នាយកនៃនាយកដ្ឋានថាមពល និងរ៉ែនៅក្នុងខេត្ត អាថាពឺ របស់ឡាវ គឺលោក វីថាយ៉ា ផុមម៉ាឆាញ (Vithaya Phommachanh) បានបញ្ជាក់ថា ក្នុងចំណោមទុនវិនិយោគ ៨១៥លានដុល្លារ ដែលប្រទេសវៀតណាមបានវិនិយោគ នៅក្នុងគម្រោងវារីអគ្គិសនី និងរ៉ែ នៅក្នុងប្រទេសឡាវនោះ គឺមានជាង៦៩០លានដុល្លារ បានវិនិយោគនៅក្នុងគម្រោងថាមពលវារីអគ្គិសនីមួយចំនួន ដែលគ្រោងនឹងបញ្ចប់នៅក្នុងឆ្នាំ២០២៥។ ក្នុងចំណោមគម្រោងថាមពលទាំងនោះ ក៏មានរួមបញ្ចូលការវិនិយោគលើថាមពលកម្ដៅ, បន្ទះស្រូបពន្លឺព្រះអាទិត្យសូឡា និងរោងចក្រថាមពលជីវម៉ាស រួមទាំងខ្សែបញ្ជូនអគ្គិសនីមួយចំនួនផងដែរ។
ដោយឡែក ទឹកប្រាក់ជិត៣១លានដុល្លារទៀត គឺត្រូវបានវិនិយោគនៅក្នុងស្ថានីយបំប្លែងថាមពលនៅក្នុងប្រទេសឡាវ ខណៈទឹកប្រាក់ជាង៩៣លានដុល្លារអាមេរិកទៀត គឺបានវិនិយោគនៅក្នុងវិស័យរ៉ែ។
អត្ថបទគួរអាន
បើតាមប្រភព័ត៌មានឡាវ Vientaine Times បានឲ្យដឹងទៀតថា ប្រទេសវៀតណាម បច្ចុប្បន្ន កំពុងដំណើរការគម្រោងវិនិយោគសរុបចំនួន ៤១៧ គម្រោងនៅក្នុងប្រទេសឡាវ ដែលមានតម្លៃសរុបជាង៤ពាន់៣រយលានដុល្លារអាមេរិក ដែលនាំឲ្យវៀតណាម ឈរក្នុងលំដាប់ទី៣ ក្នុងចំណោមប្រទេស និងដែនដីចំនួន៥៤ ដែលបានវិនិយោគនៅក្នុងប្រទេសឡាវ។
យ៉ាងណាមិញ នៅឆ្នាំ២០២១កន្លងទៅនេះ រដ្ឋាភិបាលឡាវ ក៏ទើបតែបានអនុញ្ញាតឲ្យក្រុមហ៊ុនវៀតណាម វិនិយោគនៅក្នុងគម្រោងធំៗចំនួន៣បន្ថែម ដោយក្នុងនោះ មាន២គម្រោងវិនិយោគនៅក្នុងវិស័យរ៉ែ និងមួយគម្រោងទៀតវិនិយោគនៅក្នុងវិស័យធនាគារ។
គួរបញ្ជាក់ថា បើក្រឡេកទៅមើលទំហំពាណិជ្ជកម្មទ្វេភាគីរវាងវៀតណាម និងឡាវវិញ ឃើញថាកាលពីឆ្នាំ២០២១សម្រេចបានជាង១ពាន់៣រយលានដុល្លារ កើនឡើងជាង៣៣% ធៀបនឹងឆ្នាំ២០២០។ ក្នុងនោះ វៀតណាមនាំចេញទៅឡាវ មានជិត៦០០លានដុល្លារ កើនឡើង៤% ខណៈដែលឡាវនាំចេញទៅវៀតណាមវិញមានជាង៧៧៨លានដុល្លារ កើនឡើងប្រមាណ៧០%៕
None
