដែរ គឺការសាងសង់ស្ពាន ធូ ធៀមទី៤ (Thu Thiem 4) ដែលគេរំពឹងថា នឹងដើរតួនាទីយ៉ាងសំខាន់នៅក្នុងការធ្វើឱ្យប្រសើរឡើង នូវការតភ្ជាប់ជាមួយប៉ែកខាងត្បូងនៃទីក្រុងហូជីមិញ។

មន្ទីរដឹកជញ្ជូនក្រុងហូជីមិញ រំពឹងថា មូលនិធិសាធារណៈនឹងគ្របដណ្ដប់ ៦៨%នៃថវិកាសរុបសម្រាប់គម្រោងដឹកជញ្ជូនទាំង៥៩ខាងលើនេះ។

ទីក្រុងហូជីមិញ មានរថយន្ត និងម៉ូតូបើកបរសរុបជាង៩លានគ្រឿង គឺកើនឡើងជិត៥%បើធៀបនឹងឆ្នាំ២០២២ ហើយហេដ្ឋារចនាសម្ព័ន្ធដឹកជញ្ជូននៅក្នុងទីក្រុងនេះគឺមិនគ្រប់គ្រាន់ទេ ខណៈដែលទីក្រុងនេះ ត្រូវបានចាត់ទុកថា ជាមជ្ឈមណ្ឌលសេដ្ឋកិច្ចរបស់ប្រទេសវៀតណាម៕

អត្ថបទ៖ សុខ ជា