សារព័ត៌មាន VN Express បានឲ្យដឹងថា ក្រោយពីរដ្ឋាភិបាលវៀតណាមបានអនុម័តបង្កើតមូលនិធិជាតិវ៉ាក់សាំងកូវីដ-១៩មក គេសង្កេតឃើញការបរិច្ចាគថវិកាពីសប្បុរសជន និងអាជីវកម្មនានាបានចូលរួមជាហូរហែ ដែលធ្វើឲ្យចំនួនថវិកាមូលនិធិបានកើនដល់ប្រមាណ ៣៣០លានដុល្លារអាមេរិក ត្រឹមតែរយៈពេល២សប្ដាហ៍ប៉ុណ្ណោះ។
ក្នុងចំណោមថវិកាដែលប្រមូលបាននោះ មានប្រមាណជាង៤៤លានដុល្លារបានមកពីសប្បុរសជននានា ខណៈដែល ២៨៥លានដុល្លារអាមេរិកទៀត គឺក្រុមហ៊ុនគ្រាក់ៗនៅវៀតណាមមួយចំនួនបានសន្យានឹងផ្ដល់ជូនក្នុងពេលឆាប់ៗនេះ។ នេះបើតាមការអះអាងរបស់រដ្ឋមន្ត្រីហិរញ្ញវត្ថុវៀតណាម លោក ហូ ដុក ផុក។
មូលនិធិនេះ អ្នកបរិច្ចាគអាចផ្ដល់មកបានទាំងសាច់ប្រាក់សុទ្ធ និងអាចទិញជាវ៉ាក់សាំងសម្រាប់ផ្ដល់ចូលមកកាន់មូលនិធិ ហើយការទទួលមូលនិធិនេះ គឺទទួលយកតាំងពីសប្បុរសជនក្នុងស្រុក និងក្រៅស្រុក។ ស្ថិតក្រោមការគ្រប់គ្រងដោយក្រសួងហិរញ្ញវត្ថុ មូលនិធិជាតិវ៉ាក់សាំងកូវីដ-១៩ របស់វៀតណាមមួយនេះ នឹងត្រូវប្រើប្រាស់សម្រាប់ការទិញវ៉ាក់សាំងកូវីដ-១៩ ក៏ដូចជាប្រើទៅលើការសិក្សា ក្នុងការផលិតវ៉ាក់សាំងផងដែរ។
អត្ថបទគួរអាន
ក្រុមហ៊ុនដែលបានចូលរួមបរិច្ចាគដល់មូលនិធិជាតិវ៉ាក់សាំងកូវីដ-១៩ ត្រូវបានគេមើលឃើញថា គឺសុទ្ធសឹងជាក្រុមហ៊ុនគ្រាក់ៗរបស់វៀតណាម រួមមានដូចជា ក្រុមហ៊ុនទូរគមនាគមន៍ Viettel, ក្រុមហ៊ុនប្រេង Petrovietnam ក្រុមហ៊ុនអគ្គិសនីរដ្ឋវៀតណាម EVN រួមជាមួយនឹងក្រុមហ៊ុនឯកជនយក្សៗរបស់វៀតណាមផ្សេងទៀត ដូចជា Vingroup, ក្រុមហ៊ុនវិនិយោគទីលានវាយកូនហ្គោល Long Thanh Golf Inventment និងក្រុមហ៊ុនជួញដូរផ្សារភាគហ៊ុនជាដើម។
នាយករដ្ឋមន្ត្រីវៀតណាម លោក ផាម មិញ ជីង និយាយថា មូលនិធិជាតិវ៉ាក់សាំងកូវីដ-១៩ គឺមានគោលបំណងនឹងជួយឲ្យវៀតណាមគ្រប់គ្រងមេរោគរាតត្បាតក្នុងជំហានវែង ខណៈដែលប្រជាជនត្រូវការការចាក់វ៉ាក់សាំងរៀងរាល់ឆ្នាំ។
មកទល់ពេលនេះវៀតណាម មានអ្នកចាក់វ៉ាក់សាំងតែជាង១លាន២សែននាក់ប៉ុណ្ណោះ ពោលគឺមានប្រមាណតែ១% នៃចំនួនប្រជាជនសរុបជតិ១០០លាននាក់។ ភាគច្រើនអ្នកដែលបានចាក់វ៉ាក់សាំង គឺជាអ្នកបម្រើការជួរមុខក្នុងការប្រយុទ្ធប្រឆាំងកូវីដ-១៩ ក្នុងនោះដែរ មានតែជាង៣ម៉ឺននាក់ប៉ុណ្ណោះ ដែលបានចាក់គ្រប់ចំនួន២ដូស៕
