ក្រសួងកសិកម្ម និងអភិវឌ្ឍន៍ជនបទវៀតណាម បានគូសបញ្ជាក់ថា បញ្ហាផ្ទុះឡើងនូវ មេរោគកូវីដ១៩ បានបង្កើតជាឧបសគ្គជាច្រើន នៅក្នុងខ្សែចង្វាក់ផលិតកម្ម និងការជួញដូរទំនិញ ហើយក៏មានបញ្ហាដទៃជាច្រើនទៀតដូចជា គ្រោះរាំងស្ងួត ទឹកប្រៃហូរចូលទឹកសាបនៅតាមដីសណ្តទន្លេមេគង្គ ព្រមទាំងជម្ងឺកាចសាហាវដែលកើតនៅលើ សត្វ និងរុក្ខជាតិដែរនោះ។
ទោះយ៉ាងណាក៏ដោយ វិស័យកសិកម្មវៀតណាម បានកែប្រែគោលនយោបាយ ដើម្បីអាចបត់បែនទៅតាមស្ថានភាពជាក់ស្តែង និងសម្រេចទៅតាមគោលដៅនាំចេញក្នុងឆ្នាំ ២០២០ ឲ្យបាន ៤១ពាន់លានដុល្លារអាមេរិក។
អត្ថបទទាក់ទង!
ជាក់ស្តែង វៀតណាម ជាអ្នកនាំចេញផលិតផលព្រៃឈើ កសិផល និងជលផល ធំជាងគេលំដាប់ទី ២ នៅតំបន់អាស៊ីអាគ្នេយ៍ និងលំដាប់ទី ១៥ នៅទូទាំងសកលលោក ហើយវៀតណាម ក៏មានទីផ្សារនាំចេញជាង ២០០កន្លែង រាប់បញ្ចូលទាំងទីផ្សារយក្សៗ ដូចជា អាមេរិក សហភាពអឺរ៉ុប ជប៉ុន និងចិនជាដើម។
លើសពីនេះ វៀតណាម បានបង្កើតទីផ្សារនាំចេញផ្លែឈើថ្មីៗទៅកាន់ប្រទេសឈីលី ហើយការនាំចេញអង្ករទៅកាន់សហភាពអឺរ៉ុប ក៏មានការផ្ទុះឡើងទាំងបរិមាណ និងតម្លៃ ដោយសារតែតម្រូវការស្តុកទុកចំណីអាហារអំឡុងពេលកូវីដ១៩ មានការកើនឡើងខ្ពស់។
សូមជម្រាបដែរថា សម្រាប់ផលិតផលព្រៃឈើវៀតណាម ក៏ត្រូវបានជំរុញឲ្យមានការលក់នៅលើទីផ្សារអនឡាញដូចជា Alibaba និង Amazon ផងដែរ ដែលរំពឹងនឹងសម្រេចបាន ១២ពាន់លានដុល្លារអាមេរិក ក្នុងឆ្នាំ ២០២០ កើនឡើង ១១%៕
None
