ការទទូចស្នើសុំរបស់វៀតណាម ដើម្បីទទួលបានការផ្ទេរបច្ចេកវិទ្យាផលិតវ៉ាក់សាំងពីក្រៅប្រទេសយ៉ាងដូច្នេះ គឺចំពេលដែល ការផ្គត់ផ្គង់វ៉ាក់សាំងសកលលោកកំពុងប្រឈមុខនឹងការរាំងស្ទះ ខណៈដែលមកទល់ពេលនេះនៅ វៀតណាមមានប្រជាជនបានចាក់វ៉ាក់សាំងរួចប្រមាណតែជាង១លាននាក់ប៉ុណ្ណោះ នៃចំនួនប្រជាជនសរុបជាង ៩០លាននាក់។ នេះបើតាមការរាយការណ៍ដោយសារព័ត៌មានវៀតណាម VN Express។
ការផ្គត់ផ្គង់វ៉ាក់សាំងនៅទូទាំងសកលលោកកំពុងរាំងស្ទះខ្លាំង ពិសេសតាមរយៈយន្ដការកូវ៉ាក់របស់អង្គការសុខភាពពិភពលោក ដែលជាការផ្គត់ផ្គង់វ៉ាក់សាំងជួយដល់ប្រទេសក្រីក្រ។ ទាក់ទងនឹងការផ្គត់ផ្គត់វ៉ាក់សាំងរាំងស្ទះនេះ ត្រូវបានគេមើលឃើញថា ក៏ដោយសារតែ ប្រទេសឥណ្ឌាដែលជាក្បាលម៉ាស៊ីនផលិតចែកចាយវ៉ាក់សាំងដ៏ធំសម្រាប់យន្ដយការកូវ៉ាក់ កំពុងជួបបញ្ហារលកឆ្លងកូវីដ-១៩យ៉ាងត្រដាបត្រដួស ដែលបង្កឲ្យមានផលប៉ះពាល់ដល់ខ្សែចង្វាក់ផលិតចែកចាយវ៉ាក់សាំង។ តាំងពីផ្ទុះរលកឆ្លងខ្លាំងមក ឥណ្ឌាបានផ្អាកការនាំចេញវ៉ាក់សាំងទៅក្រៅប្រទេស និងទុកសម្រាប់ចាក់ជូនពលរដ្ឋក្នុងស្រុកតែប៉ុណ្ណោះ ទោះយ៉ាងណា វានៅតែមិនគ្រប់គ្រាន់សម្រាប់ឥណ្ឌាដដែល។ យ៉ាងណាក៏ដោយចុះ ថ្មីៗនេះ វិទ្យាស្ថានសេរ៉ូម ដែលជាអ្នកផលិតវ៉ាក់សាំងដ៏ធំមួយរបស់ប្រទេសឥណ្ឌាបានឲ្យដឹងថា ក្រុមហ៊ុនរបស់ខ្លួនរំពឹងថា នឹងអាចផ្គត់ផ្គង់វ៉ាក់សាំងដល់ពិភពលោកឡើងវិញ បាននៅមុនដំណាច់ឆ្នាំ២០២១នេះ។
អត្ថបទទាក់ទង!
