រោងចក្រផលិតរថយន្ដអគ្គិសនីរបស់ក្រុមហ៊ុនវៀតណាមនៅលើទឹកដីសហរដ្ឋអាមេរិកនេះ ត្រូវបានរំពឹងថា នឹងអាចប្រតិបត្តិការផលិតនៅឆមាសទី២ឆ្នាំ២០២៤ខាងមុខនេះ។
នាយិកាប្រតិបត្តិក្រុមហ៊ុនវៀតណាម VinFast អ្នកស្រី លី ធី ធូ ធុយ (Le Thi Thu Thuy) បាននិយាយក្នុងសេចក្តីថ្លែងការណ៍តាមអ៊ីមែលថា រោងចក្រនេះនឹងមានទីតាំងស្ថិតនៅក្នុងតំបន់មួយដែលមានឈ្មោះ Triangle Innovation Point ក្នុងរដ្ឋ ន័សខារ៉ូលីណា (North Carolina) សហរដ្ឋអាមេរិក។ អ្នកស្រីបានបញ្ជាក់ថា រោងចក្រនេះគ្រោងនឹងបើកដំណើរការនៅក្នុងឆមាសទី២នៃឆ្នាំ២០២៤ ហើយការវិនិយោគដំបូងនឹងមានរហូតដល់ ២ ពាន់លានដុល្លារអាមេរិក ខណៈកន្លងមកក្រុមហ៊ុននេះ បានបង្ហើបពីផែនការវិនិយោគរោងចក្រនេះដល់ទៅតម្លៃ ៦ពាន់លានដុល្លារអាមេរិកឯណោះ។
អ្នកស្រី ធូ បានបន្ថែមថា ក្រុមហ៊ុនវៀតណាម VinFast បានចាប់ផ្តើមការរចនាគូរប្លង់សម្រាប់រោងចក្រនេះហើយ ហើយពួកគេក៏កំពុងប្រញាប់បញ្ចប់គម្រោងសាងសង់រោងចក្រនេះផងដែរព្រោះគោលដៅនឹងចាប់ផ្តើមចង្វាក់ផលិតកម្មចាប់ពីខែកក្កដា ឆ្នាំ២០២៤តទៅ។
អត្ថបទគួរអាន
ស្ថាបនិកក្រុមហ៊ុន VinFast លោក ផាម ណាត វួង (Pham Nhat Vuong) បានចំណាយទ្រព្យសម្បត្តិរបស់លោកចំនួន ២ ពាន់លានដុល្លារ ដើម្បីលក់រថយន្តអគ្គិសនីទៅឱ្យពលរដ្ឋអាមេរិក។ នេះគឺជាទង្វើមួយដ៏ក្លាហានប្រកបដោយហានិភ័យយ៉ាងខ្លាំងដោយសារថា មានមនុស្សជាច្រើនបានធ្វើផែនការដ៏អស្ចារ្យក្នុងការវិនិយោគយ៉ាងច្រើនទៅលើរោងចក្រផលិតរថយន្តអគ្គិសនីបែបនេះ ប៉ុន្តែគឺមានតែបរាជ័យប៉ុណ្ណោះ ហើយបច្ចុប្បន្ន ក្រុមហ៊ុនផលិតរថយន្ដអគ្គិសនីដែលជោជគ័យលើទីផ្សារគឺមានតិចតួចប៉ុណ្ណោះ ក្នុងនោះ ក្រុមហ៊ុន Tesla របស់អាមេរិក គឺនាំមុខគេនៅលើទីផ្សារថយន្ដនេះ។
ប្រធានាធិបតីអាមេរិកលោក ចូ បៃដិន បាននិយាយនៅសេតវិមានសហរដ្ឋអាមរិកថា ផែនការបង្កើតរោងចក្ររបស់ក្រុមហ៊ុន VinFast នៅរដ្ឋ North Carolina នឹងបង្កើតការងារបានជាង ៧ ពាន់កន្លែង។
នាយិកាប្រតិបត្តិក្រុមហ៊ុនវៀតណាម VinFast បាននិយាយថា រោងចក្រនេះនឹងអាចផលិតរថយន្តអគ្គិសនីបានចំនួន ១៥ ម៉ឺនគ្រឿងក្នុង១ឆ្នាំ ហើយនឹងអាចផលិតរថយន្តក្រុងអគ្គិសនី និងអាគុយផងដែរ។ រោងចក្រនេះ នឹងក្លាយជារោងចក្រផលិតរថយន្តទី២របស់ក្រុមហ៊ុន VinFast បន្ទាប់ពីរោងចក្ររបស់ខ្លួននៅទីក្រុងកំពង់ផែ ហៃហ្វុង (Haiphong) នៅភាគខាងជើងប្រទេសវៀតណាម។
ក្រុមហ៊ុន VinFast មានបំណងចាប់ផ្តើមលក់ចែកចាយរថយន្តអគ្គិសនីនៅសហរដ្ឋអាមេរិក កាណាដា បារាំង អាល្លឺម៉ង់ និងហូឡង់នៅចុងឆ្នាំ២០២២នេះ ហើយតម្លៃសម្រាប់រថយន្តអគ្គិសនីលក្ខណៈគ្រួសារស៊េរី VF8 និង VF9 នឹងមានចាប់ពីជាង ៤ម៉ឺនដុល្លារទៅដល់ជាង ៦ម៉ឺនដុល្លារ។
ក្រុមហ៊ុន VinFast ក៏រំពឹងដែរថា ខ្លួននឹងលក់ចែកចាយរថយន្តអគ្គិសនីនេះឱ្យបានចន្លោះពី ៧០ ម៉ឺនគ្រឿងទៅ ១ លានគ្រឿងក្នុងរយៈពេល៥ទៅ៦ឆ្នាំខាងមុខទៀត៕
អត្ថបទ៖ សុខ ជា
None
