តើមានកត្តាអ្វីជួយឱ្យវៀតណាម ឈានមុខគេលើការដឹកជញ្ជូនអាហារតាមអនឡាញ នៅតំបន់អាស៊ាន?

ការសិក្សាស្រាវជ្រាវមួយ ស្ដីពីការចែកចាយអាហារតាមអនឡាញ នៅអាស៊ាន ដែលរៀបចំដោយក្រុមហ៊ុនបណ្តាក់ទុន Momentum Works បានរកឃើញថា ទីផ្សារចែកចាយអាហារតាមប្រព័ន្ធអនឡាញនៅប្រទេសវៀតណាម បានកើនឡើង២៦% កាលពីឆ្នាំមុនជាអត្រាលឿនបំផុតនៅតំបន់អាស៊ីអាគ្នេយ៍ ដោយកើនឡើងពីចំនួន១,៤ពាន់លានដុល្លារ ក្នុងឆ្នាំ២០២៣ ដល់១,៨ពាន់លានដុល្លារ នៅឆ្នាំ២០២៤។

កំណើនទីផ្សារចែកចាយអាហារនេះត្រូវបានជំរុញដោយកត្តាសំខាន់ៗចំនួន៣ រួមមាន អ្នកប្រើប្រាស់ អាហារដ្ឋាន និងវេទិកា Platform ខណៈជនជាតិវៀតណាម កាន់តែចូលចិត្តបញ្ជាទិញអាហារឆ្អិនស្រាប់តាមរយៈកម្មវិធីអេប ដោយសារងាយស្រួល និងមានការបញ្ចុះតម្លៃ។

សម្រាប់កត្តាអ្នកប្រើប្រាស់ ការស្ទង់មតិរបស់ក្រុមហ៊ុនស្រាវជ្រាវទីផ្សារ Q & Me បានរកឃើញថា ប្រជាជនវៀតណាម៣០% បានបញ្ជាទិញអាហារថ្ងៃត្រង់តាមអនឡាញ ខណៈដែលអត្រា៤៦%ទៀត បានចម្អិនអាហារដោយខ្លួនឯងនៅផ្ទះ និងអត្រា១២%ទៀត បានចេញទៅហូបអាហារនៅតាមអាហារដ្ឋានផ្សេងៗ។

ជាក់ស្ដែងនៅអំឡុងថ្ងៃឈប់សម្រាកបុណ្យចូលឆ្នាំថ្មីប្រពៃណីវៀតណាម កាលពីពេលកន្លងទៅ ការស្ទង់មតិរបស់ក្រុមហ៊ុន GrabFood បានបង្ហាញថា អ្នកឆ្លើយតបចំនួន១៩% បានបញ្ជាទិញអាហារតាមអនឡាញសម្រាប់ពិធីជប់លៀងនៅថ្ងៃបុណ្យចូលឆ្នាំថ្មីនោះ។

ពាក់ព័ន្ធនឹងកត្តាអាហារដ្ឋាន បច្ចុប្បន្នអាហារដ្ឋាននៅវៀតណាម កំពុងដំណើរការយ៉ាងសកម្ម ជាមួយនឹងកម្មវិធីអេបរបស់ពួកគេ ដើម្បីស្វែងរកអតិថិជនផងដែរ។ នៅក្នុងខែវិច្ឆិកា ឆ្នាំ២០២៤ កម្មវិធីអេប GrabFood បានអះអាងថា ចំនួនដៃគូរបស់ខ្លួនបានកើនឡើង៥ដងចាប់តាំងពីការបើកដំណើរការក្នុងខែមិថុនា ឆ្នាំ២០១៨។

ចំណែកកត្តាវេទិកាវិញ ក៏មានការប្រកួតប្រជែងគ្នាយ៉ាងខ្លាំងផងដែរ តាមរយៈការបង្ហាញកម្មវិធីបញ្ចុះតម្លៃ ការបង្កើនគុណភាពសេវាកម្មដឹកជញ្ជូន និងការបន្ថែមលក្ខណៈកម្សាន្តផងដែរ។ បើទោះបីជាប្រទេសវៀតណាមបានឈានមុខគេខាងផ្នែកចែកចាយអាហារក៏ពិតមែន ប៉ុន្តែទីផ្សារចែកចាយអាហាររបស់វៀតណាមនៅតូចជាងទីផ្សាររបស់ឥណ្ឌូនេស៊ី ថៃ ហ្វីលីពីន សិង្ហបុរី និងម៉ាឡេស៊ីនៅឡើយ៕

អត្ថបទ៖ សុខ មង្គល