ចំពោះប្រទេសវៀតណាមវិញ នៅមួយរយៈចុងក្រោយនេះ បានប្រឹងប្រែងខ្លាំងណាស់ក្នុងការចរចានាំយកបច្ចេកវិទ្យាផលិតវ៉ាក់សាំងពីក្រៅប្រទេសដើម្បីនាំចូលមកផលិតក្នុងប្រទេសខ្លួន ដើម្បីធានាការផ្គត់ផ្គង់វ៉ាក់សាំងក្នុងស្រុកផង និងអាចឈានទៅផ្គត់ផ្គង់ក្នុងតំបន់ផងដែរ។ ប៉ុន្ដែ មកទល់ពេលនេះ នៅមិនទាន់មានដំណឹងផ្លូវការណាមួយថា ខាងភាគីក្រុមហ៊ុនផលិតវ៉ាក់សាំង យល់ព្រមលើសំណើរបស់វៀតណាមនៅឡើយទេ។
កាលពីសប្ដាហ៍មុននេះ រដ្ឋមន្ត្រីការបរទេសវៀតណាម បានលើកថ្លែងថា វៀតណាមបានស្វែងរកការផ្ទេរបច្ចេកវិទ្យាសម្រាប់ការផលិតវ៉ាក់សាំង AstraZeneca ពីចក្រភពអង់គ្លេស ហើយអង់គ្លេសនឹងពិចារណាអំពីសំណើរបស់វៀតណាមនេះ។ មែនទែនទៅ ក្រុមហ៊ុនផលិតវ៉ាក់សាំង AstraZeneca នេះ បានផ្ដល់សិទ្ធឲ្យក្រុមហ៊ុនថៃ ស្យ៉ាម បាយអូសាយអិន (Siam Bioscience) ផលិតវ៉ាក់សាំងនៅក្នុងប្រទេសថៃរួចហើយដែរ ហើយវ៉ាក់សាំងដែលផលិតក្នុងប្រទេសនេះ ក៏បានជាប់ការវាយតម្លៃគុណភាពពីមន្ទីរពិសោធន៍នៅអាមេរិក និងអឺរ៉ុបផងដែរ។ ជាមួយគ្នានេះ រដ្ឋាភិបាលថៃ សង្ឃឹមថាវ៉ាក់សាំង AstraZeneca ដែលផលិតក្នុងស្រុកថៃនេះ នឹងអាចចាក់ជូនពលរដ្ឋខ្លួននៅត្រឹមខែមិថុនាខាងមុខនេះផងដែរ។
ក្រៅតែពីវ៉ាក់សាំង AstraZeneca ប្រទេសវៀតណាម កាលពីសប្ដាហ៍មុននេះ ក៏បានស្វែងរកការផ្ទេរបច្ចេកវិទ្យាផលិតវ៉ាក់សាំងប្រភេទ mRNA ពីក្រៅប្រទេសផងដែរ ដែលបច្ចេកទេសនេះ ត្រូវបានគេប្រើសម្រាប់ការផលិតវ៉ាក់សាំងដូចជា Pfizer-BioNTech និង Moderna ជាដើម។ តំណាងអង្គការសុខភាពពិភពលោកប្រចាំប្រទេសវៀតណាម បានចេញមកបញ្ជាក់ដែរថា អង្គការសុខភាពពិភពលោក កំពុងពិចារណាលើសំណើរបស់វៀតណាមនេះដែរ តែមិនទាន់មានការសម្រេចបែបណានៅឡើយទេ។ កាលពី២សប្ដាហ៍មុននេះ ក្រុមហ៊ុនផលិតវ៉ាក់សាំង Pfizer-BioNTech របស់អាមេរិក និងអាល្លឺម៉ង់ បានសម្រេចជ្រើសយកប្រទេសសិង្ហបុរីជាទីតាំងផលិតវ៉ាក់សាំង និងជាទីស្នាក់ការកណ្ដាលប្រចាំតំបន់អាស៊ីអាគ្នេយ៍។ គម្រោងនេះ នឹងចាប់ផ្ដើមសាងសង់ឡើងនៅក្នុងឆ្នាំនេះ ហើយរំពឹងថា នឹងអាចចាប់ផ្ដើមប្រតិបត្តិការបាននៅឆ្នាំ២០២៣។
