វៀតណាមទទួលបានឱកាសក្នុងវិបត្តិកូវីដ-១៩ ក្នុងការហក់ចូលខ្សែចង្វាក់ផ្គត់ផ្គង់ទីផ្សារសកល

សេដ្ឋកិច្ចវិទូមកពី ធនាគារ​ពិភពលោក​ប្រចាំ​នៅប្រទេស​វៀតណាម​​​បាន​បញ្ជាក់ថា ទំនោរនេះ បានចាប់​ផ្តើម​មុន​វិបត្តិ​កូវីដ-១៩បន្តិច ដោយសារតែ ថៃ្លកម្លាំង​ពលកម្ម​នៅក្នុង​ប្រទេស​ចិន បានកើន​ឡើង​ខ្លាំង ហើយនឹង​ជម្លោះ​ពាណិជ្ជកម្ម​រវាងមហា​អំណាច​សេដ្ឋកិច្ច​ចិន និងអាមេរិក។

លើសពីនេះ ភាពជោគជ័យ​នៃការគ្រប់គ្រង​វិបត្តិ​កូវីដ-១៩ របស់​វៀតណាម ហើយការងើប​ឡើង​វិញ​យ៉ាងលឿន​នៃសេដ្ឋកិច្ច គឺជាចំណុច​ទាក់ទាញ​បំផុតមួយ សម្រាប់​វិនិយោគិន​បរទេស។

វៀតណាម ក៏បានព្យាយាម​ពង្រឹង​បរិយាកាស​វិនិយោគ និងកិច្ច​ចរចា​ពាណិជ្ជកម្ម​សេរី​ជាច្រើន ដែលបាន​ទាក់ទាញ​វិនិយោគិន​មួយ​កម្រិត​ទៀត។

យ៉ាងណាក៏ដោយ សេដ្ឋវិទូ​​ជាច្រើនរូប បានលើកឡើង​ដែរថា វៀតណាម នៅមាន​ចំណុច​ខ្សោយ​ច្រើន ក្នុងការ​ឈានជើងចូល ខ្សែចង្វាក់​ផ្គត់ផ្គង់​ទីផ្សារសកល ពីព្រោះវៀតណាម នៅតែធ្វើ​ឧស្សាហកម្ម​ បែប​សាមញ្ញ និងធម្មតា ខណៈបណ្តា​ប្រទេស​ក្នុង​តំបន់ ដូចជា ហ្វីលីពីន ថៃ និងម៉ាឡេស៊ី បាន​ប្រើប្រាស់​បច្ចេកវិទ្យា​ទំនើប​អស់​ទៅហើយ។

បើសិនជា​ វៀតណាម​ចង់រីកចម្រើន​ជាងនេះ សេដ្ឋកិច្ចវិទូ​បាន​បញ្ជាក់ថា វៀតណាម គួរតែ​អភិវឌ្ឍ​វិស័យ​សេវាកម្ម​បន្ថែម ផ្សាភ្ជាប់​ខ្សែបណ្តាញ​ចង្វាក់​ផ្គត់ផ្គង់​ក្នុង​ស្រុកជា​មុនសិន និងចាប់ផ្តើម​ប្រើប្រាស់​បច្ចេកវិទ្យាថ្មីៗ៕