លោក Pham Minh Chinh នាយករដ្ឋមន្ត្រីវៀតណាមបាននិយាយនៅក្នុងកិច្ចប្រជុំមួយ ជាមួយក្រុមធុរកិច្ចជនកូរ៉េខាងត្បូងនៅទីក្រុងហាណូយថា អាទិភាពកំពូលរបស់វៀតណាមនៅពេលនេះ គឺការគ្រប់គ្រងអតិផរណា ស្ថិរភាពម៉ាក្រូសេដ្ឋកិច្ច ការប្រយុទ្ធប្រឆាំងនឹងវិបត្តិសេដ្ឋកិច្ច និងការស្តារសេដ្ឋកិច្ចឡើងវិញ។ នាយករដ្ឋមន្ត្រីរូបនេះបានមានប្រសាសន៍ថា លោករំពឹងថា វិនិយោគគិនកូរ៉េខាងត្បូងនឹងផ្តល់អាទិភាពដល់ការពង្រីកការវិនិយោគនៅប្រទេសវៀតណាម ជាពិសេសក្នុងវិស័យបច្ចេកវិទ្យាកម្រិតខ្ពស់ និង បង្កើតលក្ខខណ្ឌអំណោយផលសម្រាប់ក្រុមហ៊ុនវៀតណាមក្នុងការចូលរួមក្នុងខ្សែចង្វាក់តម្លៃសកលលោកជាដើម។
លោក ផាម មិញជីង បានបន្តថា ការចូលរួមវិនិយោគពីប្រទេសកូរ៉េខាងត្បូង នឹងរួមចំណែកក្នុងការធ្វើឱ្យវៀតណាមក្លាយជាមជ្ឈមណ្ឌលក្នុងការគ្រប់គ្រងខ្សែសង្វាក់តម្លៃក្នុងតំបន់ និង ពិភពលោក ហើយវៀតណាមក៏លើកទឹកចិត្តដល់ការអភិវឌ្ឍន៍ថាមពលស្អាត និងកកើតឡើង ហើយវៀតណាមក៏កំពុងព្យាយាមជំរុញកិច្ចសហប្រតិបត្តិការជាមួយកូរ៉េខាងត្បូង ដើម្បីបង្កើតមជ្ឈមណ្ឌលថាមពលធំៗ ដែលនឹងជួយសម្រេចបាននូវគោលដៅអព្យាក្រឹតភាពកាបូនរបស់ប្រទេសនេះនៅឆ្នាំ ២០៥០ និង អភិវឌ្ឍទីផ្សារថាមពលប្រកបដោយតម្លាភាព និង ការប្រកួតប្រជែង។
អត្ថបទគួរអាន
នៅក្នុងជំនួបនោះ ក្រុមធុរជនកូរ៉េខាងត្បូងបានផ្តល់អនុសាសន៍ជាបន្តបន្ទាប់លើការលើកទឹកចិត្តឱ្យមានការបន្ធូបន្ថយពន្ធ ការរៀបចំផែនការសម្រាប់វិស័យអគ្គិសនី យន្តការសាកល្បងសម្រាប់ការទិញនិងលក់អគ្គិសនីដោយផ្ទាល់ និង ដំណោះស្រាយក្នុងការសាងសង់ និងអភិវឌ្ឍយានយន្ដអគ្គិសនីផងដែរ។
ស្របពេលជាមួយគ្នានោះ រដ្ឋមន្ត្រីក្រសួងឧស្សាហកម្ម និងពាណិជ្ជកម្ម លោក Nguyen Hong Dien បានអះអាងថា វៀតណាម នឹងធានាមិនឱ្យមានការខ្វះខាតអគ្គិសនីនៅឆ្នាំ២០២២ និង ឆ្នាំ២០២៣ ជាពិសេសនៅតំបន់ឧស្សាហកម្ម និងផលិតកម្មនោះទេ បើទោះបីជាអាចមានការរំខានមួយផ្នែកដោយសារអាកាសធាតុក្តៅក៏ដោយ។
កាលពីដើមខែនេះ ប្រព័ន្ធថាមពលវៀតណាមបានជួបប្រទះនឹងការប្រែប្រួលតង់ស្យុង ដែលបណ្តាលឱ្យមានការដាច់ចរន្តអគ្គិសនីនៅក្នុងតំបន់ភាគខាងជើងមួយចំនួន ដែលជាកន្លែងតំបន់ឧស្សាហកម្ម និង កន្លែងផលិត របស់ក្រុមហ៊ុនយក្សៗកូរ៉េខាងត្បូងផងដែរ។
គួរបញ្ជាក់ថា បច្ចុប្បន្នកូរ៉េខាងត្បូង គឺជាដៃគូវិនិយោគផ្ទាល់ពីបរទេស (FDI) ធំជាងគេនៅវៀតណាម ដោយបានវិនិយោគលើវិស័យសេដ្ឋកិច្ចចំនួន ១៩ នៅក្នុងខេត្ត-ក្រុងចំនួន ៥៩ ជាមួយនឹងគម្រោងចំនួន ជាង ៩ ពាន់ ៣រយគម្រោង ដែលជាមួយដើមទុនចុះបញ្ជីសរុបជិត ៨០ ពាន់លានដុល្លារ។ ទន្ទឹមនឹងនោះ កូរ៉េខាងត្បូងគឺជាដៃគូពាណិជ្ជកម្មធំជាងគេទី ៣ របស់វៀតណាម ដោយទំហំនៃការនាំចូល-នាំចេញកាលពីឆ្នាំមុនបានកើនឡើងដល់ ៧៨ ពាន់លានដុល្លារ៕