ជុំវិញនឹងរឿងវ៉ាក់សាំងនេះ មិនមែនតែសំឡឹងឃើញតែអាមេរិក និងអឺរ៉ុបទេ វៀតណាមក៏កំពុងលើកដៃសុំការគាំទ្រពីរុស្ស៊ីផងដែរ។ បើតាមក្រសួងសុខាភិបាលវៀតណាម បានថ្លែងថា មជ្ឈមណ្ឌលស្រាវជ្រាវរបស់ក្រសួង កំពុងតែចរចាជាមួយនឹងក្រុមហ៊ុនរុស្ស៊ីដែលជាដៃគូ ដើម្បីទទួលបានបច្ចេកវិទ្យាសម្រាប់ការផលិតវ៉ាក់សាំង Sputnik V នៅក្នុងឆ្នាំនេះផងដែរ។ ការផ្ទេរបច្ចេកវិទ្យានេះ នឹងត្រូវធ្វើឡើងជា២ដំណាក់កាល ហើយក្នុងដំណាក់កាលទី១រំពឹងថា នឹងអាចផលិតវ៉ាក់សាំងបានដល់ទៅ ៥០លានដូសក្នុងមួយឆ្នាំ។ វៀតណាម ក៏មានការអនុញ្ញាតឲ្យនាំចូលវ៉ាក់សាំង Sputnik V សម្រាប់ការចាក់ជូនពលរដ្ឋរបស់ខ្លួនផងដែរ។ វ៉ាក់សាំងរបស់រុស្ស៊ីមួយប្រភេទនេះ មានប្រទេសជាង៦៥នៅទូទាំងសកលបានចុះបញ្ជីសម្រាប់ប្រើប្រាស់ចាក់ជូនប្រជាជនរបស់ខ្លួន។
សូមបញ្ជាក់ថា បច្ចុប្បន្ន វៀតណាមបាននិងកំពុងចាក់វ៉ាក់សាំង AstraZeneca ដែលផលិតដោយក្រុមហ៊ុនអង់គ្លេសជាមួយនឹងស៊ុយអែត សម្រាប់កម្មវិធីចាក់វ៉ាក់វ៉ាក់សាំងទ្រង់ទ្រាយធំ។ ដោយឡែក សម្រាប់វ៉ាក់សាំងពីប្រទេសចិនវិញ វៀតណាមហាក់ដូចជាមិនមានទំនោរបញ្ជាទិញពីចិននោះទេ បើទោះបីជាថ្មីៗនេះ វ៉ាក់សាំងចិន Sinopharm ទើបតែអង្គការសុខភាពពិភពលោកប្រកាសទទួលស្គាល់សម្រាប់ការប្រើប្រាស់បន្ទាន់ក៏ដោយ។
ប្រទេសវៀតណាម មកទល់ពេលនេះ បានទទួលវ៉ាក់សាំងប្រមាណ ២លាន៦សែនដូស ក្នុងនោះ មានជិត១២ម៉ឺនដូសបានមកពីការការទិញ និងនៅសល់ប៉ុន្មាន គឺបានមកពីយន្ដការកូវ៉ាក់។
ក្រសួងសុខាភិបាលវៀតណាម បានជាប់គាំងនៅក្នុងការទិញវ៉ាក់សាំង AstraZeneca ៣០លានដូស និងការទទួលបានវ៉ាក់សាំងជិត៣៩លានដូសពីកូវ៉ាក់ក៏កំពុងជាប់គាំងដូចគ្នាដែរ។ វៀតណាម ក៏បានចុះឈ្មោះទិញវ៉ាក់សាំងបន្ថែមពីកម្មវិធីកូវ៉ាក់១០លានដូសទៀតដែរ ក្នុងតម្លៃទាប។ ក្រៅពីនេះ ប្រទេសជិតខាងកម្ពុជាមយយនេះ ក៏បានចុះឈ្មោះទិញ វ៉ាក់សាំង៣១លានដូសពីក្រុមហ៊ុនអាមេរិក Pfizer នៅក្នុងឆ្នាំនេះផងដែរ។
សូមបញ្ជាក់ថា បច្ចុប្បន្ន វៀតណាមក៏កំពុងតែសម្ងំផលិតវ៉ាក់សាំងកូវីដ-១៩ដែរ ដែលមានដល់ទៅ៤ប្រភេទឯណោះ ដែលកំពុងផលិត តែមិនទាន់មានលទ្ធផលផ្លូវការនៅឡើយទេ៕
None
