លោក វិសិដ្ឋ ថ្នាក់ដឹកនាំជាន់ខ្ពស់នៃ ក្រុមប្រឹក្សាអ្នកដឹកជញ្ជូនជាតិថៃ បានអះអាងថា នៅពេលដែលលោក ចូ បៃដិន ចូលកាន់តំណែង ជម្លោះពាណិជ្ជកម្មរវាង មហាអំណាចសេដ្ឋកិច្ចអាមេរិក និងចិន អាចនឹងប្រសើរឡើងជាងមុន ដោយភាគីទាំងពីរ នឹងជជែកគ្នា ដើម្បីដកចេញនូវចំណុចខុសគ្នារបស់ពួកគេ។
លោកបន្ថែមថា ផលិតផលនានា ដែលផលិតនៅអាមេរិក នឹងកើនឡើងថ្លៃ ដោយសារតែ លោក បៃដិន សន្យាថា នឹងដំឡើងថ្លៃប្រាក់ឈ្នួលអប្បបរមាសម្រាប់ពលករអាមេរិក ដោយការយកពន្ធលើអាជីវកម្ម និងបុគ្គលិកដែលជាអ្នកមាន។
អត្ថបទទាក់ទង!
ដោយឡែក លោក កាលីន ប្រធានសភាពាណិជ្ជកម្មថៃ បានបញ្ជាក់ថា នៅពេលដែលលោក ចូ បៃដិន ចូលកាន់តំណែង ប្រទេសថៃ នឹងអាចបើកចំហរពាណិជ្ជកម្ម នៅក្នុងទីផ្សារសកលលោក កាន់តែទូលាយ និងសេរីជាងមុនទៅទៀត ជាពិសេសរំពឹងថា អាមេរិក នឹងចូលរួមម្តងទៀតជាមួយនឹងកិច្ចព្រមព្រៀងទូលំទូលាយ និងរីកចម្រើនសម្រាប់ភាពជាដៃគូអន្តរប៉ាស៊ីហ្វិក។
លោក កាលីន បន្តថា ដូច្នេះហើយថៃត្រូវត្រៀមខ្លួនឲ្យបានរួចរាល់ ដើម្បីបន្តការចរចាកិច្ចព្រមព្រៀងពាណិជ្ជកម្មសេរីជាច្រើនទៀត ដូចជា ថៃជាមួយសហភាពអឺរ៉ុប និង ថៃ ជាមួយនឹងប្រទេសអង់គ្លេស។
ជាចុងក្រោយ ប្រធានក្រុមប្រឹក្សាអ្នកដឹកជញ្ជូនជាតិថៃ ក៏បញ្ជាក់ដែរថា បើទោះបីជាអាមេរិក នឹងចូលរួមកិច្ចព្រមព្រៀងទូលំទូលាយ និងរីកចម្រើនសម្រាប់ភាពជាដៃគូអន្តរប៉ាស៊ីហ្វិក ឡើងវិញ ដែលធ្វើឲ្យ ប្លុកពាណិជ្ជកម្មសេរី កាន់តែធំជាងមុន ប្រទេសថៃ អាចនឹងទាក់ទាញយកប្រយោជន៍នៅពេលក្រោយ ព្រោះថា ថៃមិនអាចដាក់ពាក្យស្នើសុំចូលរួម កិច្ចព្រមព្រៀងពាណិជ្ជកម្មមួយនេះ កាលពីខែសីហា កន្លងទៅនោះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
